البارت التاسع والثلاثين
طارق توسعت عيونه من الي يسمعه بعمر بروق ماتكلمت معه كذا رد باستنكار : مانتس جايتن لالتمايم
بروق ابتسمت وبانت ابتسامتها في عيونها من فتحة النقاب : لا اكيد ابجي ابشوف سنع بنت طارق عند ضيوفها هي تقوم بالحمل والاتبرك دونه
طارق عرف انها زعلانه منه يوم انفلت عليها يسبها ويشتمها بس ذاك اليوم بعذره وش تبيه يقول وبنته مخطوفه من بين ايدينها رد عليها بتحدي
: بنت طارق شيخه محفوله مكفوله
بروق بنفس نبرة التحدي : الله يقويك مشيخها بريالك مانا بخدم عند الشيخات
طارق التفت على جاسر بغضب : انت تسمع ياجاسر والاماغير تقلب راسك كذيا
جاسر ببرود : اسمع ياطارق طقيت الباب وجاك الجواب ....قلتلها هاك اليوم لين صفى راسك ومارديتك عنها واليوم ماردها عنك دون نفسها
طارق التفت على بروق بغضب خاصه انه حس ان صديق عمره زعل عليه بسببها
: تبشر بعزها بنت طارق طول عمرها شيخه عليتس وعلى غيرك
جاسر تغير وجهه والتفت على طارق بحده وكان بيرد عليه لاكن بروق اسبقته : ما للبزر مشيخه لاعلى الناس والاحتى على نفسه
طارق رفع يده بعصبيه وغضب ونزل فيها بكل قوته مصوبها على خد بروق لاكن جاسر اعترض يده ومسكها وفي نفس الوقت التفت على بروق
بغضب من كلام طارق : بروق ادخلي داخل
بروق دخلت واهي تفور من كلام طارق ومحاولته لضربها طول عمرها تقدره وتحترمه وتحطه بنفس مقام ابوها واليوم جاي يهينها علشان بنته بدل مايعتذر عن شتايمه الي صبها على راسها الاسبوع الي راح ...
جاسر التفت على طارق بعد ماطلعت بروق وبحده
: الابروق ياطارق مااسمحلك تهينها سكت عنك الاسبوع الي راح احتراما للاخوه الي بينا بس الظاهر مالها قدر عندك ..
طارق صاح بغضب : الاسبوع الي راح بنتك مضيعه بنتي وش تبيني اسوي مثلا احب راسها
قاله وطلع من بيت جاسر معصب واهو يحلف انه ليوري الكل منهي بنت طارق !
بروق دخلت داخل البيت واعصابها شابه حريقه من القهر الي تحس فيه طارق ماهو حاسب لاحد حساب وكل ماله يتجراء عليهم اكثر .....انزعت نقابها وارمته على كنب الصاله وفكت طرحتها ونزلت عباتها بسرعه واهي تحلطم رمتهم على الكنب وراحت للمطبخ تبي تشرب ماء كود تهدي من نفسها شوي ...دخلت المطبخ وصبت لنفسها مويه وجلست على كرسي طاولت المطبخ تشربه
بشويش وتفكر في الي صار ...انتبهت على صوت امها :بروق صاير شي ابوك جاني معصب يقول روحي شوفي بروق واجلسي معها وطلع من البيت
وحاله مايسر ..
بروق تنهدت بضيق ونزلت الكوب على الطاوله والتفتت لأمها الي اسحبت الكرسي الي عن يمينها وجلست عليه : عمي طارق كان هنا يبيني اشرف على تجهيزات التمايم ....وحكت لها التفاصيل ..
ام مشاري بغيض : لا هالطارق تجاوز حدوده بزياده بس بعذره دام ابوك متحمل غثاه ويسلك له
بروق : يمه الانسان لمى يختار صديق واحد للعمر كله يحاول قد مايقدر انه يحافظ على مكانة هالصديق في عينه لأنها لو طاحت مره ماراح ترجع بالمره خسارة الصديق مكلفه نفسياً لحد لايوصف
ام مشاري : الصداقه الحقيقيه هي الي يكونون الاصدقاء فيها بنفس القدر من الحرص على استمرار هالصداقه والحاصل ان جاسر يبذل جهده
في التغاضي عن هفوات طارق بس طارق ماهو مهتم سواء كسب ابوك والاخسره لو كان هامه ماتعامل معه كذا بعدم احترام يازعم خاطرك وسيع وماتزعل
بروق : لا يمه بالعكس عمي طارق يحب ابوي ومتمسك فيه بس يعتبر طولة السانه شر لابد منه ويفترض ان ابوي دامه عارف انه مايقصد الكلام الي يقوله وقت عصبيته خلاص مافيه داعي يبرر او يعتذر ويعتبر انه مجرد كلام انقال وانتهى في وقته
ام مشاري : الكلام اول اسباب هدم العلاقات وابوك شكله وصل حده واذا طارق ماعدل اسلوبه معه اتوقع تنتهي صداقتهم خلال سنتين ثلاث اذا حطينا في الاعتبار ان جاسر خاطره وسيع بزياده
بروق : لو حصل وانتهت صداقتهم ابوي ماراح يتأثر كثير لانه انسان محبوب والف من يتمنى صداقته
ام مشاري تغير الموضوع : بتروحين معي ل التمايم
والامع الريم لديما
بروق : كنت ناويه اروح ل التمايم بس بعد الي صار هونت بروح مع الريم
ام مشاري : احسن ماله داعي تروحين لهم في بيتهم وتغثين نفسك ويمكن البزره حلا ترمي عليك كلمه والاشي وجواهر ماهي في عازة مشاكل بين بنت اخوها وبنتها
بروق : مشاري عرف عن خطبة نادر ل الريم
ام مشاري : لا موب انتي صاكه روسنا تكتمو على الموضوع ولاحد يدري ....حتى ابوك انتقلت له عدوى التكتم ويقول نادر رجال كفو والاابي الريم تخسره
بروق : الله يتمم لهم على خير هانت بكره ملكتهم
ام مشاري تقاطعها : انتي متوقعه ان احد من اعيال عمامك يبي الريم
بروق بصدق : مدري عن سالفة احد منهم يبيها او لا بس متأكده انهم بيعترضون على نادر علشانه من ال عامر واهم للحين مقهورين من الكلام الي جاهم عن يوسف ومعتبرين ان اهله خادعينهم عندك سيف وراكان ذولا ممكن يفركشون السالفه
ام مشاري : لو قايله سياف ممكن اصدق لان كلمته مسموعه عند الكل بس سيف وراكان مافي يدينهم شي وابوك موب معطيهم وجه
بروق : مايعطيهم وجه بس ابوانهم يعطيهم كل شي
ام مشاري : الله يستر بستره ويتمم ل الريم على خير
جاهم صوت الريم يقطع عليهم سوالفهم
: يمه انتي متأكده ان مرة خالي بتروح للعرس الي هم معزومين عليه
ام مشاري التفتت ل الريم : ايه كلهم بيروحون ماغير البنات بيجتمعن عند ديما ليه
الريم تلعب باصابعها بحياء : يمه اخاف اقابل ام ريان مستحيه منها
بروق ارفعت حاجبها باستنكار : التمايم وقلتي استحي اروح لها وال عامر بيحضرون بس حريم خوالي وش دخلهم في السالفه تستحين منهم اصلا محد منهم يعرف انك مخطوبه
الريم زاد احراجها : ادري بس اء ...مدري وشلون اشرح لك احس كل الناس يناظرون فيني ويقولون شوفو هذي ملكتها بكره واهي مقضيتها عزايم
ام مشاري اتسعت ابتسامتها : عادي ملكه ترا مافيها شي اصلا العقد بينكتب الصباح وفي الليل
بنسوي حفلة صغنونه ويجي رجلك يشوفك ويلبسك الشبكه وخوالك وخالاتك بيجون واكيد كل عمامك يعني مصيرك تشوفينهم
الريم نزلت راسها بحياء واهي مبتسمه وبروق تفرج عليها وتعلق بضحك :ههههه نادر بيطير عقله بس يشوف ذا الابتسامه والحياء الي مقطع بعضه ...
ام مشاري تهز راسها بعدم رضاء : انتم يبيلكم تدمجون شخصياتكم مع بعض عشان تطلعون بشخصيه اكثر توازن
الريم وبروق صرخو في نفس الوقت : لا
بروق : انا عاجبتني نفسي كذا مابي اخذ من احد شي
الريم تكشر في وجه بروق : والاحتى انا ابي اخذ منك شي بتسوين خلل في هرمونات انوثتي !
________________________
طارق اخذ الموضوع تحدي ارسل على قروب اخوانه وخواته يسئلهم عن منسقين الحفلات في الرياض وحمد ربه انه سبق وجهز امور الضيافه كامله يعني يقدر يركز على التنظيم والخدمه
وانهالت عليه الارقام في لحظه ...ماضيع وقت وبدى يجري اتصالاته وكان العائق الاول الوقت شركات التنسيق ماتقبل الخدمه الفوريه لان شغلهم يحتاج تخطيط وجهد ووقت وهذا خلا كل مكاتب التنسيق الي اتصل فيهم يرفضون طلبه بمجرد مايعرفون ان مناسبته اليوم ...بعد جهد قدر يقنع وحده من الشركات تنظم له تمايم اولده لاكن بسعر مضاعف لعدة مرات طارق ماهتم بالتكاليف المهم عنده يفوز بالتحدي ويوري الكل منهي بنت طارق !
انهى الاتصال واهو يطالع في ساعته وحده بعد الظهر معقوله بيكفي الوقت للي ابي !
______________________
اطلعت من غرفتها واهي حدها مرتبكه ..نقطة ارتكاز الثقه الوحيده في نفسها حطمها يوسف ...كانت متشبعه بالمديح لشكلها واناقتها لدرجة انها ماعاد تتأثر بهالمديح وتيبست روحها
عطش لمديح من نوع ثاني !
مديح الشخصيه والثناء على الذات والانبهار بالشيئ الي تسويه ...بس اهي موقاعده تسوي شي اساسا علشان الناس ينبهرون بالي تسويه ....الا كانت تدرس وتنجح !...نجاح بالدف ويقعدون يعايرونها بالي حولها ....طيب والشغل في الشركه ؟!......ماكانت تشتغل تكذب على نفسها والاايش .....حتى ولو اهي ماهي سيئه وكل شي فيها جميل ....وين هالجمال ليه ماشافه يوسف ؟!
حست بغصه تعترض في حلقها ودمعه غافلتها وطاحت من عينها ....ارفعت يدها بآليه وامسحت دمعتها واهي تشهق بنفس حار مشت ل الدرج واهي تشوف فخامة التنسياقات والجمال المتفرد
في تصميم زينة البيت وترتيباته ابتسمت بفرح
واهي تناظر في فستانها الانيق بقصته الفرنسيه الواسعه ...شعرها القصير ستريت الميك اب الي ابدعت فيه الميك اب ارتيست معطيها شكل انثوي
ساحر خاصه مع وجهها البيبي فيس برز جمالها بنعومه وانوثه رقيقه وهاديه والشكل النهائي لطلتها مبهر لولا انخماد بريق الثقه داخلها ...تتخطى نازله مع الدرج ويدها في حركه مستمره مابين تعديل شعرها وتلمس وجهها ومن ثمى رفع جوانب فستانها في حركه قلقه غير منقطعه يحركها انعدام الثقه تحس بذاتها نسيج متهالك من حلوى شعر البنات هشه رقيقه سريعة التلف !
استقبلنها عماتها الي وقفن في مدخل الصاله لاستقبال الضيوف الي بدو يتوافدون
: هلا حلوشه وش هالزين
: عمه صدق حلوه
: تجننين
: طيب شعري
: يهبل
: طيب وجهي موكنهم كثرو ميكب
: لابالعكس طالعه شي
: احسه مايناسبني صح
: لا بالعكس مخليك بنوته قمر واصغر من عمرك
( عمتها قالته وفي اعتقادها ان هالكلام بيفرحها لاكن في الواقع الميكب كان مبينها في عمرها الحقيقي واهي بشكلها المعتاد تبين اصغر )
حلا زاد احباطها يعني مع كل الي سوته باقي اصغر من سنها تعقدت من كثر مايشهقون الناس في وجهها كل ماقالت لهم سنها ...يالله شكلك من بنات المتوسط ....
كشرة بهم بعد ماوقفت جنب عماتها تسلم على الضيوف وتفكيرها ماهو معهم ....بتجي الغوله الحين وش اسوي اذا جت اسلم عليها والا ...واهي وش بتسوي اخاف تقولي شي يقهرني قدام الناس
....اف اكره الناس المتوحشه .....بروق ....سياف ... صقر ....رهف ...وحتى باسل ....هو صحيح مرات يصير حنين ...بس برضو يبقى متوحش
كانو الناس يدخلون يسلمون يشملونها بنظرة تأمل معجبه ثم يتجاوزونها وتنتهي من اذهانهم في نفس الحظه بسب وقوفها البارد بطريقه توحي بانها ضمن زينة المكان ماتهلي وترحب زي عماتها الي شالو المكان بصوت ترحيبهم ماتراد السلام وتنشد عن الحال نفس بنات عمامها الي يقابلون الناس ببشاشه ويردون على اسئلة المجاملات المعتاده
....ادخلت ام مشاري وتحفزة حلا تنتظر دخول بروق ...لكن حريم خوالها دخلو بعد ام مشاري ومن بعدهم بنات خوالها وبروق والريم لحد الحين مابينو ...اسمعت وحده من عماتها تسئل : وين بنات جاسر ماشوفهن معكم
: عند خوالهن
اشرق وجهها فجأه ..حست بفرحه حقيقيه ماهي مصدقه انها تخلصت من بروق ...انتهى الاستقبال
وانتقلن البنات للمجلس الثاني المجهز باستريو علشان يرقصون ... وهالمجلس منسق ومرتب على اعلا مستوى الورد الطبيعي موزع بطريقه فنيه على
الطاولات وفي الزوايا والمدخل ...الظيافه من افخم محلات ومخابز الحلويات والموالح الشوكلت السويسري والبلجيكي يملا الصواني الفخمه ..وثلاث مظيفات مهمتهم يصبون القهوه والشاهي للبنات ويقدمون لهم الضيافه واذا كان
هذي ترتيبات جلسة البنات الباقي افخم بمراحل
التمايم اقل ماقيل عنها فخمه لحد المبالغه
الكل لاحظ ان الترتيبات جت على وزن حفلة زواج
واكثر مالفت انتباه الضيوف طواقم الخدمه المبالغ
في اعدادهم ناس تضيف وناس تسوي القهوه والشاهي وناس تنقل الضيافه من المطبخ للمجالس وناس تستلم العبايات وتعلقها في المكان المخصص وناس تراقب النظافه وناس مهمتهم يستلمون الاطفال وينقلونم لغرفه خاصه فيهم مجهزه بالالعاب والمشرفات الي يتابعونهم شي غريب ايش داعي البشر ذولا كلهم وعدد الضيوف مهما كبر يبقى تحت السيطره بمجهودات اهل الحفل من بنات وحريم ... وغاب عن ذهن المتسآئلين ان العدد الكبير من الخدم والمظيفات مقصود والهدف منه اظهار ترف حلا وانها تلقى من يخدمها في اقل واتفه الامور والاتضطر تخدم اي احد حتى ولو بمدة فنجال
__________________
من صبح ماجلس المجهود الي بذله في تجهيز الحفله خرافي صحيح انه جهز كل شي برياله على قولة بروق بس مجرد البحث والتنسيق مع شركات الخدمه وتنسيق الحفلات اخذت منه وقت وجهد كبير وصرف اضعاف الميزانيه الي كان مقررها للحفله ......يستقبل ضيوفه ويرحب ويهلي وقلبه مشغول بالي تأخر عنه لأول مره في عمر صداقتهم
الطويله ....تلفت في المجلس الواسع وشافه مليان ناس ....بس كل هالناس مايغنونه عن صديق عمره
......معقوله يكون زعلان .......اف كله من بروق والسانها الي يبيله قص .....الي سويته كافي يقص
السانها ...بتشوف بعينها بنتي كيف يخدمها ريالي
ويعيشها اميره ......ابتسم بفرح واهو يشوف الي
دخل للمجلس بابتسامته المشرقه ووجهه البشوش
عارضه بخطوات سريعه وسلم عليه بحراره رغم انه ماله كم ساعه من شافه : انت وينك من اليوم ليه تأخرت
جاسر مااستغرب من حفاوة طارق في السلام ماعنده شك في مكانته عنده ويعرف ان هالسلام الحار على وزن اسف : رحت اودي البنات لبيت خالهن ولزم علي ابو ريان اتقهوى عنده
طارق تغير وجهه وانصدم وشلون بنات جاسر يتغيبن عن تمايم اولده : وليه توديهن والتمايم ..ليه ماجن
جاسر بتبرير : بنت خالهن عاز...
قاطعه طارق بحده : مافيه عزيمه تبدا على عزيمتي
رح جبهن والاارسل رعد يجيبهن
جاسر بأحراج : رعد كاشت مع اخوياه ومهوب راجع من غير شر غير بكره المغرب
طارق حزة في خاطره كيف اعيال جاسر مايحضرون تمايم اولده ماعمرهم تغيبو عن مناسبه تخصه اذا كان عندهم في الرياض او كانو عنده في جده ...هو ماهتم بعيال اخوانه من جاء منهم ومن غاب اخوانه
انفسهم ماعنده مانع لو غاب منهم واحد والاثنين
بس جاسر واعياله لا جاسر غير طول عمره غير
انتبه من هواجسه على حركة جاسر يوم مشى وتعداه داخل للمجلس وجاء من بعده رجال سلم عليه عجز يركز منهو والا وش قال في سلامه انتهى
من استقباله بسرعه والتفت يدور جاسر بعيونه شافه يمر على الرجال في المجلس ويسلم عليهم
وكل واحد يسلم عليه ياقف معه لحظه يشدد عليه
بالسؤال عن الحال والعيال ......دليل مكانته الكبيره
في نفوس الناس ....استمر يراقبه واهو ينتظر اللحظه الي ينتهي فيها من السلام حتى يرجع يجلس جنبه كالعاده ..يبي يعرف ليه اعياله ماجو وبيحاول يقنعه يرسل احد يجيب البنات من بيت خالهم مايصير يتغيبون عن التمايم قطع حبل افكاره انتهاء جاسر من السلام رسم على ملامحه الجامده ابتسامه عريضه تسبب الارهاق لعضلاة وجهه بس ماعليه كل شي لأجل جاسر يهون ....
انكمشت ابتسامته اسرع ممايضن لمى شاف جاسر
يتجه لراشد ال عامر وابوه ويجلس بينهم وذولاك
طايرين فيه ...هذا راشد ابو يوسف ....الشخص الي عجز يستسيغه ....مايستاهل يوسف اساسا ....بس ليه يوسف مقاطعهم ....يوم عزمني في بيته جلس طول الوقت يسئل عن يوسف ...وواضح انه مايعرف عنه شي ....يمكن زي ماقال جاسر علشان بدى بدايه جديده ويبي يستقر وضعه قبل يرجع لهم .....الله يصبرني على ذاك اليوم ....ايه ياجاسر ياترا وش الي مخلفك الليله ...ماهي بعيده تكون العوبا ورى زعلته ذي ...اكيد انها فارتن راسه والا من متى جاسر يزعل من دون سبب ..... واذا على هواشي لبنته تراها بنتي انا بعد وش فيها لاهاوشتها !
_______________
طلعت ل الصاله واهي طفشانه بروق النذله ساحبه
عليها ورايحه لخوالها روحتها ذي مره غريبه بس مصيري اعرف وش وراها ...اشهقت بفرح واهي تشوف بنات ال عامر يشيكن على اشكالهن قدام المرايه الجانبيه في الممر الي قبل مجلس الحريم
تقدمت لهن وسلمت عليهن بحماس : دخلتو تسلمون على الحريم والاباقي
غرور بابتسامه هاديه : الا سلمنا وخلصنا
رهف : حلو اجل مشينا لمجلس البنات هناك رقص وفله
غزل : بروق جت
رهف كشرت : لا ماجت النذله رايحه لخوالها مدري وش الطاري
غرور الي مكلمه بروق وقايله لها ان الريم مستحيه تحضر التمايم وبتروح معها لخوالهم ابتسمت بتسليك : اكيد عندها اسبابها يمكن جاي خوالهم احد مهم والا شي
رهف : يمكن خل تجي بس وانا اطلع الهرجه من بطنها
غزل ارفعت يدها لشعرها ترجع خصله منه لورى طاح من يدها منديل وقبل لاتنحني تاخذه القطته
وحده من العاملات بملقط وحطته في سله شكلها فخم شايلتها في يدها
البنات ناظرو بعض باستغراب غزل واهي تلفت تحاول تعد كم شافت من عامله من دخلت لحد الحين : وش سالفة الخدم ذولا خير ترا مره مسوين زحمه
رهف بحرج : والله ان عمتي ورجلها طول عمرهم متواضعين وموب حقين مظاهر بس الليله مدري وش سالفته ابو باسل مبالغ مره في التجهيزات وعدد العاملات الي جايبهم لخدمة الضيوف يمكن من زود فرحته بالمولود
غرور ماعجبها جو الحفله مره اوفر بس ماعلقت غزل ماهي متعوده تخلي شي يثقل على قلبها : حنا اول ماشفنا الزينه والعاملات الي كل مامشيت خطوتين طلع في وجهي وحده جديده قلنا يمكن فيه مناسبه قرينه توقعنا بنتهم عاقده قرانها او شي
رهف : لا ماعندهم غير تمايم ولدهم وبنتهم توها
غرور : بنتهم مره توها بنت متوسط مين الاهبل الي راح يخطبها في السن ذا
رهف ضحكت على كلامها : هههههه تراها كبري انا وبروق بس علشان حجمها شوي صغير ووجهها بيبي فيس تبين صغيره
غزل باستغراب : اما عاد المشكله موب بس شكلها حتى شخصيتها يوم تكلمت معها كنت متاكده مليون بالمئه انها بنت متوسط اشوا اني ماجبت طاري ادراستها وتفشلت ....
رهف : امشو خلونا نروح لمجلس البنات لمتى وحنا واقفات في الممر
___________
وقف سيارته قدام بيته وعينه على الي واقف على بابه يحتريهم بدليل انه بمجرد ماشاف السياره وقفت جاهم يمشي ...التفت على بروق في المرتبه الخلفيه : طارق يحتريك
بروق بمزح : كذا الشخصيات المهمه لازم ينتظرونهم
الريم بحياء : يافشلتي من عمي طارق بيزعل علينا ماحضرنا تمايم اولده
بروق : ماعليه بعض الزعل صحي يقوي القلب
الريم اول ماوقفت السياره نزلت بسرعه وراحت لداخل البيت مستحيه لاتواجه عمها ....
طارق شاف الريم تدخل وماهتم كثير لانه يعرف الريم خجوله وماتتكلم معه يادوب ترد السلام وتسئل عن الحال وقف قدام الباب ينتظر بروق
جاه صوتها : مساء الخير
رفع راسه لها بزعل : مساء النحشه
بروق بابتسامه : موب انا الي تنحاش والي تبيني اجي واشوفه شفته سناب تسلم والله عينٍ
تطنخ يابو باسل ضيوفك على حساب نظرتها
ابتسم طارق على كلامها وتباعد جاسر الليله وغياب اعياله عن حفلته خلاه يراجع حساباته وفي النهايه لقى ان بروق مهما سوت تبقى وحده من بناته دامها بنت جاسر وبمجاكر : اي والله تسلم عين بنتي حلوشه طنخت الناس من طنختها الشيخه
بروق عدلت شنطتها على متنها وارجعت تناظره
: المشيخه عزوم ومقضات لزوم ماكل من قال انا الشيخ اخذ الشيخه
طارق عصب : ابو باسل ابوه وانا ماقضي الزوم
بروق انقهرت منه يفسر الكلام على كيفه : حاشاك طال عمرك ان ماقضيت الزوم انت من يقضيه
بس كلامنا كان عن حلا مهوب عنك
طارق ومازال معصب : حلا بنت عمتك وش جايك منها علشان ترهجين عليها كذا
بروق استغربت كيف يتجاهل الي يسويه هو وبنته ويركز على تصرفاتها هي : بنت عمتي على عيني وراسي طول ماهي محترمتني اما لاخطت علي ماني بساكتن عن حقي
طارق رجع يستخدم كلامها ضدها : هامانك تقولين حلا بزر خلاص اجل البزر ماعليه شرهه وشلون تزعلين على الي ماتلحقه مشاريه
بروق اتسعت ابتسامتها بانتصار : اجل قل لبزرتك تراها في حل وش ماطرى على بالها تسويه ترا بالي وسيع على كل صغير (قالتها ظاهرها صغر العمر وقصدها صغر العقل )
طارق توسعت عيونه وتوه انتبه لزلة السانه وهالبنت داهيه ماتنتناشب حس ان السالفه ماعادهي معه كمل الي بداه : اهم شي انكم تصالحون
بروق بارتياح سجلت انتصارها عليه وهذا يكفيها اما حلا ماهي من الي ترد عقلها لهم : من يمي لاتشيل هم اعتبر انه ماصار شي
طارق ناظر في جاسر الي واقف معهم يسمعهم من غير مايتدخل في حوارهم واهو متعمد هذا الشي عشان بروق تدافع عن نفسها مايحب يقدم لها الحمايه وكأنها بزر ويفضل يعطيها فرصتها في الحوار والنقاش دام الكلام موجه لها ....ورجع يناظر في بروق : ووش سالفت ابو باسل الي طالعه فيها اليوم
بروق نزلت نظراتها للحظه واهي تفكر هل هو جاد بهالسؤال يعني ماهو حاس انه غلطان علي ...ارجعت ترفع نظراتها له وتكلم بصراحه : السالفه انك الاسبوع الي راح سبيتني وشتمتني وقلت في الي ماينقال وانت عارف ان كل الي قلته ماهو صحيح فلا تتوقع اني جاسر ثاني ! للاسف مابعد وصلت لحالة الصفح المطريه الي عند ابوي ..
جاسر ابتسم وربت على كتف طارق : محد يتحمل المنشار الي في فمك غيري وحتى انا بديت ازهق منه
طارق كشر واهو يوزع نظراته بين بروق وجاسر
وبعد ماخلص جاسر كلامه زحف يمه ولف يده من ورى كتوفه واهو يناظر بروق ويوجه كلامه الها : بسم الله على جاسر منك ابعدي عنه لاتعدينه
ثم التفت على جاسر ووجه له كلامه : انت اصلا ماتقدر تزهق مني خل عنك سوالف العوبا هذي لاتخرب بينا
جاسر ابتسم له : يمكن يطري علي طواري
طارق نفص عيونه فيه : ياويلك ان هوجست بس في هالطواري ....
بروق تعرف انه من النوع الي مايتقبل الاعتذار فحبت تسهلها عليه : انا مابي اخرب بينكم والاشي
بس مقدر اتجاوز غلطة احد في حقي قبل لايعتذر عنها واذا حسبت احساب انك صديق ابوي المقرب اقدر اكتفي بأنك توعدني انها ماتتكرر مهما كانت الاسباب
طارق زفر بضيق هالبنت صعبه وراسها يابس ياكبر الفرق بينها وبين جاسر ..بس بعذرها عمها ابو سياف وخالها ابو ريان : خلاص ابشري ماعاد تسمعين مني غير الي يرضيك يابنت جاسر
ماكان وعد بالمعنى المفهوم لاكنها مضطره تقبله يبقى اقرب الناس لأبوها وماهي حلوه تحرجه اكثر من كذا : اجل تصبح على خير ياعمي ذبحني البرد هنا بدخل اتدفى
طارق ابتسم : تصبحين على خير
___________________
مشغول بمراجعة كاميرات المراقبه هو وباسل فجأه
جاه تنبيه على جواله اخذ الجوال فتحه لقاه تنبيه
بحجزه لرياض اليوم العصر حذف التنبيه ونزل الجوال على المكتب الي قدامه ...طول الاسبوع الي راح واهو مشغول مع الشباب في البحث عن
الخونه الموجودين داخل الشركه ...لدرجة انه نسى شلته وماعاد يمثلون له اي هاجس التفت على باسل : انت متاكد ان كاميرات المخازن معطله بفعل فاعل
باسل رد واهو مركز في تسجيلات الفديو الي يتفحصها على الشاشه قدامه : ايه متأكد بس متى عطلوها هذا الي بيجنني كل مارجع بالتاريخ شهر ورى في سجلات المراقبه القى انها معطله من قبل ذا التاريخ
يوسف باهتمام : الحين انت كم شهر رجعت التسجيل
باسل : تقريبا خمسه شهور ولحد الحين مالقيت شي هذي بس حقة المخازن
يوسف : اف شكلنا ماراح نلقى شي
باسل : لا ماعليك بنصيدهم قريب لاتنسى بعد اسبوعين بنستلم التصاميم الجديده وفي هالوقت اكيد بيتحركون وبنقدر نكشفهم
يوسف : ان شاء الله دريت ان الشباب بيمشون بكره
باسل : ايه عارف ماقصرو راقبو المحل والالقو عليه شي الظاهر المشكله في الوقت الي حنا بدينا نراقب فيه لانا جينا بعد ماخلصو شغل واكيد قاعدين ينتظرون التصاميم الجديده
يوسف : زين ان ممدوح بيستمر في قسم التصميم
اكيد ان البدايه من اهناك
باسل ترك الماوس من يده وبدى يتمطى واهو مكانه ثم قام واقف : قم خلنا نروح نتغدا اليوم ممدوح عازمنا
يوسف اخذ جواله :لحظه خل اكلمه بشوف طلع والا باقي
باسل : لاتكلمه ارسله واتس اذا ماطلع معناته في مكتبه للحين واكيد المصممات حوله
يوسف فتح جواله وبدى يراسل ممدوح وبعد فتره قصيره قام واقف واهو يدخل جواله في مخباه
: يقول في الشقه يبدل ملابسه والشباب عنده بيطلعون الحين للمطعم
باسل فتح الباب المخفي خلف الستاره وطلع منه واهو يرد على يوسف الي تبعه : حلو اجل مشينا للمطعم ونتقابل هناك
اوصلو للمطعم ولقو الشباب واصلين قبلهم اول ماجلسو التفت ممدوح على مشاري بحماس
: وش الخبر الي لك ساعه صاجنا فيه بيفرحكم ..قل اخلص
مشاري التفت على يوسف والفرحه واضحه على وجهه : ابشركم نادر اخو يوسف والريم اختي عقدو قرانهم اليوم قبل صلاة الظهر
يوسف فز بفرحه وحضن باسل الي فز معاه وحضنه يبارك له ممدوح ضرب بكفه كف مشاري بسعاده
وقعد يطبل على الطاوله والفرحه ماهي سايعته
لاكن هيصة الفرح توقفت مع نفخة راكان على مشاري بغضب : خير ان شاء الله اشوف ال عامر قشو بناتنا
ممدوح رد عليه بانفعال : بناتكم اخذو ارجال من يحصلها نادر ال عامر
راكان بقهر : ومن يحصله الريم ال ماجد
باسل يفك بينهم : بس انت وياه كلهم كفو لبعض والنعم فيهم
مشاري يشد راكان بيده ويجلسه بعد مافز واقف مع سماعه للخبر : تعوذ من ابليس واقعد الرجال كفو وكلن يشهد له والريم امرها في يد ابوها دام ابوي زوج نادر مايحقلك تعترض
راكان بعصبيه : تراها بنت عمي و..
قاطعه ممدوح : بنت عمك صارت مرة ولد عمي وانتها امرها والحين انا الي اقول اقصر الهرج ولاتطري مرة ولدنا
باسل بحده : خلاص ياركان قل الله يبارك لهم
راكان شاف ان الموضوع طلع من يده تعوذ من ابليس وجلس معهم وبارك لهم ببرود ومن داخله مقهور كيف تسربن بنات عمه جاسر من بين ايدينهم من غير مايحسون
يوسف بعكس الكل ماسمح لاحد يخرب عليه فرحته بمجرد ماسمع صيحة راكان طلع من عندهم بيكلم نادر ويبارك له دامه عقد قرانه وانتهى مايهمه من يعترض ومن يبارك جلس في مدخل المطعم واتصل بنادر انفتح الخط وصاح بفرح : مبروك مبروك ايه هذي العروس الي تستاهل نادر العامر
نادر كان مجتمع مع اهله في صالة بيتهم بعد مارجعو من عقد القران فز واقف اول ماعرف صوت يوسف توه حس بطعم الفرحه من قلب : هلا هلا الله يبارك فيك هذي بركاتك انت الي عرفتنا عليهم
تجمعو اهله حوله واهم يطلبونه يفتح السبكر بيسمعون صوت يوسف....فتح نادر السبكر واهو يشوف الفرحه في وجه ابوه ..امه ...ثائر ...جواد ...وحتى غزل ....الجد يتابعهم من مكانه بسعاده واهو يدعي لاحفاده العريس الي تحت عينه والمتمرد الغائيب ...اما غرور فتحت جوالها وانشغلت فيه رغم انها ماهي شايفه والاشي من شاشة هالجوال جوارحها تعاندها بمتابعة غير الي هي بغت تتابعه ...
جاهم صوت يوسف تملاه الفرحه : اصلا انا ماختار الاالناس الفخمه
غزل بلقافه : ابشرك الفخمه الي انت اخترتها هي الي ضبطت كل شي
تسلطت عليها العيون تحذرها من انها تجيب هالسيره ابتسمت لهم بعدم اهتمام خاصه واهي تسمع جواب يوسف !
______________
غزل بلقافه : ابشرك الفخمه الي انت اخترتها هي الي ضبطت كل شي
تسلطت عليها العيون تحذرها من انها تجيب هالسيره ابتسمت لهم بعدم اهتمام خاصه واهي تسمع جواب يوسف !
: هههههه شفتو وشلون منفعتي جت مره وحده مطر مطر حتى محد يقول مامنك فايده
ضحكو اهله بسعاده واحساس لذيذ بأن ولدهم رجع لربه ودينه ينتشر في صدورهم ويمنحهم الرضى على هالولد
جواد بمزح : الله يبارك في برقٍ شق غيمتك وخلاها تمطر
يوسف برد سريع : جعلك ببرقٍ كله صواعق العن من الي جاني
غزل بمزح : بتحرقنا انت عمك براسه عاصفة صواعق يبيله غيمة يفرغ صواعقه عليها ...
يوسف شرق ضحك : هههههههه
وجواد مسك غزل بأذنها : انا كلي صواعق هاه ....
ام نادر تكلمت بشوق تقاطعهم بعد مايئست انهم يعطونها فرصه تكلم : وشلونك يايوسف وحشتني ...
واختنق صوتها بغصة ...متلهفه له ولشوفته ...ثائر
الي واقف جنبها لف يده على اكتافها وحضنها وباس راسها ومسح دموعها بيده من غير مايقول شي
يوسف حس بتغير صوت امه واختناقه حب يفرحها : انابخير يمه وشلونك عساك طيبه هاه ماودك تعتمرين وتشجعين ولدك الداشر على العمره
فرحه اكتسحت قلوبهم ...بعد طول غياب صرح لهم اخيرا انه يبي يشوفهم ماعندهم مانع يروحون له في اخر الدنيا وشلون واهو قريب في جده ....خاصه انهم مازالو خايفين من رجعته لرياض يخافون يرجع ويرجع لشلته ودشرته معهم ام نادر وابو نادر انطقو في نفس الوقت مع اختلاف كلامهم
ام نادر : ودي ودي ابجي عمره بس انت تعال
ابو نادر بلهفه : بنحجز بكره ونقابلك في المطار ونروح نعتمر كلنا سواء
يوسف اختلطت عليه الاصوات : وشو
ابو نادر اخذ الجوال من نادر وسكر السبكر : كيف حالك
: الحمد لله بخير وشلونك يبه
ابو نادر واهو يبعد يد ام نادر عن الجوال واهي تحاول تاخذه منه : الحمد لله طيبين
: مبروك زواج نادر
ابو نادر : الله يبارك فيك والعقبى لك
: ماهوب في النيه
ابو نادر : النوايا تبدل
: الله يكتب الي فيه الخير
ابونادر ارتاح قلبه ماهو متخيل ان هذا اولده الي قاعد يذكر الله بين كل كلمه والثانيه ...وجاسر يقول جميل يوسف ماتسده ارقبتي انا وبنتي اجل اناوش اقول ياجاسر عن جميلك انت وبنتك ..
:بندور لنا حجز بكره على خير ونجيك
: حياكم الله لاتحرمون للعمره خلوها الفجر بعد بكره نروح كلنا نحرم من السيل ونعتمر قبل صلاة الفجر
ابو نادر : خلاص صار خذ امك اشغلتني بتكلمك
ام نادر اخطفت الجوال من يد راشد : هلا والله بالغالي هلا حبيبي هلا بقلبي وعيوني
يوسف بضحكه من كثر ماهو فرحان بمكالمته لاهله
واحساسه انهم فاقدينه ويبونه : ههههه هلابك انتي يابعد الدنيا كلها ماني مصدق الكلام الحلو ذا كله الي تراني يوسف انا موب حبيب قلبك نويدر
ام نادر ودموعها تصب وصوتها يشرق بفرحتها
تقدمت لنادر القريب منها وصارت تربت على كتفه وتأشر له لاتصدق : نويدر جنبك ماياكل عيش بس نجامل اخوك الشايب وش نسوي
نادر ويوسف ضجو في ضحكه طويله والتعليقات انصبت على نادر خاصه من غزل وثائر ....
غرور مازالت في مكانها تكبت ابتسامتها على تعليقاتهم بالجز على اسنانها بقوه شاشة جوالها طافيه واهي مازالت تتصفح !
____________
رجع يوسف للجلسه بنفسيه ثانيه والسعاده تنطق على كل تفاصيله ...انتبه لمشاري الي لوحله بيده : مبروك يالنسيب
يوسف رد عليه بابتسامه مشرقه واهو ياخذ مكانه على الطاوله : الله يبارك فيك العقبى لك
مشاري بجديه : ولك ..انا بحجز على اقرب رحله لازم الحق على حفلتهم الليله بتخاويني
يوسف : لا اهلي هم الي بيجون عندي بكره على خير
ممدوح : من الي بيجي
يوسف التفت على ممدوح : اهلي كلهم
مشاري : دام اهلك بيجون بعطيك مفتاح بيت ابوي
استقبلهم فيه
يوسف : لا والله ماندخله باحجز لهم في فندق يحبون الفنادق هم
راكان يكلم مشاري : دامك بتحجز اليوم بحجز معك مالي نفس اضرب مشوار ل الرياض على السيارة لحالي
باسل : وسيارتك
راكان : عادي اوقفها في بيت عمي اما جاء احد من الشباب ورجع عليها ولا تشحنها لي بعدين ماني مستعجل عليها
_____________
دخل لصالة المكاتب الواسعه واهو يدندن بأغنيه غراميه خبر زواج نادر من اخت مشاري اسعده كثير.....
ابتسم اول مالفو الموضفات كلهم له لف على نفسه دوره كامله وكمل يمشي لمكتبه ويرقص في نفس الوقت ويغني اول مامر على مكتب ندى انحنى عليه يطبل واهو باقي يغني ويتمايل يترقص
ندى انبهرة برقصه وشغلت له اغنيه على جوالها
وبدت تفرقع اصابع ايدينها الثنتين واهي تمايل فيها يمين شمال ...ممدوح تحمس بزياده وكمل رقص بحرفيه عاليه والبنات كلهم اتركو الي في ايدينهم وانشدو معه يتفرجون ......انتهت الاغنيه وارتفع التصفيق من خلف ثلاثه مكاتب ....اما صاحبة المكتب الرابع كانت تتأمل رقصه بصمت اطفرة من عينها دمعه امسحتها بسرعه وارجعت تشتغل على الاب توب الي قدامها
ندى تصفق بحماس : الله الله وش الابداع ذا
ممدوح ميل على مكتبها بأبتسامه واسعه : اهم شي ادائي المتواضع اعجبك اول مره انبسط بمدح احد
والاانا مالتفت للمديح
ندى استحت ونزلت نظرها واهي تحس قلبها يضرب بين اضلوعها بقوه خافت يسمع ايقاعها المتسارع من مكانه وبهمس خجول : هذا الصدق موب قصدي مدح
اكتفى انه يتأملها بنظره جرئيه
اسماء اضربت بقلمها على سطح المكتب عدة مراة تلفت انتباههم ولمى التفتو عليها تكلمت : هي هي خير خير وين عايشين ياساده ترا ذا اسمه مكتب عمل ....وشو عمل ...واضحه الكلمه والااشرحها
التفت عليها ممدوح بكل جسمه وتكى على مكتب
ندى بحيث صارت ورى ظهره وماتشوف تعابير وجهه غمز ل اسماء بعينه بخبث ورد برواقه : ماله داعي الشرح نفهمها واهي طايره
في هالاثناء احد الموظفين مد راسه مع الباب : وش الازعاج ذا وين عايشين
ممدوح بتبرير سريع : كنا نشوف عرض ازياء مهم
الموظف : طيب لاتعودونها علشان ماتلقون المدير على رؤسكم
ممدوح بتصريف : ابشر
قاله وراح جلس على مكتبه وسرح في وضعه داخل هالشركه ماسوى فيه خير يوسف يوم جابه بين هالبنات ....يحاول يفصل بين مهمته وافتتانه القوي بالبنات ويبدو انه فشل في هالشي ...من مده تارك البنات والسهرات والخراب ... لازم يكون
قد التحدي ويستمر في الطريق الصح ....لف براسه
في المكتب ورجع يفكر ..بس كيف وباقة هالورد محاصرتني ...يامتى اخلص من هالسالفه المشكله كلهم يثيرون الشك ولاني لاقي اي دليل على اي وحده فيهم زفر بضيق ورفع راسه يشوف وش يسوون شاف لما قامت واطلعت ماقدر يلحقها خاف يشكون من كثرة طلعاته كل ماطلعت وحده منهم ...قام واقف وتقدم لمكتب ندى جلس على طرفه : اقول بنات لما ليه دايم الحالها وماتسولف وكلامها معنا على قد الشغل واقل
صمود التفتت عليه : نفسيه بعيد عنك
ندى التفتت لصمود : قصدك حزينه احس عندها مشاكل اسريه
اسماء انهت التكهنات بكلامها : ارمله زوجها مات في حادث واهي تصرف على اعيالها وساكنه في شقه اجار قريب من اهلها وطبعا هي الي تدفع الاجار
ندى لفت ل اسماء : وانتي وش دراك
اسماء : لقيتها مره تبكي وقت البريك وسئلتها قالت الاجار حل وماعندها تدفع
صمود باستنكار : بلاش ادراما رواتبنا كبيره وتقدر تستاجر شقه فخمه وتعيش اعيالها احسن عيشه
اسماء اندمجت في السالفه ونست انها قاعده تتكلم عن اسرار وحده مأمنتها سرها : هذا لوماكان عليها ديون تخيلو كانت ماخذه قرض او سياره من بنك المهم انها ماخذه مبلغ وقدره علشان تساهم مع اخوانها في بناء بيت العائله وفي النهايه اخوانها
كل واحد طلع له شقه في هالبيت واهي طلعت بلوشي ولمى بغت تسكن مع امها وخواتها في الدور الاول قالو مانستقبل اعيالك خليهم عند اهلهم وتعالي وانكرو فلوسها الي ادفعتها يقولون دفعتيها لابوك الله يرحمه ماهو لنا
ممدوح توسعت عيونه ضروفها ممكن تكون وسيلة ضغط عليها علشان توفر فلوس القرض لو بطرق غير مشروعه تكلم بأسف : الله يفرج عنها
الموظفات : امين
__________________
واقف بين العمال في موقع المشروع يأشر لسائق
الشاحنه الكبيره علشان ينزل حملة الرمل في المكان المناسب : تيامن تيامن ....ايه بس بس ..ارجع ورى
جاه صوت صقر يناديه بعيد عن تجمع المعدات والعمال : سياف تعال هنا ..تعال ياولد
سياف صاح بصوت عالي عشان يسمعه : جاي
التفت على احد العمال وقاله يوجه سائق الشاحنه بداله وراح لصقر
وصل لصقر الي كان واقف ومشغول بالجوال : خير وش بغيت
صقر رفع راسه له وبجديه : ال عامر اخذو بنت عمك لولدهم
سياف توسعت عيونه باستنكار : وشهو !
______________________
البارت الاربعين
وصل لصقر الي كان واقف ومشغول بالجوال : خير وش بغيت
صقر رفع راسه له وبجديه : ال عامر اخذو بنت عمك لولدهم
سياف توسعت عيونه باستنكار : وشهو !
وبصرخه : وعمي وشلون يردها للكلب ذا !
صقر استوعب انه فاهم غلط : نادر والريم وين راح تفكيرك انت
تنهد بارتياح : طيب تكلم مثل الناس ...الله يبارك لهم نادر كفو ويستاهل ماهو مثل السمرمدي اخوه
صقر بعدم رضى : ماهو مثل السمرمدي اخوه والا ماهيب بروق
سياف بصدق : كلها
صقر بضيق : ماتوقعت ان جاسر يسحب علينا كذا في تزويج بناته والا كأنا اخوانه والمفروض يشاورنا على الاقل يعطينا خبر بالخطبه ماهوب بعد مايتملكون ويخلصون يبلغنا مثلنا مثل الغرب
سياف يفك لطمته ويرجع يلفها من جديد عن الغبار
الناتج من شغل المعدات : اكيد انه ماسوى كذا الاعلشان محد يتدخل
صقر بغيض : الي قاهرني انه الريم مافكرة تشاورني
سياف بعدم مبالاه : ومن متى الريم تشاورك في شي ...اخبر الي قريبه منك بروق
صقر بتفكير : صحيح انها ماهي قريبه مني حيل مثل بروق بس كنت متوقع انها اذا انخطبت بتلف على العائله كلها تسئلهم عن رايهم الريم حساسه وهاديه ومرات احسها ضعيفه
سياف بسخريه : هه مافي اعيال جاسر احد يسئل احد عن الي يبي يسويه يمكن يتشاورون بينهم بس في النهايه كل واحد منهم يسوي الي يبي اما انها ضعيفه تطمن جاسر مايربي ضعوف
صقر ابتسم : اتوقع كل عايلتنا كذا ماهو بس اعيال جاسر ماذكر بينا مستضعفين
سياف بسخريه : اجل لاتسوي نفسك مدار الكون وان الكل بيجون يسئلونك
صقر كشر بغيض : ياخي حاس بغبينه حازه في نفسي وبقوه مدري ليه الريم بالذات كنت منتضر انها تشاورني في زواجها
سياف بمزح : خلاص ردلها الحركه والاتعلمها بزواجك لين تملك
صقر بمزح مماثل : تصدق انا مفهين عمرنا راح وحنا مافكرنا نتزوج
سياف بحسره : انت المفهي انا كنت انتضر بنت اخوك تخلص دراسه واسحبت علي قبل حتى تبدا دراستها
________________
صب فنجان القهوه ومده لابو سياف بابتسامه رغم ان ابو سياف مكشر ...اخذ الفنجان من يد جاسر وناظر في عيونه مباشره : صرنا نسمع بزواج بناتك مثل الغرب ياجاسر
جاسر بثقه : انا افداك من قال انكم مثل الغرب اول ماتمت الملكه بلغتكم على طول
ابو سياف بعدم رضا : وليه ماعلمتنا من الخطبه
جاسر شاف ان الزعل حاصل حاصل جابها كاش
: وليش اعلمكم عن الخطبه كل واحد ادرى بمصلحة بناته
ابو سياف بحده : وكان اعيال عمها لهم خاطر فيها
جاسر بنفس الحده : البنت باقي لها ترم وتخرج من الجامعه كل هالوقت ماشافوها اعيال عمها ثم انا سئلت الريم وقالت ماتبي احد من اعيال عمامها
ودامها هي ماتبيهم انتهينا وماعاد يهمني من يبيها دامها اخذت الي هي تبي
سيف بقهر وكل الي حاره ان الي اخذها اخو يوسف الي اخذ بروق عن اخوه : وش زوده عنا علشان الريم تبديه
جاسر التفت على سيف بهدوء وابتسامه مستفزه :
انت لوانك خاطبها رديتك من دون لااشاورها
فز سيف بغضب وصرخ على عمه : وانا وش ناقصني علشان ترفضني
جاسر دفه بكفه مع صدره وطاح جالس على الكنب مكان ماكان : صوتك ماترفعه علي لاقص السانك ثم اذا تخرجت بعد سته شهور واسست نفسك بعد كم سنه فوقها بذاك الوقت تقدم لبنات الناس واخطب
ابوسياف ماقدر يرد على كلام جاسر بعد مااولده قل ادبه ورفع صوته عليه التفت على سيف وانهره بغلضه : قم حب على راس عمك واعتذر منه ماعاد فيه لاحيا والاحشيمه ماغير واحدكم ينافخ على الي اكبر منه كأنه اصغر اعياله
سيف كبت غضبه وقام باس جاسر على راسه ومن غير نفس : اسف طال عمرك السموحه
جاسر اسحبه بيده واحضنه بحب واهو يربت على ظهره بيمناه : مسموح مازعل من الغالين انا
سيف تفشل سالفة ان ال عامر اخذو بروق من سياف والحين اخذو الريم رغم انهم ماصانو الي قبلها هالشي قاهره وحارق قلبه بس بعد مايحقله يتجاوز حدوده مع عمه....سحب نفسه من حضن عمه وباس خشمه وراسه : والله ياعمي لوما غلاك مانزعل ان بنتك راحت لنفس الناس الي فرطو في اختها قبل كم شهر
جاسر يربت على متن سيف بتشجيع : كفو البناخي الي يخاف على بنت عمه بس لونك مفكرن فيها شوي بتعرف ان عمك مايفرط في بنته والايعطيها الا الي يستاهلها ويوسف كلنا نعرف ظروف زواجه من بروق لاكن الريم مافيه شي يحدنا نعطيها احد الاان كان يستاهلها ونادر رجال كفو واهله اجواد وبروق الي انت تقول انهم فرطو فيها هي اول من زكاه ومدح اخلاقه ولاجوزته على مديحها ..انا بنفسي ناشدن عنه وباحثن وراه ولالقيت الاكل خير
سيف زالت الحرقه الي في قلبه بعد كلام عمه وحس انه غلط يوم تدخل في شي مايخصه لاهو كان ناوي يخطب الريم والاحتى اخوه يبيها ابتسم لعمه بحرج : مبروك زواج الريم ياعمي
جاسر ابتسم بسعاده : الله يبارك فيك والعقبى لك
سيف بمزح : تو الناس باقي الست شهور وفوقها كم سنه
جاسر بضحكة :هه بيسرها الله
ابو سياف بجديه : انت تقصيت عن الرجال زين اخاف ننخدع فيه مثل مانخدعنا باخوه
جاسر جلس جنب ابو سياف وربت على فخذه بيده
: لاتخاف تخبر يوم جانا خبر يوسف هاك الحين ماخليت والابقيت احد من عائيلتهم مانبشت وراه لارجال ولاحرمه لاكبير ولاصغير والناس اجواد وفيهم خير ماشذ عنهم غير يوسف والحمد لله هداه ربي الله يثبته على طريق الحق
__________________________
اطلعت من دورة المياه ومشت راجعه لمكتبها ولمى مرة من خلف المكتب الخالي والي كان سابقا لميار اسحبت الكرسي واجلست عليه وصارت تدور بالكرسي يمين يسار : بنات ماكأنهم تأخرو مااعلنو عن وظيفة ميار تتوقعون ناوين يرجعونها والابيلغون وضيفتها خير شر ويكتفون فينا
هاجر ماقدرت تخفي وناستها بانهم تخلصو من ميار كانت انسانه وقحه ومزعجه قامت من مكانها واهي تحس جسمها متيبس من طول الجلسه على الكرسي تقدمت ل غاده ولفت الكرسي يمها عشان تشوف وجهها واهي تكلم معها : شكلي بأنقل للمكتب ذا قبل لايجي وحده جديده تاخذه
غاده بمزح : لازم تاخذين اذن ميس دامها بتقابل خشتك
هاجر ماكان عندها نيه تبدل مكتبها فعلا بس تتسلا بالسوالف التفتت على ميس وشافتها مشغوله وماهي معهم اشرت ل غاده باسكتي وراحت لميس واهي ناويه تلف الكرسي الي هي جالسه عليه بحيث تاخذ لفه كامله على نفسها تقدمت لها واهي تتخيل ردت فعلها لمى تفجعها امسكت حافة الكرسي وانتبهت لها ميس على طول وخمت لاب تبها خبطت بشاشته على لوحة مفاتيحه مسكرته بحركه سريعه وعنيفه خلت هاجر وغاده يتسمرون من الدهشه هاجر انتفضت مكانها واول ماخطر على بالها الخيانه لا ياربي لا دخيلك لاتكون وحده من زميلاتي خاينه ابلعت ريقها بصعوبه وتكلمت بشك
: وش فيك ليه خفتي ليه سكرتي الجهاز كذا
ميس لفت عليها بانفعال وربكه : انتي وشلون تلقفين على جهازي كذا وش صنف التجسس ذا
هاجر عصبت : هي هيه انتي خير وش تجسسه الي تكلمين عنه كنت بالف الكرسي حقك بس وش هالي خايفه اشوفه
غاده بعد مابلعت الصدمه : وش ذا ميس وش مهببه في الجهاز عشان تطبقينه كذا
ميس اوقفت بعصبيه ودفت هاجر مع كتفها : اقول وخري زين مالكم دخل في خصوصياتي
صرخت غاده بانفعال واهي تفز واقفه : خصوصياتك ياهانم في بيتكم هنا خصوصيات الشغل وبس
ميس ميلت جسمها قدام اشوي تقرب وجهها لغاده
: هذا انتي قلتيها خصوصيات شغل وشغلي مسؤليتي الحالي ماهو من حقك تلقفين فيه
هاجر بحزم : بس حنا فريق واحد وعملنا مشترك
ميس التفتت عليها بعصبيه : قصدك افتح جهازي واسلمك اياه عشانا فريق واحد
هاجر حست ان انفعالها الزايد بيخرب الدنيا لوكانت ميس هي الخاينه فعلا لفت راجعه لمكتبها وبنبرة اعتذار : لا العفو موقصدي بس كل الموضوع انا استغربنا الطريقه الي سكرتي فيها الجهاز وبس
ميس ازفرة بغيض وانطقت الكلمات ببطء واهي تشدد على حروفها : مالك علاقه
غاده وهاجر ناظرو في بعض باستنكار لتصرفها
وتكلمت هاجر تسكر الموضوع : عن الوظيفه يمكن مااعلنو عنها علشان المدير مسافر
غاده قررت تمشي مع هاجر في تجاهل تصرف ميس الغريب : وش دخل سفر المدير الي يقابل الموظفات لجنة الترشيحات والقبول و اهي مكونه من ثلاثه موظفين من قسمنا موظفه ومن قسم التصميم ثنتين ومديرة قسمنا والاستاذ باسل هذا اذا الموظفين المطلوبين لقسمنا او قسم التصميم
غاده ميلت راسها على كفها واذراعها منتصبه على الطاوله : صح ....لايكون ناوين يحطون احد من قريباتهم من غير مفاضله والا شي
ميس حست انها اثارة شكوك زميلاتها فيها من غير داعي وزعلتهن منها في نفس الوقت حبت تلطف الجو بينهم وادخلت في المناقشه : لاتستبعدين هذا هم موظفين المصمم الجديد من غير اعلان والامفاضله والاهو يحزنون اقص يدي ان ماكان يقرب لهم او على الأقل صديق باسل او حتى ابوه صديق المدير خاصه انه واحد مستهتر واتفه مايشوف انظمة الشركه
هاجر بحذر وكل خوفها تكون كاشفه ممدوح : من قال انه مستهتر
ميس ميلت قدام اشوي تزعم الانسجام في السالفه
حتى تنسيهن سالفتها : كم مره اشوفه يدخن في السيب الي قدام قسمنا
غاده قالت الي في خاطر هاجر : حتى لودخن موب معناته يقرب لاصحاب الشركه ويمكن مايدرون انه يدخن داخل الشركه من اساسه
هاجر بتمويه : ترا التدخين يعتبرونه حاجه تافهه ومايشددون عليها كم مره اشوف موضفين غيره يدخنون في الممرات ولاحد قالهم شي
ميس : خلي التدخين البنات يقولون انه يقعد يسولف ويستهبل عليهم اكثر مما يشتغل هذا اذا كان يشتغل من اساسه
غاده كشرة بغيض : وليه مايشتكونه ويخلونه يتادب
ميس تهز اكتافها بمدري : يمكن علشان توقعو انه يقرب للمدير قالو الشكوى ماهي جايبه همها
هاجر بصدق : بالعكس مديرنا مايجامل في الشغل وانتم شفتو ان اولده ماعاد عتب قسمنا ولاعاتبني على الشكوى الي قدمتها والاشي بالعكس انتم شفتوه يوم جاء لمكتبنا وقال اي شي يضايقكم تجون لمكتبي على طول
غاده بزهق من السالفه : في حريقه كلهم كلن عقله في راسه ويعرف خلاصه
هاجر ارفعت ساعتها لعينها : بنات وقت البريك انا بروح لاستراحت الموظفين العامه الكوفي اهناك احسن وخيارات الاكل في البوفيه اكثر
ميس بسخريه : والله والاكل ترا كلها سندوتشات
هاجر : الحمد لله نعمه
غاده ارجعت لمكتبها : روحي واطلبيلي معك انا بسكر ملفاتي والحقك
واجلست تشتغل على جهازها
ميس ارجعت تفتح الاب توب حقها : انا بطلب اكلي هنا
هاجر اطلعت من عندهم وطلعت جوالها واهي متجهه للمصعد وبدت تكتب تقريرها عن الي صار وترسله لقروب الواتساب واكدت على تحذيرها من كون ممدوح مشكوك في وظعه بسبب الطريقه الي توظف فيها
_________________________
خلصت من زينتها وارفعت راسها لديما الي واقفه جنبها تعيد على الروج حقها : ديومه الناس كثير تحت
ديما تقرب وجهها من المرايه اكثر : اش
الريم عقدت حواجبها ومدة يدها تهز ديما :وش اش
ديما ابعدت الروج عن شفايفها بحنق والتفتت على الريم : ماتشوفيني اضبط روجي خليني اركز ماحب احد يتكلم معي وانا مركزه في شي
الريم ماسكتها بيدها : علميني قبل ثم ركزي على كيفك
ديما تتكلم بسرعه عشان ترجع تضبط روجها : مافيه الاعمامك وخوالك واهل المعرس ..بس تعالي
ليه ماسويتي كوشه
الريم اخذت الشعر الي نزل على وجهها ورجعته ورى اذنها : كفايه كوشه وحده يوم العرس اذا الحين بزبط كوشه واتكلف على الفستان والميكب وش بقى للعرس
ديما لفت عليها بكامل جسمها واتكت على التسريحه الي وراها : كل البنات يسوون كذا وش ناقصك انتي حتى ماتسوين كوشتين وتدلعين نفسك وبعدين فستانك مره ناعم ماحسه فستان ملكه
الريم اوقفت تناظر في شكلها على مراية التسريحه
شعرها استريت مكياجها ناعم مره والاكنها حاطه شي فستانها دانتيل ضيق باكمام طويله وفتحة الصدر ملتفه على الاكتاف بدون اي شي اضافي مجرد ان خامة الدانتيل ونقوشه فخمه من غير لاشك والاكرستال دانتيل خالص : خلي عنك فستان ملكه والافستان زواج هو حلو والالا
ديما تتأملها بأعجاب : حلو وبس يجنن بس يفوز بأنعم فستان في الحفله كلها
الريم ابتسمت : وهذا المطلوب
افتحت عليهم بروق الباب : يالله ياعروسه الزفه
ديما التفتت على بروق : كيف بتسوون زفه ومافيه كوشه
بروق واقفه ورى الريم تعدل شعرها : عادي مجهزين لها الكنبه الي في صدر الصاله وحاطين قدامها طاوله مزينه بالورد الطبيعي وبعدين هي ماراح تطول عند الحريم يادوب يسلمون عليها وتطلع للمجلس الجانبي عشان العريس يلبسها الشبكه
ديما ماكانت حابه ان ملكة الريم تكون بالتنسيق البسيط ذا كان ودها تكون مجهزه على افخم مستوى تكلمت بزعل : حتى المجلس مافيه كوشه
ويادوب رازين قدامهم طاوله متروسه ورد
بروق بابتسامه : صدقيني الترتيبات رايقه وجميله
انتي من اليوم هنا وماشفتي شي من التجهيزات
دخلت عليهم غرور : بنات ننزل وراها والا نخليها تنزل لوحدها
بروق : لا بتنزل وحدها
ديما :اجل خل ننزل حنا قبلها
انزلو البنات وبقت الريم لوحدها فوق قريب من راس الدرج اخذت نفس عميق واهي تسمع صوت زفة الشعر تبدا والاضواء تتسلط على اعلى الدرج
تحركت بخطوات بطيئه ماسكه بين ايدينها جوريه وحده مزين ساقها القصير بالدانتيل انزلت تتهادى
بنعومه ورقه والمصوره تلتقط لها الصور لحد ماوصلت لنهاية الدرج وهنا بدت اغنية الزفه
اوقفت للحظه تاخذ نفس عميق واهي حدها مستحيه وتحس العيون كلها عليها واصلت طريقها لصدر المجلس لحد ماستقرت على الكنبه المجهزه
لها ...ارجعت الانوار من جديد وبدو اقاربها يسلمون عليها ويباركون ...ثم انتقلت للمجلس مع امها وخواتها وعماتها ودخل عندها ابوها ورعد باركو لها
واطلعو ورعد طلب منهم يلبسون عبيهم علشان يدخل العريس كانو مجهزين العبايات من قبل والبسوها عندها وبروق نادت ام العريس وخواته
.... دخل نادر لابس ثوب ابيض وشماغ احمر رغم ان الجو مازال بارد ...ابتسم واهو يشوف عروسته منزله راسها وواضح انها مستحيه تقدم مع رعد وعيونه ماهي شايفه احد غيرها وصلو عندها وتقدم رعد خطوه مسكها بيدينها ووقفها اخذ يدها اليمين وحطها بوسط كف نادر هذي ريومتنا الغاليه لوتلف العالم كله ماتلقى مثلها جاهم صوت مشاري من ورى مسوي فيها معصب : خير خير تسلمه ريمي من وراي
نادر وقف جنب الريم واهو شاد على يدها في يده
ومبتسم على كلام رعد : خير انت هذي ريمي انا ماعادهي بريمك
والتفت لرعد يرد على كلامه : مايحتاج تمدح النادر مايخذ الانادره مثله
ارتفع صوت الهمس والوشوشه بين الحريم بعد تعليق نادر
والريم استحت ونزلت راسها اكثر وتحس جسمها سخن من مسكته لها ووقفته جنبها
مشاري تقدم لها حضنها وباس جبينها : الف مبروك ريمي
الريم ارفعت راسها لأخوها وابتسمت له ابتسامه صغيره وارجعت تنزل راسها من غير ماترد
نادر شاف وش كثر اهي مستحيه ناظر في مشاري
: وش رايك تاخذ اخوك وتوروناعرض اكتافكم
مشاري مسكه بيده بمزح : لا وانت الصادق بناخذك معنا
رعد بضحكه : هه صادق مشاري شفت العروسه ولحد هنا كافي عليك امش اطلع
ام مشاري تقدمت لهم اسحبت كل واحد منهم بيد
: انتم الي اطلعو ازعجتونا
نادر اتسعت ابتسامته : كفو خالتي عليك ابهم
مشاري ورعد مشو مع امهم واهم يسولفون معها
لحد ماطلعتهم من المجلس وارجعت ...
غرور وغزل وامهم نزلو عباياتهم وتقدمو لنادر والريم باركو لهم ..
ام نادر قربت له الشبكه الالماس عشان يلبس عروسته اخذ الخاتم لبسها ولبسته ..مد يده بياخذ
العقد واسبقته غرور : كافي عليك الخاتم انا بلبسها العقد
الريم تنهدة بأرتياح ان غرور هي الي بتلبسها موب نادر ...حس بتنهيدتها وميل عليها همس في اذنها
بطردهم الحين
الريم بدت تفرك غصن الورده بتوتر ...غرور لبستها العقد وغزل وبروق اخذو الحلق ...غزل ابتسمت لنادر بنذاله : وحنا بنلبسها الحلق
قالته وقربت ل الريم تلبسها من الجهه الي يم نادر وبروق لبستها الي من الجهه الثانيه
بروق بضحكه : ههه باقي الاسواره من بيلبسها
نادر سحب الاسوره من الاستاند : عطيتكم وجه
لبسها وتصورو مع امه وخواته واطلعو واتركوهم الحالهم .....
_________________
دخل ل المطعم الفخم واهو يشوف الدهشه على وجه يوسف وممدوح وقف ولف عليهم : وش فيكم تسمرتو ابتسم يوسف بسعاده واهو يأشر على الشاشه الي تعرض صور نادر وبعدها عبارات تهنئه الف مبروك عقد قران سعيد ،افراح ال عامر وال ماجد ، نادر &الريم عقد قران مبارك كانت الشاشه تعرض صوره لنادر ثم عبارة تهنئه ثم صوره ثانيه وبعدها تهنئه بالتتابع ..الشاشه معلقه على جدار المدخل المقابل للباب مباشره والمدخل كله مزين بالبوالين والورد الطبيعي : وش ذا باسل حضن يوسف بفرحه : الف مبروك والعقبى لك يوسف شد عليه كان صدره ضايق لأنه ماحضر فرحة اخوه لكن الحين يحس انه شارك في الاحتفال حتى لو من بعيد : الله يبارك فيك والله يكتب لك الي تتمناها باسل بحماس :امين يارب ممدوح حضن يوسف وبارك له وادخلو ل الركن المجهز للاحتفال والي كان مفتوح على المطعم كله كان فيه شاشة عرض كبيره مثبته على الجدار المقابل لجلستهم تعرض لقطات الحفل من سناب رعد وثائر وباقي الشباب وهم بعد ماقصرو وبدويصورون احتفالهم الصغير اسناب ...باسل كان متفق مع المطعم انهم يوزعون قهوه وتشوكلت وانواع مختلفه من العصاير والكيك على حضور المطعم على حسابه والشباب بس اعرفو ان اخ العريس ماقدر يحضر حفلة اخوه التفو عليهم وشاركوهم الفرحه والاحتفال ...وانقلب جو المطعم الشبابي لهيصه واحتفال استثنائي ....... _________________ رفع راسه لباسل ورد بعصبيه : ياسلام وليه ماتروح تهزأه انت تدري ان اموري انا وياه هاليومين ماهي هذاك الزود باسل ارتكى على مكتب يوسف بيدينه : انا علاقتي بالرجال محدوده ومستحي اروح اسبه قدام الخلق واهو تاركن اهله واشغاله وجاي يقدملي خدمه مهوب ملزوم فيها يوسف بمحاولت اقناع : عادي انت معلمه بكلام هاجر وان الموظفين شاكين في وضعه وقايله انا بنغسل اشراعه اليوم باسل بحزم : انا مستحيل اتلفظ عليه حتى لويطلع من الشركه بدون مانوصل لشي يوسف قام من ورى مكتبه : لاوعلى وش يطلع من الشركه قبل نعرف شي يبشر بالسب الي يبرد قلب كل مغتاض راح يوسف لقسم التصميم ودخل مع الباب وشاف ممدوح جالس يطقطق على جواله والموظفات يشتغلون تقدم لمكتب ممدوح وبدو ينتبهون لوجوده ممدوح عارف السالفه بس انصدم ان الي جاء يوسف موب باسل نزل الجوال على المكتب يمثل الارتباك يوسف مدله يده : اقدر اشوف الجوال ممدوح حس بغيض من كلامه بس اضطر يلعب الدور ل النهايه قام واقف وتكلم بأحترام : جوالي شي شخصي ماهو من حقك تشوفه يوسف صفق بطريقه مسرحيه : لابرافو عليك تعرف الحقوق وقتك هنا ياستاذ يامحترم ملك لشركه وماهو من حقك تقضيه على خصوصياتك ممدوح ناظر في الموظفات شافهن يراقبن الي يصير نزل راسه بأحراج ماهو متعود احد ينافخ عليه ويسكت بس مضطر يمثل دور الموظف الي خايف يفقد وظيفته تكلم بهدوء : طال عمرك انتم طالبين مني عدد محدد من التصاميم وانا عندي مجموعة تصاميم جاهزه علشان كذا ماكان عندي شي اسويه يوسف بالقوه منع نفسه لايضحك على سالفة طويل العمر تكلم بنفخه : بس حنا نبي تصاميم خاصه بالشركه ممدوح وده يصفقه وكابت في نفسه : التصاميم الي عندي من تصميمي ولااطلع عليها احد يعني بتكون خاصه بالشركه يوسف بعصبيه مالها داعي : حتى ولو حرك يدك صمم غيرها موب لازم تلتزم بالعدد المطلوب ويكون في علمك هذا مكان عمل محترم سوالف فاضيه قلت ادب مانبي وياليت تتذكر انك مابعد ثبت على الوظيفه وياسهل مانطيرك من مكانك ممدوح هز راسه بأستسلام ومن داخله يتوعد بيوسف : ان شاء الله يوسف استدار طالع من المكتب واهو يمشي نفخ بكلمتين : ناس قليلة حياء ماتجي الابالعين الحمراء ممدوح ماعاد فيه صبر تلفت على مكتبه يدور شي يحذفه فيه شاف اقلمه واحذفه بقوه ورى يوسف بس ذاك زيد طلع ندى بتهكم : احمد ربك انه طلع والاكان تنفصل بدون نقاش ممدوح تجاهل كلامها واهو يتكتف ويلف بنظراته بينهن : الحين ابي اعرف من مشتكيه علي ندى ارفعت يدها : انا مااشتكيت على احد ممدوح لف وجهه جهة اسماء اعرفت انه يوجه لها السؤال ردت : والا انا التفت على صمود ارفعت يدها زي ندى :مهوب انا بس اشهد ان الي سواها سبقني ولوالمدير متأخر اشوي كان رحتله بنفسي ممدوح فك ايدينه الي كان مكتفها والتفت بكل جسمه يمها : وليه ان شاء الله تشتكيني ماتعرفين ان الشكوى علي ممكن تطيرني من مكاني زي السلام عليكم خاصه ان ابوي حفيِ لين جابلي هالوظيفه بالواسطات وبعد عنى تكرم ووظفني حضرة المديرولابعد الباشا اولده مهوب عاجبه ويدور علي الزله .. صمود حست بالذنب في النهايه ماتبي تكون سبب في قطع رزقه : اسفه والله اسفه مافكرة انها ممكن توصل لقطع الارزاق بس والله مهوب انا الي اشتكى صح كنت ناويه بس في النهايه ماشتكيت ممدوح التفت على لما وبحده : مابقى الاانتي يالما لما بكذب واهي تتمنى انه ينفصل من جد : ايه انا واذا ماتسنعت وقضبت ارضك بقدم فيك كل يوم شكوى ممدوح توسعت عيونه من الكذبه واهو عارف انه محد اشتكى : وانا وش ضريتك فيه علشان تشتكيني وبعدين عندك علي ماخذ قوليلي انا مايحتاج تروحين للإداره ترا ماني بزر واقدر احل مشاكلي بنفسي لما بجديه : حلو معناته خلك في حالك ولاتنسى انا بنات هنا ماتربطنا فيك اي صله مهوب اخوياك في الديوانيه ممدوح نزل راسه بتفكير ورجع ارفعه : حلو منطق برظه اوكي انا اسف يابنات توني انتبه اني براء الديوانيه وراح جلس على مكتبه وفتح لاب توبه يازعم انه يشتغل ____________________ استقبل اهله في المطار هو وممدوح وباسل ماكان يدري انه مشتاق لهم هالقد اندفع لابوه بشوق وضمه وباس خشمه وراسه وحس بغصه في حلقه واهو لأول مره يحس انه عاق لوالديه كان يرمي اسباب خرابه على ابوه ونسي انه رجال طول بعرض ومسؤل عن نفسه ارتخى على اكفوف ابوه وباسها واطفرة من عيونه دموع الندم : تكفى يبه سامحني ممدوح وباسل تأثرو من منظر الانكسار الي ظهر فيه وابعدو عنه يسلمون على جده والشباب علشان مايحرجونه راشد اسحبه لصدره واهو يحس انه استرد اولده اخيرا بادله القبلاة على وجهه واهو يربت على ظهره بيده : مسموح يابوك مسموح المهم انك رجعتلي يوسف الي ابي صد باسل واهو ماسك يد نادر اخر واحد سلم عليه بعد ماشاف المشهد يتكرر بين يوسف والجد ومع الام باكثر عاطفه وبكى قوي من الام وهذا الي اوجع باسل مايقدر على دموع الأمهات : اخوك البزر متى بيخلص اصياح نادر ابتسم : شكلك خايف تشاركه الدموع باسل سحب نادر يقدمه ليوسف : اقول رح اخذ نصيبك من العياط (البكى على قولة اخوانا المصريين ) سلم عليهم واحد واحد ابوه جده امه جواد نادر ثاير غزل ...ومع كل واحد يتجدد الشوق في صدره وكأنه غاب عنهم اسنين كان يضن انهم اشخاص عاديين في حياته ومالهم ذيك الأهميه لاكن شوفته الهم بعد هالغياب علمه انهم القلب والروح ومعنى الحياة وقيمة وجوده ومعناه سعيد بشوفتهم سعيد لدرجه يحس كل خليه في جسمه تصرخ احبكم احبكم اكثر من مما تتخيلون احبكم بكل قطره في دمي احبكم ... تقدم ل غرور الي لاحظ تباعدها عنه وكأنها تتهرب من سلامه تقدم لها واخذ يمناها من جنبها سلم عليها بالخد واهي بادلته السلام ببرود مسك يدها بيدينه الثنتين يشوف اثر جريمته فيها شاف اثر الجرح باقي منه مقدار ظ،سم مسوي ندبه واظحه في اعلى كفها اول مكان طاحت عليه السكين ..تمنى لو السكين صابت ارقبة بروق ولاجت في يدها ..رفع كفها لفمه وباسها على مكان الجرح وهمس لها بتأثر : انا اسف سامحيني غرور صدت تخفي تأثرها وردة عليه بحده : رح اعتذر للي كنت بتذبحها يوسف شد على يدها : شفتها قبل اشوفك والاطرى في بالي اعتذر لها وبتموت ماعتذرت لها غرور ردت عليه بتهكم وغصه قويه تعترض في حلقها : يقالها مخطيتن عليك تراها ماسوت شي الاانها قرت لك تاريخك فماهو ذنبها ذا كانت صفحتك سوداء يوسف حس كلامها طعنه مسمومه بوسط قلبه تسمر قدامها مايدري بوش يرد عليها غزل الي اسمعت الحوار انقهرت من غرور والدراما السودا الي سوتها اسحبت يوسف بذراعه بمزح ومشته معها واهم يشوفون باسل وممدوح ونادر يمشون قدامهم بمسافه اشرة على باسل بضحكه : ههه وراك مخاوي شايب شعره ابيض قلو الشباب يوسف عرف انها تحاول تطلعه من الجو الي دخلته فيه غرور ابتسم لها بمجامله : اهل جده عندهم الناس بالمقلوب الشباب شعرهم ابيض والشيبان شعرهم اسود غزل ضحكت تشجعه يوسع صدره : ههههه يمه منهم اجل ارجع لنا بسرعه قبل يقلب شعرك ابيض ________________ جلس على الكرسي وعينه على خزام الي يفصل بينهم المكتب الضخم تكلم باستغراب : انت اليوم مانك بخالي ماغير توزع ابتسامات مدري وش وراها خزام ميل جذعه على المكتب يقرب لهزاع وبابتسامه واسعه : احزر وش صار هزاع هز راسه بمدري : قلي انت وش صار خزام بوناسه : عروستي المستقبليه سجلت في الجامعه قسم أدارة اعمال هزاع تغير وجهه بغضب : صاحي انت تطيرها من قانون لادارة اعمال باي حق وبصفتك وشو خزام كشر بعدم رضا على انفعال هزاع : بصفتي زوجها المستقبلي وتراها هي الي اختارة ادارة الاعمال موب انا ولونها مختاره القانون كان حطيتها في اخس تخصص علشان لاتخرجت ماتلقى وظيفه هزاع ضرب المكتب بقبضته بغضب : ياخي انت من وشو مخلوق وش حاجتك في وظيفتها خلها توظف وين ماتبي هذا انت تشتغل في مهنتين وامك تشتغل وخالتك تشتغل وش معنى هي خزام نفخ بعصبيه : قلت لو ..لو اختارة القانون واهي اختارة ادارة الاعمال خلاص تحمد ربها انها تلاحقت عمرها هزاع بغضب : خزام تصرفاتك هذي بتجني عليك ترا البنت ماهي زي مانت متوهم تجرها وراك مثل الصخله واهي تهز راسها بابشر وسم لاياحبيبي هذي تاكلك مغمضه فلا تحلم كثير خزام عقد حواجبه واهو متحسف انه قال لهزاع : ومن قال اني ابيها صخله بالعكس انا مايجوزلي الا ترويض المهره الجموح وعلى قولة ابونوره يامدور الهين ترا الكايد احلى هزاع عصب زياده صاح في وجهه : الي تسويه مهوب ترويض ياحضرت هذي تصرفات واحد جبان خايف من المواجهه خزام فز واقف بغضب :ولدك ياعدي انا تقول عني جبان ...انت اكثر واحد يعرف اني ماتردد في مواجه احد هالمره تبيني اخاف من مواجه بنت وبعدين ترا ماصار شي كلها سوالف البنت سجلت واختارة التخصص الي تبي من راسها ولمى قلت اني باغير تخصصها فهذا لانا باقي ماتزوجنا ومافيه مجال اتكلم معها هزاع توسعت عيونه باستغراب : احلف بس وليه ان شاء الله حاط ان زواجك منها امر منتهي وخالصين منه خزام باستغراب اكبر : وليه مانكون خالصين منه عبالك بترفضني انا هزاع بغيض : ترا مهوب علشانها مطلقه بتفرح باول واحد يتقدم لها خزام بغضب : وانا ماقلته علشانها مطلقه ....بنات البنوت يتمنني هزاع تمنى بصدق انها ترفضه على هالغرور الي فيه بس احتفظ بأمنيته لنفسه موب ناقص يكسر المحل على راسه وبدل مايقول الي يدور في راسه فضل انه يهدي الامور : خلاص يبه غلطنا وحقك علينا الحمد لله ماني بنت والاكان اشيب وانا احتريك تطق بابي خزام بغيض : يع من بيطالع في وجهك وانت بنت الله يديم النعمه بس هزاع تحرك ماشي من عنده :انا بروح لدوامي اصرف لي خزام رفع صوته من وراه : وش بعده بعد ماغثيتني هزاع كمل طريقه من غير مايرد عليه لانه منغث منه بجد _______________________ جالسه على فرشه مبسوطه في الحوش ملتفه بشال صوف الجو غيم وبراد يشرح الصدر الربيع في اقبال والشتاء اقفى تذكرة ظامي واهي متشفقة شوفته زيارتهم اله في المزرعه علقتها فيه ..يمكن علشان هو الوحيد من اعيال مشعان ماله ام صحيح فيه غيره واجد امهاتهم مطلقات بس موجودات ومتعلقين فيهن اكثر من ابوهم رغم برهم له ...ياكثر جحوده هالادمي ياكثر مايجمع على ظهره من ذنوب ...اطردت خيال مشعان من بالها وارجعت تفكر في ظامي ..ماله ام وانا مالي اعيال يارب تحنن قلبه علي وتسمعني كلمة يمه من فمه ودي اسمعها قبل اموت يارب رجيتك ياكريم يالله حست بدموعها تغرق برقعها اخذت طرف طرحتها وامسحتها ..يالله انك عالم ماصبرني على مشعان والااخذته واستغنيت به عن بيت ابوي الاعلشان اعياله .. والاانا حره ماقبل الضيم والاقبل المهونه مير حسبي على قلبٍ ذلني من بعد عز (ام عايد متزوجه قبل مشعان ولمى عرفت انها عاقر ماتجيب اعيال اصرت على الطلاق وانشرت بين الناس انها عاقر حتى مايخطبها الاواحدن راضن بحالها ) على كثر ماركضت وراهم وداريتهم واحتضنت كل من قالت امه مشغوله والاوراي عزيمه ..ولاحدن منهم جبر في خاطري وسمعني هالكليمه الي احترقت روحي في رجواها ...سمعت صوت باب الشارع يفتح واهي جالسه في حوش الرجال تنحنحت تعدل صوتها واخذت كوب الماء الي في جنبها اشربته جاها صوت مزيد المزوح : شيخة الجدات جالسه في الحوش الحالها والله ياشايبن يتركتس بريحاتك ماعنده نظر قاله وقام يتلفت يخاف جده يسمعه ناصر دزه مع كتفه : لاقلت كلمه خلك قدها مهوب تلفت من الذله مزيد دف يد ناصر : رح وراك بس ناد جدك وانا اقوله وينك عن الشيخه بنت الشيوخ انحنى على ام عايد وباس خشمها وراسها : وشلونتس ياجده وجاء ناصر من بعده وسوى نفس ماسوى وام عايد تهلي وترحب فيهم تلفت مزيد وشاف طوافير القهوه والشاهي وعرف ان المجلس قبل فتره كان مليان :وين اربوعتس اخاف انا الي قطعنا جلستكم ام عايد تأشر له بحب يجي يجلس جنبها واهو تقدم جلس وين مابغته يجلس التفتت عليه : ابد ماقطعتو شي زيد قامو بلياكم ناصر اخذ فنجال نظيف وصب لمزيد قهوه ..ثم صب لجدته ومن بعدها صب له ام عايد تمسح على كف مزيد : ياوليدي ماجيت ظامي اليوم ماشفته مزيد التفت عليها بعد مارشف من فنجانه ونزله : لاوالله ياجديده اليوم ماشفته مير جايه قبل امس مابه الاالعافيه ليه تنشدين عنه ام عايد ترددت لحظه ثم تكلمت وكأنها مستحيه من الكلام الي بتقوله : والله ماغير انغرف قليبي على شوفته من بعد مسيارنا عليه في المزرعه ماعاد شفناه ياكافي حتى الجمع الي جت من بعدها مادخل يسلم ناصر بجفاف : الي مايدورتس لاتدورينه كيفه محد درى عنه جاء والاراح ام عايد انكتم صدرها من كلام ناصر ويالله ردت البكوه لاتطلع مزيد التفت على ناصر بحده يأنبه بنظراته على كلامه : لابالله دارين عنه ونبيه وكان ودك يالغاليه تخاويني لهالهيس الاربد نغصبه بانفسنا ونتعشى عنده قدام ام عايد انطلقت اساريرها وبسرعه خوف انه يغير رايه : هاصبر خلك هنيا بروح البس عباتي واجي اختار مكانه خارج البيت المكون من طابق واحد بين الورود والخضره والجو البديع جالس على كرسي خشبي ويشتغل باندماج تام على موقع المتجر الالكتروني الخاص فيه والي يروج البضائع الفرنسيه بحكم دراسته هناك اتفق مع عدة مصانع على ترويج بضائعهم في السعوديه والوطن العربي مقابل خصم مناسب على طلبياته وهالمتجر حقق شهره واسعه وارباحه فوق الممتازه انتهى من كتابة الرد على رسالت احد طالبي الدعايه والاعلان وقبل لايرسله دخل على جوه صوت سياره مزعج خرب عليه انسجامه رفع راسه يشوف من المتطفل ذا الي جاي يقطع عليه اشغاله زفر بضيق لمى عرف السياره همس لنفسه واهو يلتفت للاب توب ويضغط على ارسال : اللزقه ذا تم الارسال وبدى يغلق الجهاز واهو يسمع صوت مزيد يصايح بعد مانزل من السياره : ظامي جعل عدوك لالظمأ قم اذبح لنا تويس مبروك بنشوي اتسعت ابتسامت ظامي وهمس لنفسه : واطلق لزقه في ذمتي رفع صوته واهو يقوم من الكرسي : تخسي اذبح قطع كلامه لمى شاف عمته ام عايده تمشي من وراه كمل كلامه : انت تخسي اذبحلك بس عمتي تبشر بالي يسرها مزيد وصل عنده وسلم عليه وبعد السلام كمل كلامهم : المهم ان التيس يذبح الي والالجدتي ام عايد سلمت عليه بشوق استغربه ظامي منها بس ماعلق وبما ان صلاة المغرب اوجبت والجو بدى يبرد دخلهم لداخل البيت واستاذن من عمته علشان يطلع هو ومزيد يصلون في المسجد الي في طرف المزرعه مع العمال ومن يمر بالمزرعه وقت الصلاة واهو منبه بواب المزرعه انه يفتح الباب وقت الصلاة وحاط لوحه على المدخل تنبه بوجود مسجد داخل المزرعه للي يبي يصلي راحو يصلون واهي اوقفت داخل المجلس الواسع تتأمله بحب وتتمنى لوكان ظامي صدق ولدها كان خلت مجلسه ذا دايم مفتوح والناس تنصاه من قريب وبعيد بتخليه شيخ ال شعوان كلهم وبتفضح اكاذيب الشايب كلها وتوقفه عند حده والله انها اقدر الناس على رد صوابه لراسه من بعد اذن الله مير مالها في صوابه وخطاه حاجه ماله عندها نصيبٍ يحثها على العنوه خله في غيه لين يصفي راسه !! ___________________ اسمعت صوت الباب يطق واهي جالسه على طاولة القراءة تقرأ كتاب ارفعت صوتها : ادخل دخل ابوها وسكر الباب وراه ولان طاولتها ماعندها كرسي ثاني يجلس عليه تقدم لها مسكها بيدها وقومها معه للكنبه الوحيده في غرفتها واهي واسعه بحيث تكفي ثلاثه اشخاص جلس وجلسها جنبه والسعاده مبينه في وجهه : محد قالك ان عندي احد بروق باستغراب : الا ادري ان عندك ارجال ليه اتسعت ابتسامة جاسر ونطق بفرح : ومحد قالك انهم جايين يخطبون برقي !! _____________ الخطبه ماكانت في النيه مير الحمى جابتها كل الي دعولي وتحمدو لي بالسلامه الله يجزاكم خير ويسلمكم من كل شر لاتنسون تلبسون كمام وانتم تقرون جايكم بارت بنكهة الزكام الله يبعد الشر عنكم بالنسبه لموعد البارت بنرجع ليوم السبت والله كأن الحمى حمصت افكاري وجابت بارتن ازوين والاانتم وش رايكم ________________________ يارباه هالحمى جايبه شغلها في الروايه كتبت البارت وختمت ثم تذكرة اني ماجبت لقاء يوسف مع اهله ورجعت اكتب المشهد حقهم ...عطوني الفكس ..قربو الزنجبيل ...احد يجيب حبة المسكن هاتراني بادهن ارجيلاتي بالفكس المخلوط بزنجبيل وقرنفل والبس شريرباتي فوقهن ... الربع يقولون انه زين لزكمه .. المهم ياويلكم من خيزرانة ام عايد ان قمت ومالقيت ردودن توسع الصدر تراي مستلفتها منها في ذا الليل دامها مسيره على سمي المذبوح ماهي في عازة خيزرانه كن السالفه صارت اطول من البارت (: __________________ _______ البارت الواحد والاربعين واقف قدام المرايه يعدل اشماغه الاحمر ويحكم تنسيفته بدقه ...ابتسم لنفسه بثقه واعطى نفسه تحيه سريعه باثنين من اصابعه مع غمزه بعينه وسوى بيده مسدس واطلق على صورته :بصوب البرق عمرك شفت برق ينصاب تذكر عبارتها المنقوشه في الغار (البرق ماينوش روس الشجر الاكصاعقه ) اتسعت ابتسامته وهمس لنفسه : ماني من روس الشجر انا من روس الجبال الشواهيق الي تناطح الصواعق وتهزمها ! سمع بابه يطق رفع صوته بفرح : ادخلي يمه ادخلت عذبه تشيل في يدها مبخرة العود والسعاده مشرقه على وجهها قرب لها وقربت له وبدت تبخره : الله يوفقك ويكتبها من نصيبك ابتسم لامه ورد عليها واهو يمسك المبخر يبخر اشماغه بالعود الي فاحت ريحته بفخامه مميزه : امين يارب محتاج لدعواتك يالغاليه اصلا انا كل ماتمنيت شي اكون واثق اني باخذه اعرف دعواتك يالغاليه تبيعلي وتشتريلي مدت يدها للمبخر تاخذه منه واهي تتمنى من اعماقها ان بروق توافق عليه مبين انه متعلق فيها حيل واهي تستاهل ..صحيح ماهي رايحه معهم للخطبه بس بتكون معه بقلبها ودعواتها دعوت الوالدين مجابه وهذا وقتها امسكت المبخر بيمينها ومسكت كتف خزام بيسارها وارفعت راسها تبي تبوسه تحدر لها لحد ماقابل وجهه وجهها وسبقها يبوس اعيونها عين عين ثم انفها ثم جبينها واهي باست جبينه وسالت ادموعها غصب عنها : طول عمري وانا راضيه عنك وانا اسئل الله بمااستوطن قلبي من رضاء عليك انه يبسط الخير في طريقك ويسعدك دنياء واخره خزام تأثر بدموعها اخذ طرف اشماغه مسح فيها دموعها ورجع باس خشمها وجبينها : ان ماخذت من هالدنيا الا رضاك والله انه يكفيني جاهم صوت هزاع من وراهم يصفر التفتو عليه بضحكه وتكلم واهو يضرب على الباب بيده يستعجل خزام : العالم حمصتهم الشمس براء وانتم هنا تغزلون في بعض ردت عليه عذبه بضحكه :هههه ياتسذبك ياولد اخيي شمس الربيع تحمص خزام وصل لهزاع ودفه قدامه : امش اشوف مشى معه واهو يرفع صوته يرد على عمته : شمس الرياض شمس ..شمس لاقالو شمس ماهيب حيالله مرو عروب واهم طالعين واحذفت علبة المنديل من ورى خزام واهو ماشي وطاح المنديل في الارض اصرخت بقهر : بتاخذ المطلقه واهي كل الي قاهرها انه مااخذ سحر الي توها مكلمتها مسويه مناحه من اعرفت بسالفة خطبته التفتو عليها هزاع بعصبيه : احترمي نفسك يابنت وخزام برواقه رفع صوته يغني : عريس ومالي خلق ازعل مهما تستفزوني عريس ومالي خلق ازعل .. هزاع ماهو مصدق الروقان الي تلبس خزام كان متوقع يكوفن عروب ....اطلعو وكانت السيارات في الشارع تنتضرهم وكانو ال معدي ينظرون ل ال ماجد بتقدير كبير وهذا خلاهم يروحون لهم في جاهه كل خوال خزام وعددهم خمسه واعيال عمهم اربعه وكل رجال منهم معه اكبر اعياله وابوهزاع طالبن من ابو ريان يروح معهم في الجاهه وفعلا راح معهم هو وولده ريان كانو متفقين يجتمعون في بيت ابو هزاع ويمشون سواء من جانب ال ماجد ابو هزاع هو الي تولى الاتصال بجاسر وقاله انه بيجيه ومعه رياجيل وماوضح وش يبي لاكن ابو ريان اتصل فيه وبلغه بامر الخطبه حتى يكونون مستعدين ....وبماء ان ال معدي جايين في جاهه جاسر جمع اخوانه واعيال عمه واعيالهم وبكل تاكيد ابو باسل قبل الكل اوصلو لبيت جاسر بمايشبه الموكب يمشون في مجموعه وحده ورى بعض شافو بيبان بيته مشرعه واعيال ال ماجد يستقبلونهم من عند الباب ....جاسر وطارق وابو راكان يستقبلونهم في الحوش ....وعند باب المدخل مدخنتين ظخمه تفوح منها ابخرة العود الكمبودي ...ابو منيف عم بروق واثنين من اعيال عمه يستقبلونهم على باب المجلس وابو سياف وكبار ال ماجد ينتظرونهم في المجلس ولسان حال ال ماجد يقول من قدرك زد في تقديره بالنسبه ل ال ماجد كانو مرحبين بخطبة خزام بالاجماع بما فيهم ابو سياف وسيف لان سياف يوم جاهم كلموه في امرها وقالهم ان نفسه طابت منها وماعاد يبيها اما باقي اعيال عمها محد فكر فيها لانهم طول عمرهم يعتبرونها لسياف وبكذا صار الطريق سالك قدام خزام اسمعت صوت الباب يطق واهي جالسه على طاولة القراءة تقرأ كتاب ارفعت صوتها : ادخل دخل ابوها وسكر الباب وراه ولان طاولتها ماعندها كرسي ثاني يجلس عليه تقدم لها مسكها بيدها وقومها معه للكنبه الوحيده في غرفتها واهي واسعه بحيث تكفي ثلاثه اشخاص جلس وجلسها جنبه والسعاده مبينه في وجهه : محد قالك ان عندي احد بروق باستغراب : الا ادري ان عندك ارجال ليه اتسعت ابتسامة جاسر ونطق بفرح : ومحد قالك انهم جايين يخطبون برقي !! ابتسمت لابوها واهي تستشعر الفخر في نبرة نطقه لأسمها : لاوالله ياسماء برقك محد قالي قبلك اتسعت ابتسامت جاسر يحب الطريقه الي تحاوره فيها فخمه في لفظها فخمه في تفكيرها فخمه في اخلاقها اي رجال يتزوجها بيكون محظوظ ... : خزام ابن عدي خطبك قاله وركز في ملامحها يحاول يستشف انفعلاتها بروق تكلمت بجديه : بغض النظر عن من خطبني انا مبي اتزوج الحين ابي اركز في دراستي ومستقبلي جاسر حط في نفسه احتمال تكون متأثره بالايام الصعبه الي عاشتها مع يوسف :خلي الدراسه على جنب الحين قبل اي شي ابي اسئلك يوسف بقاله في نفسك شي ؟ حاسه انك موب قادره تبدين حياة جديده بسب اي شي صارلك معه او يتعلق فيه ؟ بروق ردت بتلقائيه وصدق : لاابدا يوسف صفحه انشقت من كتاب حياتي ورميتها ورى ظهري مع اول حرف من كلمة طالق مابي اتكلم عنه بس اكيد انه اقل من انه يمثل لي عائق ! جاسر بماء انه يعرف تاريخ يوسف الاسود ويعرف انها تعرف عنه ومع كل الي صار بينهم ماستغرب نظرتها ليوسف وماحب يعقب على كلامها حتى مايطلع من الموضوع الاساسي : معناته مافيه اي شي يمنعك من انك تتزوجين الدراسه ماتتعارض مع الزواج وانتي قادره انك تجمعين بينهم بروق ماكان لها رغبه تتزوج حاولت تقنعه : يبه انا ممكن اجمع بين الدراسه والزواج ماعندك مشكله بس انا فعليا مابي اتزوج في التوقيت ذا جاسر بطولة بال واهو مقتنع ان خزام يناسبها : طيب يوم نحدد لاي هدف نبيه وقت معين ثم يتاح لنا فرصة الحصول على هذا الهدف في افضل حالاته قبل هالوقت هل من المنطق انا نتخلا عنه بس لأنه موب في الوقت الي احنا نبيه ؟! بروق قلبت كلام ابوها في راسها وشافت انه منطقي : طيب انت مقتنع بخزام ذا وايش مميزاته : ايه اكيد ...خزام انسان ملتزم بصلاته واخلاقه عاليه رجل يعتمد عليه يتاجر في القهوه بمختلف انواعها وفي نفس الوقت يعمل كمذيع واهو اعلامي معروف وله نشاطات كثيره في المجال الاعلامي انسان رزين وكلامه موزون وواثق من نفسه بروق عجبها كلام ابوها عنه وتذكرة كيف عرض فزعته لها وكان مستعد ياخذ لها حقها من سياف لمى فهم انهيارها في الفديو بشكل خطاء قيمته على انه شهم ووسيم وانسان عنده نخوه : تذكر لمى اتفقنا نقسم القرار بينا انت كم تعطيه من الخمسين جاسر بثقه ومن غير تردد : الخمسين كامله وانتي بروق بعد تفكير : تقدر تقول عشرين الى خمسه وعشرين هنا سمعو صوت الباب يطق تكلم جاسر : ادخل ادخلت ام مشاري ومعها اخوها ابو ريان بروق قامت تسلم على خالها وبعد السلام اوقفت جنبه واهو التفت على جاسر : يارجال وين رحت تأخرت على الرياجيل جاسر بجديه : اخذ راي بنتي الدعواء زواج ماهيب لعب ابوريان التفت على بروق : انا عن نفسي انصحك وانا خالك تاخذينه تراه رجال والنعم ام مشاري تكلمت بحماس : رجال كفو وامه ذوق واخلاق تجنن ودخله المادي فوق الممتاز بالنسبه لشاب في عمره يعني انسان ناجح ومثالي بكل المقاييس وانا انصحك توافقين جاسر يستحثها : هاه نقول موافقه ..نبارك بروق بدت تقتنع فعلا هو رجال كفو ليه ترفضه لمجرد انها ماتبي تتزوج في الوقت الحالي وش يضمن انها تلقى رجال في مواصفاته في الوقت الي تقرر انها تتزوج فيه ...ارفعت راسها لابوها : مبدئيا موافقه بس لازم اصلي صلاة استخاره قبل ام مشاري : اكيد صلاة الاستخاره شي اساسي ابوريان : اجل مبروك مقدما يالله جاسر خل نروح لرجال وبعدين ارجع لها جاسر قام مع ابو ريان : الجماعه لزمنا عليهم بالعشاء وبيتعشون هنا صلي وفكري عدل الرجال نعرفه زين ومافيه اي سبب يخلينا نتاخر عليه في الرد خاصه انه جايب معه شلقة ارجال ومتعشمين انهم يسمعون ردك قبل يمشون وانا ساعه بالكثير وارجع لك بروق بثقه : ابشر يبه باستخير واردلك طلعو من عندها واهي اجلست تفكر خزام من عائله معروفه وابوها يعرفه زين وبما انه تكلم عنه بأجابيه كذا فأكيد انه شخص يستحق الاحترام لان ابوها مايمدح حيالله واحد ...امه انسانه محترمه وراقيه وكذا راح تتوفر لعيالها مستقبلا بيئه مثاليه جده تساهم في تربيتهم اب ناجح وعزوه لايستهان فيها ال شعوان اسم له وزنه صحيح ماهم من اصحاب المال والاعمال بس عائله لها قدرها في المجتمع واهي يهمها النسب المحترم المشرف (بروق ماتعرف عن انقطاع خزام عن اهله وتصورها انه بس عايش عند خواله كون امه ارجعت لاهلها بعد ماترملت وان الامور بينهم طيبه واهي تتذكر زيارة ام مزيد واعيالها لهم ) قامت توضأت وصلت صلاة الاستخاره بعد الصلاه فكرت انها تاخذ عن خزام فكره اوسع وتشوف وش يقولون عنه الناس بماء انه اعلامي اكيد فيه اراء كثيره تدور حوله اخذت جوالها وبدت تبحث عنه لقت مقاطع كثير من برامجه وتعليقات الناس عليها لقت احساباته في تويتر والانستقرام لاحظت اكثر الصور الي يعرضها عن البر والمكاشيت اما تويتر اغلبه عن برنامجه بدت تتنقل بين اخباره واطلعت بحصيلة انه اعلامي ناجح وشخصيته جذابه وممكن يكون فيه انسجام كبير بينهم مستقبلا في المجلس النقاش على اشده بسبب التنوع الكبير في اعمال الحاضرين وميولهم فكانت المواضيع متنوعه ومتعدده وممتعه .....خزام طوال الجلسه ماجاء في باله ولاللحظه انه راح ينرفظ عنده احساس قوي انها راح توافق يعرف انه شخص صعب يفرط فيه اي اب يدور سعادت بنته .....خاصه مع انتشار شباب الميكب شباب الدلع والمياصه ....بس وينه ابوها مو كنه طولها فالها سوالف وادبيات وساحب على ابو موضوعي هزاع الكزه بكوعه : وش سرحان فيه يابو الشباب خزام رفع ايدينه يفك تنسيفته ويرجع يعدلها ثم التفت على هزاع واهو يسحب سبحته من مخباه ويحرك خرزها بين اصابعه : ابد افكر في اي قاعه احجز هزاع متاكد ماهو حول القاعات ابتسم وبدى يسولف معه يخفف عنه ثقل الانتظار ......وكأن سوالف هزاع سرعت الوقت خاصه بعد مادخل معهم في السوالف ريان ومشاري .....واخيرا سمع جاسر يعلن موافقة بنته على الخطبه وانهالت عليه التباريك من الجميع ...رغم انه كان واثق من قبولها له الا ان سماعه للموافقه من فم ابوها له فرحه غير ووقع غير احساس نشوه احساس فرحه احساس شوق مشتاق يشوفها مشتاق يسمع صوتها مشتاق يشم شعرها مباشره من بين متنها وارقبتها ناداه جاسر يتفاهم معه على التفاصيل وقام معه للمقلط ومعه ابو هزاع اجلسو وتكلم جاسر : البنت ماعندها الا شرطين خزام بحماس : ازهلها ابو هزاع : ابد تطلب وتتدلل وعلينا ننفذ جاسر ابتسم لهم : مكثورين الخير البنت اشروطها يسره الاول ان العرس يتم متى مابغيتو بشرط يكون بعد بداية العطله الطويله دام هذا اول ترم لها تبي تركز فيه ابو هزاع : هات الثاني جاسر ناظر في خزام : الثاني تقول ماتبي اتصالات والاحفلة ملكه والامقبالات مع خزام قبل العرس والملكه في يوم العرس او قبله بيوم خزام اول ماسمع طاري الشروط توقع تشرط الدراسه الوظيفه بيت اي شي الا انها تبعد العرس كذا وتمنعه من شوفتها وتخلي الملكه مع الزواج عشان تظمن انه مايقرب منها رد بسرعه خوف ان خاله يعطيه الموافقه : بس ياعمي انا انسان جاهز ومستعجل على العرس جاسر : عاد البنت مشدده على شروطها مره وتقول ابد اذا ماهم موافقين عليها الله يوفقهم بغيري ابو هزاع تكلم : يابو مشاري بروق انا اعرفها يوم كانت تزور مكتبنا قلها عمتس ابو هزاع يبي يتفاهم معتس بنفسه وخلها علي خزام ماصدق خاله قال هالكلمتين صدق ان خوة المحامي مكسب ! جاسر ماعنده مشكله في ان بروق تقابلهم وتتفاهم معهم مباشره لاكنه عارف انها ماتبي الزواج في هالوقت والوقت الي اشترطته بحجة انه اول ترم لها في الجامعه ماهو طويل الحين الطلاب يستعدون للاختبارات النصفيه وبعدها اجازة نصف السنه عشرة ايام وبعدها يبدى الترم يعني مايمديها على الزواج قبل تبدا الدراسه قلبها في راسه وفضل انه يشتري راحة بنته خاصه ان المده طبيعيه وكان متوقع اساسا يحطون العرس في العطله الطويله وتكلم بحزم : اسف مقدر اناديها البنت هذا شرطها وانا مقتنع فيه اذا انت مستعجل على الزواج ياخزام الله يوفقك دور نصيبك عند غيرنا قاله واهو متاكد انه ماراح يتراجع عشان سبب تافه كذا ويمكن اكثر شي خلاه يصر هو ان شرط بروق كان اتفه من انهم يفكرون في رفضه وشلون عاد يراجعون عليه ويبون يلغونه خزام بأصرار : بس انا ماابي الابنتك جاسر بثبات : معناته انتظرها ابوهزاع بتشره : افا يابو مشاري مالنا خاطر عندك جاسر بحميا لبنته : خاطركم على راسي والله بس هذي خطبه مال للخواطر فيها دخل مستقبل بنتي مااساوم عليه بشي واهي ماطلبت شين كايد خزام حس فرحته ذابت بيقعد ينتظرها ترم كامل من غير مايربطه فيها والاشي غير مسمى خطيبه مايمنحه حق انه يتواصل معها بالتلفون مايمنحه حق انه يقابلها حتى شوفها ...شوفها!! وكأنه انتبه من سبات نطق فجأه : ابي اشوفها شوفه شرعيه جاسر ماكان عاجبه الطلب بس لانه طلب شرعي مضطر يوافق التفت على ابو هزاع : تفضل للمجلس يابو هزاع لاهنت ابو هزاع قام طلع للمجلس وجاسر دق على بروق وقالها تجي للمقلط علشان خزام يشوفها شوفه شرعيه كلها دقايق وانطق باب المقلط رفع صوته جاسر : تعالي يابروق ادخلت لابسه عبايتها الكتف الخاليه من اي زينه وجهها على طبيعته مافيه والاشي والاحتى مرطب شفايف شعرها القصير مرجعته على ورى بقوس شعر ادخلت شاده طولها بثقه اول مادخلت طاحت عينها في عين خزام وقف ببطء وعيونه طايره فيها باعجاب ماكان خافي عليها نزلت عينها بحياء ماتحرك من جسمها الاجفونها الي انسدلت ببطء اخاذ انطقت بصوت واضح : السلام عليكم رد خزام بحماس : وعليكم السلام ورحمة الله وبركاته جاسر ابتسم على انفعالات خزام الي مبين انه نساه تكلم وابتسامته تتسع : ادخلي يابروق خزام انصدم وجع وش يقول ذا ادخلي ليه انا لحقت اشوف شي يخرب بيته مااعظم جيناته ولا زوجته اخت ابو ريان هالاثنين يطلع منهم الشهد ذا كله حشى موب بنت برق على اسمها التفت على جاسر بصدمه واهو عاقد حواجبه : مابعد شفت شي جاسر اشر لبروق تاقف : وشلون ماشفت شي والبنت واقفه قدامك خزام بكوميديا جمع روس اصابعه بحركة اصبر اشوي المعروفه (على الاقل عندنا يالسعوديين ) : اصبر خلني استوعب البرق لمع في وجهي وطار بنظري الحين دوبه رجع شوفي بروق ابتسمت على كلامه وارفعت نظرها تناظر فيه شاب وسيم قمحي زي ماتحب له عوارض مرتبه بشكل جميل واضح انه واثق من نفسه حست بكمية رضاء ارفعت راسها بشموخ واشاحت بنظرها عنه : بعد اذنك يبه انا طالعه جاسر اشر لها بالموافقه استدارت واطلعت وخزام متسمر مكانه يطالعها لحد ماطلعت التفت على جاسر وبميانه : حرام عليك والله ياعمي عندك البنت هذي وتبيني اقعد انتظرها ترم كامل ليه تعذيب هو وش مسويلك انا جاسر زيد تعود على خزام وعيارته ما تأثر : اي والله صادق الي عنده البنت ذي يأخر زواجها على قد مايقدر والايخليها عنده بدون زواج خوف انه يزوجها لواحدن مايحفظها خزام في الاشهر الطويله الي راحت كان مايخلي فرصه مايتقرب فيها من جاسر خاصه انه من البدايه كان ناوي يخطب منه وبحجة ان جاسر من صحبة ابوه صار امر التقرب منه سهل خاصه ان جاسر انسان اجتماعي جدا وهذا خلا الحواجز بينهم شبه معدومه وهذا الي مخلي جاسر متقبل لكل تصرفاته وميانته عليه ...ميل على راس جاسر وباسه : افا ياعمي تشك في حرصي على بنتك جاسر بجديه : لو شكيت في حرصك عليها مافكرة اني اعطيك اياها خزام باصرار : اجل توسط لي عندها قلها اما نملك الحين والعرس في العطله او نخلي الملكه مع العرس في اول يوم عطله الي بعد اسبوعين جاسر تعاطف مع خزام من كثر الحاحه : انا مقدر اطلب منها شي لانها بتوافق علشاني ماهو علشانها مقتنعه بس خل امك تجيها وتكلم معها يمكن تقدر تقنعها في السياره واهم راجعين بعد ماتعشو عند جاسر خزام فيه سعاده فيه وناسه فيه طاقه ماهو عارف كيف يصرفها قاعد يطبل على طبلون السياره : هزاع شفلي دبره قبل افجر سيارتك ياخي في وناسه احسها بتطلع من راسي زي الالعاب الناريه مالي خلق ارجع البيت ابي استانس ابي انبسط ياربي مادري وش اسوي بعمري هزاع فرحان لفرحة خزام ومحتار فيه مايدري وين يطيربه الحين حظرة المستانس وبمزح واهو يشوف سيارة شرطه تمشي قدامهم : وش رايك اضرب الدوريه بخشم السياره ونروح ل السجن نتونس مع المساجين خزام التفت عليه بغيض : الا وش رايك اذبحك بالمره وتروح تونس مع الاموات في المقبره هزاع ابتسم يحس انه فرمل وناسة خزام كذا صارة سعادته في المستوى الآمن زادت ابتسامته اتساع على افكاره : اسمع اول شي لازم نروح لعمتي نفرحها اكيد انها تنتظرنا الحين وبعدها نروح لبرج المملكه وابشر بالي يسرك خزام من زود الوناسه ماعاد يجمع : يالله امش هزاع فرط ضحك : ههههههههه وأحد قالك اني موقف علشان امشي خزام التفت عليه واخبطه بعلبة المناديل : لا ياغبي قصدي اوكي ...معك...قدام عذبه عازمه ام هزاع وبناتها عندها تبي تحس بالفرحه كلمها خزام وعلمها بالموافقه من زمان والبنات ماقصرو مشغلات شيلاة ويرقصن مع انه مافيه احد غيرهن الله يسعدهن .....لكن الي جرح قلبها ان عروب اتركتها وراحت لسحر وليتها راحت ساكته الا قاعده تدعي على خزام وبروق انهم مايتوفقون ..طيب ليه خزام وش سواء لها علشان تدعي عليه بعدم التوفيق ...ليه نبي الناس يسوون الي حنا نبيه ونتجاهل رغباتهم واذا جاء الدور علينا مانبي احد يتدخل في حياتنا ...هو الي بيتزوج من حقه يختار البنت الي بتعيش معه ..اوكي هي تبي سحر ...وهذي هي سحر قدامها محد ردها عنها اما انها تفرضها علينا باي حق جاها صوت ابو هزاع يبارك ويهني فزة بفرح ....ابوهزاع باس جبينها وبفرح : الف مبروك يام خزام الله يبلغتس بعياله واعيالهم عذبه امسكته بعضوده ومع ان الجواب واصلها من ساعات بس تبي تسمعه من الي حضرو : وافقو وش قالو وش اشرطو ابو هزاع ضحك على حماسها : اكيد وافقو ولد عذبه من المجنون الي يرفضه والشروط ياطويلة العمر ماغير شرطين الاول مافيه عرس قبل العطله والثاني مافيه ملكه قبل العرس وممنوع يتواصل معها المعرس قبل العرس ام هزاع : وبس ماهيب شروط هذي هوينه سمعو صوت خزام وهزاع داخلين وقامن البنات اطلعن من عندهم ابو هزاع رفع صوته لخزام بعد ماشافه دخل : تعال اسمع خالتك تقول شروطهم هوينه ماهيب شروط خزام كان مشغول بالسلام على امه حضنها وباس خشمها وجبينها وقمة راسها واهي تدعي له وتبارك اخذ امه بيدها جلسها جنبه والتفت على ام هزاع : هذا وانا جايتس انتي وامي علشان توسطون لي عند العروس ام هزاع بصدق : لاتوسط والاشي ماطلبت شي من حقها وشنهو الترم كلها اربعة اشهر هزاع يضحك عليه بشماته : ههههههه صادقه امي وش مطيرك اقضب ارضك وخل البنت تجهز على راحتها خزام التفت على امه : يمه عذبه تعرف وش كثر هو متشفق على ذا البنت وماتبي فرحته تخرب اقطعت كلامه : ازهلها وانا امك ان الله اراد ماتطب رجلها الجامعه الا وانت موصلها بنفسك خزام خمها يحضنها من جنبها واهو يضحك بوناسه : هههه كفو كفو ام خزام ياجعلني فداء هالوجه في بيت جاسر الريم وبنات عمها ماصدقو الرجال مشو من عندهم راحو لمجلس داخلي عندهم مأثث على الطريقه السعوديه موكيت ومخاد جابو السماعات الكبيره شغلوها وبدو ينوعون في الرقصات شوي رقص خليجي شوي دبكه شوي غربي ماخلو في خطرهم شي بروق ورهف وسمر وديما اكثر البنات عشق لرقص ويبدعن في جميع انواعه الريم ماتضبط الا الرقص الغربي والرقصات الباقيه موب ذاك الزود عشان كذا تجبرهم يرقصون معها دخل جاسر من قسم الرجال بعد مامشو الجميع من عنده واول ماتجاوز باب القاطع سمع الازعاج الي مسوياته البنات راح يتبع الصوت لحد ماوصل للمجلس الي هم فيه يعرف ان بنات اخوانه بيباتن عنده الليله بس ماكان يدري ان ديما معهم فتح الباب وكانت بروق ورهف يدبكون بس اسمعو الباب ينفتح توقف كل شي جاسر لمح شوي من الرقصه ابتسم : ليش وقفتو يالله شغلو بشوف رقص بروق ورهف تراي اعرف ادبك واذا اعجبتني دبكتكم لكم عندي بكره حجز عشاء في المكان الي تختارونه وانا الي بروح معكم البنات اختبصن بديما الي كانت في اخر المجلس عند السماعات والاشافها جاسر وبتفكير سريع اوقفن ثلاث بنات جنب بعض يغطون عليها واهي اساسا متخبيه ورى السماعات ومع وقفتهن انحجبت عدل بروق ورهف تحمسو اسحبو جاسر بيدينه يدخلون رهف بحماس : تكفى ياعمي ادبك معنا جاسر : لا انا ابي اتفرج عليكن كيف اشوف وادبك بروق : اما عاد ندبك من دونك مايصير يالله بنات شغلو الميوزك بدو البنات يدبكون وجاسر دخل معهن جو وكان فعلا ضابط الدبكه ديما منقهره ودها تشوف ومافيه مجال تخاف تتحرك يشوفها بنات اخوانه مبسوطات ان عمهم شاركهم اللعب بعد ماخلصو من الدبكه قالهم جاسر يفكرون في مكان يوديهم له بكره وطلع من عندهم اتجه للدرج وصعد واهو يسمع الازعاج ارتفع من جديد بس ماحب يخرب وناستهن ديما اطلعت من مكانها واهي منبهره : اف يازين رجل عمتي يونس والله لوابوي مكانه ليكسر هالسماعات على روسنا رهف بضحكه : هههه قولي ماشاء الله تكفين لاتحسدينا عليه تراه اثمرة هالعائله البنات صاحو : تخيلو يكون سياف مكانه ههههههه رهف : ههههه كان الحين يعبونا تونه ساندوتش بروق : هههه هذا اذا لقو شي ينتعبا ( تعبئه ) ________________________ |
يراقب مكالمتها الهامسه صار لها عشر دقايق تكلم
وماياصله من صوتها شي هالبنت تثير شكوكه بشكل مجنون ...خلصت مكالمتها واطلعت بسرعه من المكتب من غير ماتلتفت لاحد
ممدوح فتح جواله بسرعه وارسل للقروب :صمود اطلعت
جاه رد يوسف السريع : شفتها من كام المراقبه المباشره
ممدوح : وين راحت
يوسف : قابلت واحد من المراقبين ووقفتهم ماهي طبيعيه كلهم يتلفتون
باسل : من المراقب
يوسف : احمد
ممدوح : هو نفسه الي قابلته المرات الي راحت
يوسف : ايه هو
ممدوح : طيب وش يقولون ماتقدر تسمعهم
باسل : كاميرات الممرات بدون صوت بس تصوير
يوسف : الليله اذا فضت الشركه لازم نظيف للكاميرات لواقط صوت
ممدوح : صح وش الفايده اذا مانسمع كلامهم
باسل : ممدوح وش صار على الهندي الي تعرفت عليه
ممدوح : ياخي ذا الهندي ياامين بزياده ياخايف من شي كل ماجيب طاري الشغل يتهرب واليوم يحاول يعرف من انا قلتله اني مصمم جديد ابوي دخلني للشركه بالواسطه وانه باسل يبغى يطردني منها
باسل : اها وش قال
ممدوح : التبن قعد يمدح فيك بغيت اسطره كف
يوسف : ههههههه شكله خايف من قشة باسل
باسل : على تبن انت وياه لاافصلكم
يوسف : على تبن انت حتى انا اقدر افصلك
ممدوح : انا مفصول خالص بس لاتلعب معي احوس شركتك على راسك
باسل : انا بخربها واروح جوله لمعمل الخياطه
يوسف : لاتروح والاتتعب عمرك يهشون ذبان توني شايفهم لاتنسى ان التصاميم باقي ماخلصت
باسل : ايه اجتماع المصممات وخبيرات الموضه بكره
يوسف : انت دبرت تصاميم يالمصمم
ممدوح : هههههه تصاميمي بتسرق الاضواء من كل التصاميم المعروضه
باسل : ياواثق هذا الحيص بيص اجل الي متكي له وشلون
ممدوح ارسل للقروب تصميم : هاه من الحيص بيص
باسل : اف اف اف وش ذا طلعت خطير
يوسف : خطير في عينه هذا تصميم امي ياحرامي
ممدوح : حرامي في عينك انا طلبت من عمتي تصاميم واعطتني خمسه تصاميم هديه لشركه
باسل : لا وش هديه التصميم خرافي لازم نعطيها حقها عليه
ممدوح : حقها في عينك هدية عمتي ماترد
يوسف : وبعدين ترا تصاميم امي لازم تتنفذ كلها موب يجون موظفاتك الحولجيات ويقولون ماهي قد كدا
باسل : ههههههههههه لا ماعليك ازهلها
ارجعت لمكتبها والضيق مبين عليها ناظرتها ندى ثم قامت راحت لها : خير صمود وش فيك
صمود تصد عنها : والاشي
ندى باصرار : وشلون والاشي وانتي حالتك حاله
صمود بعصبيه : ياختي زهقانه قرفانه كارهه نفسي عندك اعتراض
ندى كشت من صرختها عليها وهزت اكتافها : لا ابدا
صمود اصرخت عليها بصوت اعلى : اجل انقلعي من قدامي
راحت ندى لمكتبها واهي متضايقه من اصراخ صمود عليها كانت تبي تخفف عنها
____________________________________
دخلو شقتهم شايلين اكياس غداهم معهم دق جوال صقر وطلعه من مخباه واهو يعطي سياف الكيس الي معه :خذ رح اغرف الغداء وانا برد على جوالي
اخذ سياف الكيس وراح للمطبخ : عاد انت ماصدقت لقيت عذر
صقر جلس في الصاله ورد
سياف نزل الاكياس على طاولت المطبخ وبدا يسوي شاهي ثم غسل طوفريه وحط فيها كاستين
وحط ابريق الشاهي معها
وبدى يطلع صحون ويغرف الغداء خلص وبدا ينقل الغداء ل الصاله شاف صقر باقي يكلم وماركز معه
رجع للمطبخ يجيب باقي الاغرض وخلص في نفس الوقت الي خلص فيه صقر مكالمته وقام يغسل ايدينه
سياف رفع راسه لصقر بعد ماجلس معه على السفره : من الي كلمك
صقر بتصريفه : انا ذابحني الجوع اسكت عني باكل ولاحقين على السوالف
قاله وبدى ياكل وكل قصده ان سياف يتغدى قبل تنسد نفسه
سياف سكت عنه وبدى يتغداء
خلصو متغدين ولمو مواعينهم اغسلوها ثم ارجعو لصاله يشربون الشاهي
صقر مايدري كيف يفتح الموضوع قام يلف ويدور
: الحين انت يوم قلنا بروق خلصت عدتها اخطبها عييت طيب لو خطبها احد غيرك
سياف بس سمع هالكلمتين عرف انها انخطبت حس قلبه ينعصر ..بس لمتى واهو يزعل ويثور كل ماجاء طاريها هو قال لابوه وعمامه انه طابت نفسه منها باي حق يمنعها لاتزوج غيره خاصه انه هذا هو الي هي تبيه ...زفر بضيق وتكلم واهو يصد عن صقر : من الي خطبها
صقر بغيض : المذيع المغرور
سياف التفت على صقر بحده : وشهو من بد الرجال ماخطبها الاذا لايكون وافقت
صقر : ايه وافقت
سياف يتذكر يوم شافوه عند جاسر : اها علشان كذا بغى ينفقع هاك الليله
صقر ابتسم بسخريه : اكيد انه قال في خاطره ولد عمها المطنوخ ذا بياخذها
سياف بقهر : اه بس ياخسارة عنوتي طول هالسنين ....سكت لحظه يتذكر ونطق بحسره اكبر
..حتى جديلتها ياصقر ياكم جدلتها بيدي ...اذكر يوم رحت لجدتي وطلبت منها تعلمني كيف اجدل الشعر علشانها...(موقف من ذاكرة سياف .... دخل على جدته في المجلس الداخلي واهو ماسك بروق بشعرها ويدفها قدامه ....وبروق تفلت منه وتسب وتهاوش ... التفتت عليه جدته : انت علامك على البنت فكها عورتها
سياف ترك شعر بروق وجرها بيدها لين جلسها قدام جدته وجلس هو جنب جدته وجمع شعر بروق
في يده : علميني كيف اظفر شعرها ماغير تراكض بين هالوراعين وشعرها يلعب وراها
جدته قرصت بروق في عضدها : انتي ماتتوبين عيب تلعبين مع العيال
بروق تفرك يدها : اه جده عورتيني انا ماحب العب مع البنات وع مايعرفون يلعبون وبعدين محد يقدر يقولي شي علشان سياف مايضربهم
سياف دفها مع راسها : اقول انثبري يالبزر وخلي عنك العيال ولعبهم
بروق بتذمر : اف انت بتسوي شعري والا بروح العب باسل قالي اذا جبتي هدف باخذك على الدباب حقي
جدتها امسكتها بكتوفها اسحبتها يمها وبدت تجدل شعرها سياف شافها كيف سوت بداية الجديله واخذ شعرها من يد جدته كمل الباقي اول ماخلص
اسحبت نفسها من بينهم وراحت تركض وفي لحظه انفك كل شعرها لانهم ماربطو اخره وشعرها ناعم بالحيل ..اوصلت للباب وماشافت سياف وراها ارجعت تركض لحد ماوصلت عنده في بداية السيب الي كانت تركض فيه : سياف تعال تكفى امسك حارس وخلني افوز ابي اروح مع باسل على دبابه قال بيوديني للبقاله ويرجعني على الدباب
سياف مسكها بيدها : تعالي انا اوديك البقاله على دباب باسل ومن غير لعب
ارفعت راسها له : موب معطينا الدباب
سياف اتسعت ابتسامته : مهوب لازم يعطينا حنا ناخذه )
زفر نفس حار وتكلم بسخريه على حاله : ولد اختك وين راح ماتلاحض انه مسكت
صقر تذكر موضوع باسل : قصدك باسل ترا طلعنا فاهمينه غلط
سياف رفع حاجبه : وكيف فاهمينه غلط ان شاء الله
صقر : يعني كان يعتبرها اخته
سياف بحده : ايه هين يعتبرها اخته
صقر : واذا قلتلك ان رعد وبروق قالو لي نفس الكلام وبعدين الرجال طلع ناوي يخطب وحده من بنات اخواني وقالي اشوفله الوضع قبل يخطب رسمي
سياف بغضب : الايالكلب حاط عينه على البنت ويوم تزوجت حول على بنت عمها
صقر تورط كيف بيقوله الحين انه يبي اخته : صدقني ماعمره فكر في بروق صح انا وياك كنا فاهمين انه يبيها من كثر ماهو طاير فيها بس في النهايه انا تأكدت ان هالاهتمام من اخوه لااقل والااكثر وبروق بنفسها قالت باسل يبي افلانه واهي عارفه هذا الشي من كم سنه رعد قال نفس الكلام
وحتى امه كلمتني عن نفس البنت يوم كنا عندهم في الرياض واهو بنفسه حلف لي انه بعمره مافكر في بروق الاكأخت
سياف يحس انه من كثر الوجع احاسيسه تبلدت وماعاد تفرق معه : ايه ومن هذي الي يبيها
صقر احتار يعلمه والا يخليها وقت ثاني في الاخير قرر يعلمه : رهف اختك !!
_____________________
اصعدت الدرج بعد ماتأكدت ان كل شي تمام صحت البنات لصلاة العصر وبترجع اتشيك عليهم اذا صلو او لا رغم ان السهر غير مقبول في بيتهم
الاان البنات البارح مانامو الابعد ماصلو الفجر
قومتهن لصلاة الظهر صلن وارجعن ينامن ماتحب الفوظى في مواعيد النوم لاكن كسر الروتين لمره ولسبب له قيمته شي له لذته ومتعته وهذا الي خلاها تزعم انها نامت من التعب والاحست بالفوظى العارمه الي اكتسحت البيت خاصه ان البنات اجتهدو في تنظيف المكان من بعدهم
اوصلت لغرفة بروق طقت الباب واسمعتها تقول ادخل افتحت الباب وشافت بروق جالسه على كرسي التسريحه تدهن ارجولها بمرطب
ورهف منسدحه بكسل على السرير واول ماشافتها اعتدلت جالسه وجدان (من بنات عم بروق )تصلي
سمر اطلعت في هالاثناء من الحمام
: بروق صليتو
بروق : ايه يمه باقي بس سمر
سمر تكلمت تبرر : انتظر وجدان تخلص من السجاده
ارجعت ام مشاري تناظر في بروق : اجل اجهزي بسرعه
ام خزام على وصول وتبي تشوفك
رهف تربعت على السرير : خير وش عندها جايه اليوم واهي البارح ماجت مع ولدها
ام مشاري بنقد : الظاهر هالشرط الي كنت اقول ماله داعي مايمديهم يسون عرس اساسا قبل العطله
مسوي لهم ازمه وجايه تبيك تلغينه
بروق توسعت عيونها : ياشين الي يقعد يدقق على شروط العروس ويزيد ويعيد فيها وبعدين متى يبون العرس خير خير وين الوقت الي بيحطون فيه عرس
وجدان بعد ماسلمت من الصلاه واخذت مكانها سمر : ياختي واضحه العريس يبيك توافقين على الملكه الحين علشان يقدر يشوفك وافقي على الملكه وخلاص والعرس سووه على راحتكم
ام مشاري بتأييد :مافيه الاكذا وافقي على الملكه وفكينا
بروق : لا عاد اذا مره ملزمين اتنازل بوافق على العرس اما ملكه ومقابلات والو الو في الطالعه والنازله اسمحولي انا الزواج عندي عرس سيده من غير تمطيط ماله سنع
ام مشاري هزت راسها : بكيفك المهم البسي قبل ام خزام توصل
انزلت ام مشاري ولقت الخادمه في وجهها تبلغها ان الضيوف اوصلو استغربت تعبير (الضيوف ) الي تعرفه ان عذبه بتجي الحالها تجاوزت الخادمه رايحه للمجلس واهي تطلب منها تجيب الظيافه
ادخلت وشافت عذبه ومعها عروب وهذي اول مره تجيهم عروب كانت تشوفها في بيت عذبه وام هزاع
بس اول مره تجيهم رحبت فيهم بحفاوه وقبل تجلس اوصلت الظيافه وبدت تصب لهن القهوه
بعد يجي عشر دقايق ادخلت عليهم بروق لابسه
فستان مورد بازرار من قدام صدره ماسك وتنورته فيها شوية زم يوصل لنصف الساق وفتحته الاماميه
توصل لركبه اكمامه قصيره وحده جميل عليها
شعرها ماسكته بطوق ووجهها مزينته زينه خفيفه
شوية كحل وماسكرا وروج فاتح
ابتسمت بروق بحب واهي تشوف ترحيب عذبه وحفاوتها سلمت عليها و تجاوزتها لعروب الي كشرة
في وجهها ومارتاحت بروق لهالوجه المكشر سلمت عليها ببرود واستدارت بتتجاوزها وتجلس لاكن
صوت عروب وقفها : ممكن لو سمحتى تاخذيني للحمام ماحب اتحرك في اي بيت غريب الحالي
عذبه مات وجهها واهي تردد في صدرها الله يستر
هي من اصرت عروب انها تجي معها واهي ماهي متطمنه
ام مشاري ملاحظه هالبنت ماهي خاليه : اخذي راحتك ماعندك احد
بروق اعرفت ان في راسها موال تبي تغنيه لان اسلوبها كان واضح جدا انها موب متقبلتها ابتسمت
واهي تسوي نفسها غشيمه تبي تعرف وش وراها
: صادقه الواحد مايقدر يرتاح في بيت اول مره يدخله تفضلي معي
اول ماطلعن من المجلس اشرت بروق بيدها : من هنا الصاله
عروب اتسعت ابتسامتها : لا زين على الاقل طلعتي من الي يفهمونها واهي طايره
بروق ردت لها الابتسامه : والايهمك انا افهمها قبل تقلع حتى
اوصلو لصاله وجلست عروب واهي تحط رجل على رجل لابسه تنوره ضيقه لتحت الركبه مباشره وكعب عالي وبلوزه انيقه بموديل ينلف وينربط عند الخصر واكمام طويله منفوخه اشوي من فوق وماسكه على اليد من تحت شعرها الي يوصل لنصف ظهرها كيرلي ووجهها مزينته بطريقه حلوه ومبرزه ملامحها ...اجلست بروق على الكنب الي على يمينها : اسمعك
عروب من شدت غيضها اعجزت تحافظ على جلستها المتكلفه نزلت رجلها والتفتت على بروق بكل جسمها بحده :اسمعيني عدل ومن غير لف والادوران خزام ماهو حيالله واحد خزام بنات البنوت قليلاة عليه ومايليق فيه الاوحده ننقيها له نقوه وماراح اسمح لوحده مطلقه مثلك انها تاخذ واحد اكثر من احلامها !!
_____________________
اين الجزء 21