البارت الثالث
في شقتهم في الشرقيه
فز صقر واقف واهو يكلم بجواله : وشهو بروق تزوجت الي انقذها
شهق سياف بفجعه وفز واقف واهو يصرخ في وجه
صقر : وشلون تزوجت بروق ومن بامره
صقر سكر من مشاري لمى شاف ثورة سياف
: يقول تزوجت الي انقذها
سياف صار يروح ويجي في الصاله بقهر : ياعلها حريمته
صقر بانفعال : لاتدعي قيده اخذها
سياف بغضب : الا بادعي وزود وجعله مايتهنى فيها
اصلا ماهو بكيفه ياخذها
تحرك للكنب الي كان جالس عليه وصدره يعلى ويهبط من الغضب سحب جواله من على الطاوله واجرى اتصال سريع واول مانفتح الخط صرخ من غير مقدمات : انت وشلون تزوج بروق واحد غيري
صقر يراقب تعابير سياف الغاضبه وانذهل لمى شاف عيونه تتوسع بصدمه ثم تتحول للون الدم من شدة الغضب والايدري وش قاله جاسر
يخليه يتفجر قهر كذا كل الي سمعه كلمه سياف
الجليديه : مع السلامه
وسكر جواله وحطه في مخباه بحركه سريعه استدار
للكنب مره ثانيه سحب اشماغه من فوقه حطه على راسه باهمال وتلطم فيه وتوجه لباب الشقه بيطلع
امسكه صقر مع عضده : وقف هنا وش قالك جاسر ووين
قاطعه سياف بجمود : قال الي قاله وبروح لموقع المشروع والانسيت ان ورانا شغل
صقر بمحاولت اقناع : كيف تروح لشغل وانت بهالحال
قاطعه سياف بصوت مجلجل يتفجر غضب : وش فيه حالي لايكون على بالك بحط يدي على خدي واقعد ابكي على الاطلال ماعاشت والاكانت من اتبع مقفاها وانا سياف
انهى كلامه وطلع مع باب الشقه نازل مع الدرج صقر ركض لطاوله اخذ اغراضه من فوقها بسرعه
وطلع من الباب وقفله ونزل مع الدرج يركض لحق
على سياف وتوه محرك سيارته فتح باب السياره واهي تمشي وركب وسكره وراه بعنف وكأن ظربت الباب القويه فجرة طاقه سحريه في المحركات ادى لانطلاق السياره بسرعه جنونيه صقر اكتفى بربط حزام الامان والتزم الصمت لانه اكثر واحد يعرف الجالس جنبه ومتأكد انه في هذي الحظه اسواء من انشط البراكين على وجه الارض ولو انفجر راح يحرق كل الي حوله معه بقى متسلح بصمته فرغم السرعه الصاروخيه الي يمشون فيها
يعتبر انهم في امان اكثر مما لو تفوه بحرف واحد
فقط لانه وقتها راح تكون نهايتهم وحده من ثنتين اما المقبره مباشره او العنايه المركزه في المستشفى اوصلو مقر المشروع الي تعمل فيه معداتهم في وقت قياسي وقف سياف السياره بحركه عنيفه اثارت الغبار من حول السياره وبمجرد
ماتوقفت قفز خارجها من غير مايهتم انه يسكر الباب من وراه..... صقر نزل وراه بقفزه مماثله و اتبعه متاخر عنه بخطوه
وصل سياف لاقرب شيول لهم وبدون مقدمات سحب سايق الشيول راميه خارجه وتلقاه صقر مثبته واقف تشبث السايق في صقر لحد ماتزن واقف والتفت على سياف بغضب لاكن صقر اجذبه يمه وهمسله بكم كلمه خلته ينسحب بهدؤ صقر
وقف مكانه بقهر على ولد اخوه وصاحبه واهو يراقبه ينقل التراب من الارض للشاحنه
وكله حيره وش قال جاسر لسياف علشان يبلع ثورته ويكتمها داخله بالطريقه المدمره ذي وليه بروق تزوجت الي انقذها
________________
ليلة عرس يوسف وبروق
جالسه في كوشتها داخل قسم العروس بعد ماأجبرت اهلها على انها تبقى داخل الجناح الخاص وماتنزل للمعازيم ابد وماكتفت باهالشي ومنعت انه يدخل لها اي احد مايقرب لها قرابه مباشره
ادخلو عندها بنات عمها اضحكت سولفت امزحت عطتهم كامل جوهم وهذا هن بدن يطلعن من عندها وحده ورا الثانيه لانشغالهم مع الضيوف
وحده من بنات عمها اجلست قدامها واهي مستعجله عروستنا الجميله يصير تثبتين لي هالبروش في شعري من ورى شوفت عينك طقو وخلوني
ابتسمت بروق لها واهي تاخذ البروش من يدها : يصير ياقلبي ليه مايصير لايكون باتكبر عليكم علشان صرت عروس
بنت عمها ترسلها بوسه في الهواء وتستدير معطيتها ظهرها واهي تجلس على اركبها
بروق حاولت تثبت البروش ودخل بين البنس الي مثبته الشعر و لمى ضغطت عليه بتسكره انكسر
كان بروش كرستال عفست ملامحها واهي تشوف كيف كسرته وللحظه لمعت في ذهنها فكره وبحركه
سريعه مررت الطرف الحاد مكان الكسر على اصبعها الي تلبس فيه الدبله وتاوهت بألم : اي
انكسر
التفتت عليها بنت عمها بسرعه : وش فيك
بروق واهي تضغط على الجرح في اصبعها : انكسر ومدري كيف انزلق على اصبعي وجرحني
بنت عمها اسحبت اصبعها تشوفه واندمت انها اطلبت منها تركب لها البروش : يالله انجرح اصبعك اسفه بروق ابلشتك بذا البروش الخرده
بروق اخذت منديل من الطاوله الي جنبها ولفته على اصبعها واهي تضحك : ههههه ويحلفون انه ماركه لوماخذين صيني عمر اكثر منه
سمر : هههههه
ارجعت تناظر بروق بتأنيب ضمير : الله لايعيده من بروش عورتك ولابعد من زود النحاسه الجرح جاي مكان الدبله
بروق ببساطه : عادي لاتشيلين هم الحقي على الرقص ترا اذا مارقصتي في عرسي ازعل
ابتسمت لها سمر بخجل من الي صار : اسفه مره ثانيه بروح اجيبلك لزق جروح
واطلعت قبل تسمع رد بروق الي انبها ضميرها على الحرج الي حطت سمر فيه من غير ذنب
كلها شويات وارجعت سمر بلصقة جروح لصقتها على اصبع بروق واطلعت بعد ماكررت الاعتذار عشرات المرات استمرو اقاربها يدخلون ويطلعون من عندها يباركون لها وقبل يدخل العريس بشوي انشغلو امها وكل الي حولها بالاستعداد لدخلة المعرس ولقت نفسها الحالها فجأه
بروق استغلت فرصة انها بقت الحالها اخيراً وكملت الفكره الي بدتها بجرح اصبعها ارفعت العقد الي يزين صدرها وبدت تحرك كم الفستان الخشن بسب وجود الشك على جلدها من تحت العقد لحد
ماحمر بعد دقايق ادخلت امها عندها وشافت الحمار الي في صدرها قربت لها بخوف : بسم الله عليك وش فيك ياروحي وش ذا الي في صدرك ماكان موجود من اشوي
بروق تفرك صدرها بباطن كفها : ماما احس جلدي شب حساسيه هو من وقت يحكني بس اتصبر عنه
والحين زاد
امها قربت لها بخوف وبدت تسمي عليها وتقراء قرآن ونزلت عنها العقد : غريبه عقدك ذهب اصلي والماس مايسوي حساسيه
بروق بتصريفه : يمه اتوقع من مثبتات الميكب والقرف الي غرقوني فيه الكوافيرات
امها كأنها اقتنعت بكلامها : يمكن بس غريبه توه ينفر الحين
بروق : الا من زمان بس كان مره خفيف لونه
امها : طيب تقدرين تلبسين الشبكه
بروق ارجعت تفرك صدرها حتى تظمن ان الحمار مايختفي وامها تضنها تتألم : لا ماما تكفين اعتذري
عن تلبيس الشبكه حتى اصبعي انجرح شوفي
تجمعو حولهم الحريم واضطرت امها تسكت واهي متضايقه من هالعرس الي مافيه شي ماشي صح
اهل العريس محد جا منهم الا ام المعرس وخواته
وتصرفاتهم غريبه حتى انهم ارفضو يدخلون لزفة
ولدهم شي غريب قاعد يصير صحيح ان ام المعرس
تعذرت بأنهم تفاجاؤ بالزواج ووعدتها انهم راح يسوون لبروق حفله عائليه في بيتهم الخميس الجاي بس يبقى فيهم شي ماهو طبيعي وغالبا مانهم موافقين على الزواج وحاظرين بس علشان خاطر ولدهم واكتمل المشهد المستفز لمى دخل المعرس مع جاسر ومشاري ورعد ومحد معهم من اهل المعرس هل وصلوهم لحد الباب وارجعو والامحد عبرهم زي ماسون الحريم حست بغيض وقهر في قلبها بس مضطره
تكتم وتتجاهل علشان ماتسوي شوشره حوالين بنتها في الواقع اهل بروق واقاربها كلهم كانو مستآين من اهل المعرس وحضورهم المستفز وكأنهم ضيوف ويادوب اقاربه المقربين قاعدين يتعذرون بحفله عائليه راح يسوونها في بيتهم الاسبوع الجاي لاكن هذا الوعد البارد ماهو مبرر لوضعهم الغريب وكأنهم مغصوبين وفي الواقع
اهل بروق مقيدين بجميل يوسف عليهم يوم رد لهم
بنتهم وهذا المعروف هو الي مخلي ال ماجد يتغاضون عن اي قصور غير مبرر من جهة اهله
اطلعت ام مشاري من هواجسها على مشهد جاسر واعياله وهم يحظنون بروق بحب وسعاده ويباركون لها تقدم يوسف لبروق وباس جبينها وتفاجأ بنظرة الاحتقار الي ظهرة في عيونها واهو يقرب منها واختفت بسرعه خلته يشك هل هي فعلا ارمته بنظرة احتقار والايتهيأله اجلسو في اماكنهم وابوها واخوانها انسحبو راجعين لضيوفهم
تلفت يوسف في الموجودين ونطق بغرابه وين المصوره انصدمت ام مشاري والي معها كانو متوقعين يقول وين امي حست عروق راسها تنتفخ
من مصاخة هالمعرس واهله كانت مقهوره من تعنت بنتها وتمسكها برفض كيكة الزواج وحضور المصوره وحتى طرحة مالبست اما الحين تحس بانتصار لان هالموضع ضايق عريس الغفله حتى جرح اصبع بروق حست بأمتنان له اذا يحسبون انهم اخذو عروس مايحلمون فيها على طبق من ذهب فهم مايعرفون من اخذو
هالعائله المتعجرفه ماينفع لهم الابروق اتسعت ابتسامتها واهي تجاوب : ماحصلنا حجز لمصوره
يوسف رفع حاجبه باستغراب : وليه ماقلتولي
ام مشاري ردت باتهام : ليه هو حنا شفنا احد منكم علشان نقول والانسكت
يوسف تذكر الوضع وبأحراج انشغل في سحب علبة الدبل من مخباه والتفت على بروق واهو يسحب الدبله من علبة المخمل ويطلب يدها علشان يلبسها ..................بروق ارسمت البراءه والخجل على وجهها واهي ترفع يدها مأشره على اصبعها الي تضاعف حجمه من لصقة الجروح الملفوفه عليه : اسفه احتفظ فيها لوقت ثاني لان إصبعي مجروحه
كان تمثيلها متقن لدرجة ان يوسف ماشك ولو للحظه ان فيه سبب ثاني غير الجرح رجع الدبله مكانها وسكر العلبه مرجعها في مخباه دامها ماراح تلبس دبلتها الحين حتى هو بيأجل لبس دبلته وبعدين يلبسونها سوا وبما انه مابقى شي يسوونه طلب منهم يجهزونها علشان يمشون ..............
دخلو لجناحهم في الفندق .....
يوسف يمشي بحركه اليه وتفكيره مشغول
عن الي تمشي جنبه بنفس الآليه والغريب انه مشغول عنها فيها تقدم لغرفة النوم فتح بابها
ومشى بخطوات واثقه رتيبه لشماعه الموجوده
على مسافه قصيره من الباب وصل عندها ونزع البشت عن اكتافه وعلقه عليها رفع عينه على
بروق الي تبعت خطواته لداخل الغرفه ووقفت مقابله
له عند نفس الشماعه وبدت تتحرر من عباتها وغطاها راقب كيف تتحرك بثقه ماأربكها وجوده ماعجبه تحررها من تأثيره الطاغي على كل
بنت يشوفها شملها بنظره يجمع فيها كل جمالها وفتنتها شعرها القصير الكثيف المثبت بعقد لؤلؤ
فخم فستانها الناعم والانيق في نفس الوقت باكمامه الطويله ونفشته الخفيفه عيونها الواسعه
وشفايفها ......اصتبغ وجهه ببرود جليدي في هالحظه واهو يشوفها ترفع نظرها له بعد ماخلصت
من تعليق عباتها نطق ببساطه : العشاء جاهز تعالي نتعشا
بروق مانزلت عينها عنه وتكلمت بثقه : اول شي صل ركعتين السنه
يوسف كشر بنرفزه : قلتلك من قبل مااصلي ماصليت الواجبه علشان اصلي السنه
بروق انقرفت منه تحسه كومة قذاره كانت شاكه في سالفت انه مايصلي وللحين شاكه ماهي قادره تستوعب ان فيه مسلم يعرف معنى ترك الصلاه ويتركها يمكن يكون متساهل في الصلاه يترك فروض كثيره اما ابد مايصلي !!نزلت عينها بحياء طبيعي : حتا انا ماأصلي
يوسف توسعت عيونه بتعجب : دامك ماتصلين ليه مدوشتني صل وصل
بروق ودها تذبحه الحقير التافه وبجمود : اقصد عندي عذر شرعي
يوسف تنرفز من قلب :نعم نعم ودام عندك القرف ذا ليش متزوجين الليله كان قلتي من قبل
بروق زاد احتقارها له وهالمره ماحاولت تخفي نظرت الاحتقار في عينها : ابوي طلب منك نأجل الزواج شهر وانت الي رفضت
يوسف بعصبيه : قالي علشان حضرتك تتجهزين
بروق ارفعت حاجبها باستنكار : لايكون على بالك راح نكلم ابوي في السوالف هذي
تجاهل كلامها واشر لها على باب الغرفه : تعالي نتعشاء ........
جلسو متقابلين على طاولت الاكل وبدو يتعشون
بروق اول ماجلست في مكانها اشملته بنظره تأمليه
ثوبه الاسود شماغه الابيض كبكه ساعته واخر شي
ناظرته وجهه الرمز الانثوي وسط معالم الرجوله
ماكان يحاول يطلع بمظهر ناعم بأستثنى حلاقته لدقنه وشنبه بالكامل حتى صوته خشن ورجولي بحت لو شافت وجهه بمعزل عن هرمونات الرجوله المحيطه فيه كان احلفت ان صاحب هالوجه انثى سحبت نظراتها عنه بمجرد ماعتدل جالس وبدت تاكل
يوسف شاف نظرتها السريعه له وكيف تجاهلته وبدت تاكل بمجرد مالاحظت انه منتبه لها ركز نظره عليها بغيض عادتا البنات يايسوقون عليه الحياء وينتظرونه يعزم عليهم علشان ياكلون يايبتدون بالاكل وعيونهم تلتهمه بوقاحه صريحه اما هاذي لاهي مستحيه والاوقحه يشوف فيها ثقه واشيا اخرى ! : شكلك جوعانه
بروق ابتسمت بروقان : الاكل ممتاز وانا ماأكلت من المغرب
يوسف بسخريه : يقولون البنات في ليلة زواجهم مايقدرون ياكلون من الحياء
بروق اتسعت ابتسامتها : ومن قال اني مثل البنات
ابتسم لها يوسف : اها بعد الي صار في البر اكيد مانك مثل البنات
كشرت بقرف وارفعت حاجبها اليسار باستهجان
:ولك عين تتذكر الي صار في البر
ابتسم بنصر : على بالك بتفلتين مني انا الي ابيها اجيبها كيف ماكان المهم اني في النهايه اجيبها
بروق انقهرت من وقاحته وجهة له نظرة تحدي : البرق ينشاف ماينمسك
ابتسم باستمتاع :صعبه عليك تعترفين بالهزيمه
اتسعت ابتسامة بروق بغموض : تونا نقول ياهادي مسرع سويت نفسك منتصر وادعيت اني مهزومه
يوسف رد لها الابتسامه مع غمزه : هذا انتي في يدي
بروق كان في فمها اكل قعدت تمظغه بهدو
اعجبه انها مسيطره على انفعالاتها ومشاعرها
وشي واحد كان مضايقه فيها نظرة الانبهار الي تعود يشوفها في عيون كل بنت يجلس معها واللهفه لكل كلمه ينطقها كل هذي ماهي موجوده عندها
ابلعت لقمتها بهدؤ وتلذذ : لسى بدري على انا نعرف من في يد من كل الي صار انا اجتمعنا في ساحه وحده ........
يوسف بتأكيد : وهالساحه ملكي
بروق تضيق عيونها وتميل براسها شوي : اقدر ادير ممتلكات الغيربجداره
يوسف انقهر من التحدي الواضح من بروق
: من غير لف والا دوران لاتحسبيني ميت عليك
انتي يادوب دميه اتسلى فيها كم يوم وارميها على اعتبة بيت اهلها
بروق ارفعت حاجبها على جنب باستنكار مصحوب بتهكم : مااضمن لك انك ماتكون في دور الدميه هالمره
يوسف ضحك ضحكه صاخبه :ههههههههههه ههههههه ههههههههههه
وبتلميح خبيث : كلي فدوه العبي فيني وتفنني في اللعب على قد ماتقدرين
ابلعت اللقمه الي كانت تمضغها واخذت كوب العصير اشربت منه رشفه صغيره اي شخص يشوفها يقول انها في قمة الاستمتاع باكلها
نزلت الكوب من يدها بهدؤ واهي تراقب سماجة يوسف وبثقه بارده : لاتنغر بنفسك قواعدي في اللعب تختلف عن قواعدك واشك ان واحد في مستواك يقدر يستوعبها
تنرفز يوسف من تلميحها ورمى الملعقه من يده على الطاوله بعصبيه : انتي الي مانك مستوعبه من انا ووش اقدر اسوي
اتسعت ابتسامتها وقررت انها مثل مانثرته شذرات اعصاب تجمعه شغف!! ......وبتعلمه اصول اللعب على مهل بس في الوقت الي هي تبيه !..
وبضحكه : هههههههه هدي هدي امزح معك ماحب الأجواء التقليديه الي نسمع فيها عن ليلة الزواج
يوسف انجذب لضحكتها المؤسيقيه وابتسم رغم الشك في نوايها واسلوبها : اخ بس لو باب الفرح مانقفل والا كان خليتك تعيشين ليله ابعد شي عن الاجواء التقليديه
فهمت تلميحه وفي داخلها متقرفه منه وبتعمد افرجت عن جيوش الفتنه في وجهها واهي تبتسم ابتسامه صغيره وترخي هدبها بخجل حقيقي وحياء طغى على ملامحا يوسف ذاب في بحر الفتنه الي بدى يموج بين تفاصيلها فتنه نادره ونكهة حياء حقيقيه ماهي من النوع الرخيص الي يشوفه على بنات الليله ونص الي يعرفهم سند اظهره على الكرسي واتسعت ابتسامته بتأمل لذيذ وبصوت هادي يقطر رومانسيه
: تدرين انك فاتنه لحد تغار منه الفتنه ذاتها
بروق مدة يدها لكوب العصير واخذته ترتشف منه
رشفات صغيره واهي تعيد ترتيب ذاتها مافي نيتها
ابدا انها تتأثر فيه والاراح تسمح له بهذا الشي ابد
رجعت كوب العصير مكانه واهي تسحب خمار الفتنه عن محياها وترفع نظرها له تتكلم بثقه
: الفتنه اقل ممتلكاتي قيمه واهميه
يوسف تفاجأ وبتهكم : اوح وش ذا الغرور
وبسخريه اكبر : عرفنا الاقل اجل وش الاكثر
بروق ارجعت لساحة اللعب من جديد وبجديه : راح يجيلك يوم وتعرفه ومااعتقد انه راح يعجبك
يوسف تنرفز منها مصره تلف وتدور معه وتتكلم بطريقه غريبه تثير الاعصاب صرخ : انتي واخرتها معك ...
هنا دق جواله وبما انه قدامه مباشره على الطاوله شاف الرقم واختبص سحب الجوال بسرعه وهو يقوم واقف
وحطه على اذنه وماتكلم لحد ماطلع من الجناح كله
بروق مافاتها ارتباكه وحوسته كشرة بقرف اكيد وحده من قبيلة البنات الي يعرفهم امسحت فمها بالمنديل وقامت ادخلت غرفة النوم اتجهة لشنطتها اخذة بجامتها ولوازم الشاور
ودخلت الحمام تسبحت من غير ماتغسل شعرها
وازالت مكياجها بالكامل واطلعت......
يوسف بعد ماخلص مكالمته دخل ماشافها كان متردد يروح والا يقعد مع بروق.......ليه لا ؟!صارلي مده طويله وانا احاول اقابلها ويوم وافقت اتردد
وبعدين اذا تزوجت موب معناته اغير حياتي .......
الا لازم اروح وبروق قيدها صارت في يدي ويمديني
اراضيها بالي تبي واذا مارضت بسلامتها ....وفرصه بعد تعرف حجمها دخل لغرفة النوم وماشاف بروق
عرف انها في الحمام وقف قدام المرايه يعدل شماغه وبتفكير ...خل اغير احسن ماتستاهل اروح
لها بملابس لبستها علشان زوجتي
اتجه لدولاب وقيده رتب اغراضه هناك سحب له
بنطلون وبلوزه صوف لبسهن على السريع وبدى يتعدل قدام مراية التسريحه سرح واهو يفك ساعته على مهل ويبدلها بوحده ثانيه .....كنت امزح معها يوم ذكرتها بسالفة البر ليش اخذتها بجديه وتحدي وليه قاعده تتكلم باسلوب ملتوي ومبطن المفروض بزواجنا اي شي صار قبل ينتهي !!.....معقوله يكون ابوها غاصبها على الزواج ؟! ياترى وش يدور في راسك يابروق ؟! لا.....انا فعلا لازم اروح طلعتي في اول ليله لنا مع بعض بتكسر خشمها وتمرغه بالتراب بس لازم اسويها بطريقه نظيفه واقدر اطلع منها بعذر لو تطورت الاحداث وبروق ذكيه وبتفهمها
ابتسم لنفسه بانتصار واهو يغرق عمره بالعطر خل اشوف كيف راح تنام الليله عروس الهنا من غير عريس واول ماسمع صوت باب الحمام ينفتح رسم على وجهه معالم الحزن والخوف وتقدم لبروق بسرعه
وقف قدامها بأسى وانحنى عليها يطبع بوسه على جبينها : انا اسف بروق لاكني مضطر اطلع صديق
عزيز علي طايح في مشكله واتصل يستنجد فيني
اسف والله اني مضطر
قاطعته بروق واهي تربت على كتفه بمواساه
: مفهوم المصايب ماتستاذن تقدر تروح لاتشيل همي
يوسف باهتمام :عطيني جوالك اسجل رقمي لو احتجتي شي دقي علي
بروق اتجهت لتسريحه واسحبت جوالها من عليها
واهي قيدها طلعته من الشنطه قبل تدخل للحمام
افتحت رمز الجوال ومدته ليوسف اخذه من يدها وسجل رقمه بسرعه وبقصد دون في خانة الاسم حبيبي دق من جوالها على جواله ثم سلمها جوالها وتقدم لها رخى نفسه يمها وباس خدها المره ذي : بعد قلبي انتي انتبهي لنفسك
بروق استحت لمى باسها ونفس الوقت تقرفت موب متخيله ان ذا يكون زوجها هي بروق !!
طلع من عندها وبمجرد ماسكر الباب وراه امسحت
خدها بقرف واحساس القهر تسلل لها غصب
وبسخريه حركت يدها في الهواء بأستهزاء واهي
تقلد صوته : صديق عزيز طايح في مشكله
والي يروح يفزع يتكشخ ويغير حتى ساعته ولابعد
حتى العطر غير الي كان عليه من اشوي .........
اوقفت تتأمل الفراغ من بعد طلوعه للحظه وفي نفسها حلو ...حلو..انت كذا سكت ظميري من ناحيتك للأبد والوعد قدام
_____________________
قبلها بكم ساعه في كوفي شوب نسائي في احد المولات الكبيره
جالسات في ابعد طاوله عن حركة الزباين والعاملات
سحر : ماعرفتي خزام وش فيه يوم جابنا مكتم
عروب : هذا حاله من يوم جاء من عند جده الاسبوع الي راح للحين
قاطعتها سحر : الله ياخذ جده الكريه ويفكنا من بلاويه
عروب بقهر : اااامين مدري وش مسوي فيه دايم
اذا جاء من عنده يروح للبر ويجي منه وقيده رجع لوضعه الطبيعي والمره هذي راح للبر وجاء اردى منه يوم راح
جاهن صوت عذبه تنادي من بعيد وحركة الزباين
قيدها خفت : عروب اخذن عشاء من المطاعم وروحن للبيت وانا بقعد لحد ماسكر الكوفي بسرعه
خزام في الطريق
عروب ترفع صوتها : ابشري
وترجع تلف لسحر :انتي بيجي احد ياخذك والا بترجعين معي
سحر بفرح : لاطبعن معك وانا اقدر افوت شوفت خزام
عروب بضحكه : ههه والله ياخوفي ان خزام ماهو داري عنك ترا والاعمره لمح عنك بشي
سحر حست باحباط وزمت شفايفها بزعل : وانتي وينك عني ليش ماتسنعين موضوعي معه والامحسوبه علي عمه على الفاضي
عروب بجديه : وش تبيني اسوي احرج عليك عنده بلا هبل
سحر عصبت وبقستها على كتفها : وجع ياقليلة الادب ماقلت حرجي
عروب تحك كتفها مكان الضربه : اي عورتيني يازفته
قومي خلينا نروح ناخذ عشاء قبل يوصل خزام
سحر تجر يدها تجلسها : اقول اقعدي خزام مايحب
اكل المطعم
عروب بطفش : بعمره ماحبه ماعندي استعداد ارجع للبيت اطبخ وانفخ
سحر بزهق : اقول انثبري انا الي بطبخ بعد عمري اعرفه مايحب الاكل الثقيل في الليل بسويله مناقيش بالزعتر وبتزا سريعه
عروب تلفت تشوف عذبه وين : وجع قصري حسك لاتسمعك عذبه
سحر بضيق تمرر كفها على فمها كنايه عن لصقه بشريط بلاستر وبصوت بالعافيه يطلع : هه سكرنا
عروب دق جوالها ردت عليه بسرعه وكان خزام وقالها تطلع ..........
في سيارة خزام كان هزاع الي يسوق وخزام جالس جنبه وأول ماركبن عروب وسحر تبادلو نظرة عدم رضى مشى هزاع والسياره غارقه في الصمت لحد
ماوقف قدام بيت عمه سالم سحر وعروب ناظرن في بعض بقهر محد قاله رح لبيت سالم
اضطرت سحر تنزل دامه وقف عند بيت ابوها
عروب بقهر بعد ماحركو : ليش نزلتها انا ابيها تروح معي للبيت
هزاع بطفش : تراها احشرتنا اربعه وعشرين ساعه ناشبه في بيت خزام
عروب بنرفزه : يعني انت مانك ناشب في بيت خزام
خزام بدفاع : بيتي بيته وانتي وامي محارمه
عروب بزعل :قصدك انه ماهو بيتي ومايصير اجيب صديقاتي فيه
خزام صد بطفش من هالسالفه : ياشينك لانويتي النكد
هزاع بروقان : كله من الي ماتنتسمى سحر يالله انك تعجل بعرسها
خزام يكمل الدعوه : واجعل زوجها من اطراف الرياض
هزاع باعتراض : قريب .... يارب اجعله من مدينه ثانيه
خزام : اجعله من دول الخليج
هزاع :اجعله من بلاد الهند والسند
خزام ضحك :ههههههه جبتها جبتها امين امين
____________________
يوم الجمعه بيت ال عامر
في جلسة ال عامر الخاصه النقاش محتدم عن العرس الي تم البارح
ثائر: الغريبه ان ابوها طاير بيوسف من قلب ماعليش حتى لو الناس مايدرون ان بنته مغتصبه ماتوصل الرخامه لذي الدرجه
ابو نادر : السالفه فيها شي ماهو طبيعي انا كنت شايل هم كيف بنقظي الليله معهم في مكان واحد وولدنا معتدن على عرضهم لاكن الحفاوه والترحيب الي لقيناه شي ماهو طبيعي
الجد ابوجابر : العرض يوجع والرجال مافي عينه كسرة نفس بالعكس يفاخر ببنته وراسه مرفوع
نادر : شفتو وش كثر الناس الي جوهم والا اقاربهم
كلهم يتناشدون عن البنت باسمها واضح انها عزيزه عند جماعتها
ثائر: انا حفظت اسم البنت من كثر ماينشدون عنها
بروق ياخي الأسم صاروخ
غزل بدلع : قصدك بدوي
ام نادر : غريب اسمها وحلو الا المفاجأه اطلعت بنت المحاضره في علم تطوير الذات نرجس الشاهين
ابو نادر بأعجاب : العايله كلها مطانيخ بس القهر انا نتعرف عليهم بالطريقه هذي لونا مناسبينهم انسبن على اسنعه كان سويت عرس يهرجبه الخليج كله
ثائر يلتفت على امه : العروس وشلون كان وضعها يوم شفتوها
ام نادر اشهقت باستنكار : صاحي انت تبينا ندخل لها ثم تصير فضيحتنا على كل السان
نادر عقد حواجبه بعدم فهم : وش دخل دخلتكم عندها في الفضايح
غزل كانت جالسه معهم وتذكر كيف امها طبت عليها هي وغرور واسمعت كلامهم عن بروق
حصلت منها تهزئه محترمه على التنصت لاكن ظيق الوقت وكونهم مضطرين يبدون فورا في التجهيز للعرس كل ذا كان رحمه لها من العقاب انتبهت من سرحانها على كلام نادر
واندفعت تكلم بقهر واهي تحط نفسها مكان بروق : وحده معتدى عليها ومجبوره تتزوج الحقير الي اغتصبها علشان تستر نفسها تتوقع تاخذ اهله في الاحضان اكيد انها كارهتنا وكارهه شوفتنا ولو جيناها اكيد بتنهار قدام اهلها كلهم واهم مايعرفون شي
ام نادر تكلمت بتأييد : اشوف اقاربها يدخلون عندها بس في النهايه هم مايعرفون شي عن السالفه ولو قدرت البنت انها تتظاهر قدام اهلها ان الامور طيبه ماراح تقدر تمثل قدامنا حنا اكيد بتتذكر الي صار معها وتنهار اعصابها
ابو نادر اقتنع : الله يعين الحين حنا كيف بنقنعها نسوي لها حفله الخميس الجاي واهي احتمال ترفض تقابلنا خير شر
ام نادر : باخليها تهدي نفسها يومين ثلاثه وبعدها بروح لها واحاول اقنعها
قطع كلامهم دخول يوسف المفاجئ ووراه زوجته بعبايتها الساده ومظهرها المحتشم ظهرو قدامهم كصوره متناقظه !!
يوسف تقدم للجلسه وجلس على الكنب بعدم مبالاه بروق شافت كيف جلس بوقاحه من غير مايرد السلام على اهله احتقرته للمره المليون ماتدري لمتى راح يستمر في سقوطه للهاويه
شدت طولها بثقه وادخلت الصاله واهي تلقي
السلام على الحاضرين بصوت فخم واضح وجهوري
: السلام عليكم ورحمة الله وبركاته
ردو السلام عليها كلهم واهم يتبادلون نظرات الصدمه والاستغراب ماتوقعو تجيهم في البيت وبالسرعه ذي !!
لاحظت ان الجميع بقو في مكانهم انقهرت من يوسف وشلون جلس وطنشها من غير مايعرفها على اهله قررت تبادر بالسلام دامهم ماعبروها اشرت على الرجل الي توقعت انه ابو يوسف : اعتقد انت عمي راشد .....
اسئلت تتأكد خوف انها تسلم على واحد ماهو محرم لها
ابو نادر حس على نفسه ووقف : ايه انا عمك
قربت له ومدت يدها تصافحه وباست خشمه وراسه باحترام شلونك عمي
ابو نادر : الحمد لله بخير ومبروك الزواج
بروق وبنفس صوتها الواثق : الله يبارك فيك
اشر على ابوه هذا الوالد
تقدمت بروق لابو جابر وسلمت عليه بنفس الاحترام : شلونك جدي
ابوجابر حس براحه للبنت بس سالفة انها مغتصبه
مخليته غصب عنه يقرف منها ومع ذالك حاول كل جهده يخفي نظرة القرف عنها : الحمد لله بخير
مبروك
بروق : الله يبارك فيك
حست ان نظراتهم لها ماهي طبيعيه وحست بعدم
راحه تجاههم بس حافظت على تعاملها محترم معهم
ابو نادر اشر على اعياله وعرفها عليهم وسلمت عليهم مرادد من مكانها ثائر وقف يبي يصافحها
لاكنها اشرت له يبقى مكانه : مااصافح ارجال
نادر شملها بنظرة قرف واظحه وكأنه يقولها من غير لاتقولين لاتحلمين اصافحك
استغربت بروق نظرته وماعلقت ارجعت تلف على ام نادر تسلم عليها شافت جمال يصدم اعرفت ان
يوسف وارث جماله منها ومع ملامح الانوثه الطاغيه
فيها اطلعت اجمل من يوسف باضعاف
انطقت باعجاب ماشاء الله
ام نادر الي متعوده على نظرات الاعجاب حبت انها
عبرت عن اعجابها بذكر الله
:مبروك
بروق : الله يبارك فيك خالتي
وصل الدور لغزل وابتسمت بروق من تحت نقابها بسعاده واهي تسلم عليها بحماس : واو ماراح اكون
البنت الوحيده هنا
غزل رغم التحذيرات الي جتها هي واختها انهم يكونون رسميين معها حست براحه وانشراح كبير لبروق
سلمت عليها بنفس الحماس : ابشرك بنكون ثلاث موب ثنتين
جلست بروق جنب غزل ويوسف من جلس واهو يتقهوى وياكل من الضيافه والااعطاها اهتمام
ام نادر صبت لبروق قهوه وقدمت لها من الضيافه
وارجعت تجلس .....بروق استغربت من النظرات الغريبه الي تدور بين افراد العائله بصمت واهي حاسه من البارح ان هالعائله وراها شي ماهو طبيعي رجحت انهم رافضين زواجها من ولدهم وحاولت تلقى لهم عذر مهما كان صعبه ان واحد يروح لأهله ويقول لقيت بنت في البر وقررت اتزوجها لو سواها اخوها مشاري راح يستغربون الموضوع وراح يترددون كثير قبل لايوافقون عليه
يوسف انهى قطعة الحلى الي في يده وشرب فنجانه ونزله على الطاوله التفت على بروق وفز واقف : يالله بروق مشينا قلتي لازم امر على اهلك واسلم عليهم وهذا انتي سلمتي
يالله امشي
بروق نزلت الفنجان من يدها وشدت ظهرها تستقيم في جلستها بثقه : ماراح اروح معك لاي مكان !!
___________
البارت الرابع
تنبيه شخوص الروايه وحكاياهم لايمتون للواقع بصله ان وجد على ارض الواقع اشخاص يحملون اسماء او ينتسبون لعوائل تواجدت اسمائهم في الروايه فهذا من باب الصدفه لااقل والااكثر وليس لاي شخص يملك اسم مماثل لاحد شخوص الروايه اي علاقه بروايتي واحداثها فهي مجرد خيال احيكه وابنيه من بنات افكاري اتمنى اخذ هذا التنويه بعين الاعتبار وشكراً _____________ بروق نزلت الفنجان من يدها وشدت ظهرها تستقيم في جلستها بثقه : ماراح اروح معك لاي مكان !! يوسف التفت عليها بعصبيه : خير وش قلتي بروق بجديه : اجلس خلنا نتفاهم بهدؤ اما نتوصل لاتفاق والاننهي كل شي الجالسين تبادلو النظرات المتوجسه وانشدو لكلامها والتوقع العام انها ناويه تفتح موضوع الاغتصاب يوسف رجع يجلس والضنون بدت توديه وتجيبه ويحس من ناحيتها بحيره معقوله بتفتح سالفة الي صار البارح طيب ليه ماتكلمت معي قبل ليه رجعت ولقيتها في سابع نومه وكأنها مافهمت انا ليش طلعت وتركتها وحتى لو فرظنا انها هبله ومافهمت انا راجع لها بدليل قاطع يخلي اتنح وحده تفهم من وين جاي ! ....اها معناته طنشت متعمده علشان تجي تسويلي فلم هندي هنا : وعلى وش نتفاهم بروق التفتت على ابونادر ووجهت كلامها له : ياعمي انا هنا في بيتك وتحت حمايتك وانا اخيرك بين امرين اما اجلس في بيتك وبشروطي والا تردني لبيت ابوي بورقة طلاقي والوجه من الوجه ابيض اختلطت الاصوات من حولها مابين استنكار وتسائل وعلت الوجوه علامات الاستغراب والدهشه وبروق كل تركيزها مع سيد الجلسه ....... ابونادر مستغرب من كلامها المفروض انها المستفيده من هالزواج والمتوقع انها تتمسك فيه بكل قوتها حتى ماتنفضح : وش لازمت هالكلام هالحين وانتم ماتزوجتو الا البارح بروق : لازمته اني اكتشفت ان يوسف مايصلي والي ماله صلاه ماله ولايه يوسف حس الكلمه اضربت في مخه مثل الرصاصه جن جنونه وفز قاطع المسافه الي بينه وبينها في خطوه وحده وخمها بحلق عبايتها ساحبها يمه لحد ماعتدلت واقفه قرب وجهه من وجهها وهو يصرخ بقهر :وولايتي عليك وين راحت ياحيوانه بروق ردة عليه وعينها في عينه بتحدي : ولايتك راحت مع صلاتك قال الرسول صلى الله عليه وسلم: "العهد الذي بيننا وبينهم الصلاة فمن تركها فقد كفر". يوسف حس كل عرق في جسمه يتفجر غضب رفع يده ونزل فيها كف حط فيه كل قوته وقهره لاكنه تفاجأ بيده تعلق في الهواء قبل توصلها وابوه يدخل بينه وبين بروق ماسكه بمعصمه ونادر فز من مكانه وسحب ايدينه وكتفها من ورا..... ابو نادر بغضب : بروق في وجهي طول ماهي في هالبيت وان مديت يدك عليها بعد مامديتها كسرتها يوسف صرخ :هذي زوجتي تعرف وش معنى زوجتي ردت عليه بروق بعصبيه : ومن هالساعه كل حقوقك علي معلقه وملغيه بالكليه لحد ماتلتزم بصلاتك ولاتظن اني بانتظرك كثير معك شهر واحد بس ومااضمن اني اقدر اصبر اسبوعين والاحتى اسبوع واحد .... صرخ فيها يوسف بقهر : ومن انتي بس علشان اغير حياتي علشانك تراك ماكله مقلب في نفسك بروق ببرود ماهو متناسق مع كل اللهب المشتعل في اعصاب الكل بما فيهم هي نفسها تكلمت واهي تاشر باصبعها على نفسها : النقيض اعرف الناس بنقيضه وانا بروق مكاني سماء وانت ادرى بمكانك نادر وثائر حاجزين يوسف بالقوه واهو يتفلت منهم يبي يهجم على بروق : فكوني عليها الكلبه خلوني اوريها حجمها فكوني ابو نادر ترك يوسف يوم مسكوه اخوانه والتفت على بروق واهو يغلي قهر من الاثنين : وش شروطك علشان تقعدين بروق تكلم وعينها تنقل بين يوسف وابو نادر بخليط مشاعر مختلفه : اول شرط تحطلي غرفه بعيده عن غرفة يوسف وتعطيني مفاتيحها كلها ابو نادر بجمود : تم ولك جناح كامل جاهز من كل شي وجديد الي بعده بروق : شرطي الثاني كل حقوق يوسف علي معلقه لحد مايغير مسار حياته بالكامل واكيد انكم تعرفون انه مايجوز استمر معه واهو مايصلي وانت الوحيد المسؤل عني هنا يوسف عيونه حمر وعروق ارقبته انتفخت من الغضب صرخ على بروق واهو مازال ينفض نفسه من يدين اخوانه بعنف يبي يوصل لها بالي هوبه : قايلك من البدايه اني ماصلي يومنك ماتبين الي مايصلي ليه تزوجتيني بروق لفت عليه وحطت عينها في عينه واهي تناظره بقرف : تزوجتك لاني ماقدرت اصدق انك فعلا ماتصلي قلت يمكن مقصر !متهاون اما ماتصلي ابد !! ..اذا انت فيك من الفسقه مايخليك تجاهر بمعصية الله بقلب ميت انا خوفي من الله يمنعني من اني اصدق ان فيه مسلم يعرف منزلة تارك الصلاه ويتركها ولولا انك اثبتلي هذا الشي لمى مرت عليك فروض يوم كامل من غير ماتصلي والافرض والاكان ماصدقت وهالحين ماقدامك الا انك تلتزم بصلاتك والا اصغر قاضي في اقرب محكمه يخلعك في اقل من عشر دقايق كانت تتكلم بغل وقهر ويوسف توهق يعرف احكام الشرع كلها ويدري انها تقدر تخلعه بكل بساطه وبعد ماكان يتفلت من اخوانه هجد واهو يحس بقهر وحقد اسود يحرق روحه ويترس قلبه غل على بروق نزل نظره في الارض وقام يتصدد بوجهه عنها نادر وثائر الي كانو مشغولين بحجز يوسف عن بروق كان ودهم يفكونه عليها ويخلونه يبرد قلوبهم فيها لاكن ابوهم قيدهم يوم حطها بوجهه .......غزل متعلقه عيونها في بروق وتتابع بخوف وشي من الانبهار هذي كيف تتكلم بالقوه ذي واهي معتدى عليها كيف مانهارت كيف مانعدمت نفسيتها؟!...... ام نادر ايقنت ان بروق برئيه من تهمة الاغتصاب بس وش سالفتها مع يوسف ؟! ابو جابر قام وقف بين بروق ويوسف واهو يوزع نظراته بينهم : خليتس على رايك الاول يابروق عطيه فرصه شهر وان شاء الله انها كافيه علشان يغير من نفسه ويمسك صلاته بروق نقلت نظرها بين ابو جابر وابو نادر : ماهو قبل لاتوعودني انكم تمنعونه عني طول ماهو على هالحال وان طلبتكم لشهاده في محكمه والاعند ابوي تشهدون معي بالحق ابونادر يحس بقهر غير طبيعي من الموقف الي حطهم فيه اولده والاراشد العامر تاقف في وجهه بنت في عمر بناته وتشرط عليه بلع غصته ورد بجمود : لك كل ماتبين وانتي في حمايتي ومحد يقدر يمس اشعره من راسك لايوسف والاغيره ثائر انقهر واهو يشوف اخوه كيف انهان قدامهم ومنظر يوسف واهو يتصدد عنهم جرح قلبه بقوه ماقدر الانه يفزع له نطق بقهر : انتي على وشو شايفه نفسك بدل ماتشكرينا لانا سترنا عليك جايه تهايطين علينا يوسف انتفض من الغضب كيف نسى يعلمهم بعد ماتمت الملكه استدار على ثائر وقيدهم ارخو ايدينهم عنه بعد ماترك التفلت على بروق وامسكه بحلق بلوزته : وقص يقص السانك ان عاد جبت طاري زوجتي بالشينه لاافصل راسك عن جسدك نادر صرخ في وجه يوسف واهو يدفه عن ثائر : انت الي قلت انك مغتصبها رد عليه يوسف بصراخ اعلى : قلته لأنكم عييتو تروحون معي علشان املك عليها والا بالعقل اخذ وحده قيدني خلصت منها وش ابي فيها بروق حست بزلزال ينفظ روحها كيف ينقال عنها هالكلام والمصيبه الاعظم ان الي قاله زوجها اكثر واحد يفترض انه يصون شرفها وسمعتها صرخت :الايالخسيس يوسف التفت على صرختها بهلع وحاله انقلب في ثواني من الهجوم الشرس على بروق لدفاع عن نفسه قدامها خمها ماسكها بعضودها : اسف والله اني اسف غصب عني عيو يجون معي بروق تقاطعه بقهر وكره اسود بدا يغرق قلبها : بعمرك لاتزوجت تقذفني وتتبلا علي وانا طول عمري صاينه نفسي انت وش الفجور الي فيك ..... تحس جسمها كله ينتفض من القهر ويوسف يترجاها تسامحه فجأه حست بيدين تسحبها من يوسف الي كان يتعذر لها بشكل هستيري ويبيها ترضى باي شكل ارفعت راسها بتشوف من وتعلقت عيونها بالوجه السمح الي ارتخى على جبينها يقبله وبنبرة رجاء : امسحيها في وجهي يابوتس ومالتس الا الي يرضيك بروق غمضت عيونها تحاول تسيطر على مشاعرها المتفجره بحرقه تحسها تكوي جوفها ازفرت نفس حار وبدت تذكر الله : استغفر الله استغفر الله اسغفر الله العظيم واتوب اليه اخيرا حست ان نفسها بدت تهدا ابعدت نظرها بالكامل عن يوسف واهي تحس باحتقار له يكفي العالم بكبره التفتت على ابو جابر وبصوت بان فيه القهر والغبنه : يكرم وجهك عن الردا ياجدي الي تجرا انه يبارز الله بالمعصيه وش بارجي منه انا ؟! يوسف ماقدر يستحمل اكثر تجرع من الإهانه والغصات اكثر مما يطيق انسحب طالع من البيت ..... ابونادر انهار جالس على الكنب واهو يضغط على راسه بين ايديه يحس انه بينفجر من قو الصداع الي ضرب فيه يا الله وش هالمصيبه الي حلت عليهم لو فلت منهم كلمه عند اهل بروق كان قلبت حرب بينهم تدمر العايلتين وشلون تجراء يوسف انه يلعب بعرض الناس ويقذفهم كذا !!تدارك افكاره بهزه من راسه وكانه يعارض بهالحركه مايدور فيه اصلا يوسف طول عمره يلعب باعراض الناس الله يكفينا شره وشر افعوله ....انتبه على نادر يهز كتفه بيده : يبه تحس بشي يعورك شي رفع راسه لنادر بأسى : عطني بندول راسي بينفقع من الصداع ثائر سبق نادر وصرخ ينادي العاملات : بسرعه هاتو بندول وماء غزل منكمشه على نفسها في الكنب وتبكي كثير عليها الي قاعده تشوفه حرام الي سواه يوسف في بروق بس في النهايه حكاية انه كذب عليهم علشان يتزوجها اهون بكثير من انه يعتدي عليها فعلا عند هالنقطه حست بفرح يجتاح قلبها حبت بروق من اول ماشافتها الحمد لله انه يوسف ماتعرض لها ام نادر تحس بتشتت في موقفها سعيده ان بروق ماتعرضت للاغتصاب وفي نفس الوقت حزينه على يوسف وماعجبتها الفوقيه الي تتكلم فيها بروق معه ثائر متفشل من بروق ومقهور من سوات يوسف خاصه يوم يتذكر البارح كيف كان يقابل ترحيب ابو بروق واخوانها بنظرات تكبر واحتقار وكم مره بغى يزل السانه ويشتمهم واهو يشوف كيف انهم طايرين في يوسف ويقدمونه لجماعتهم على انه الفارس الي رجع لهم بنتهم مصيونه كان يظن كل ذا تمثيل طلع صدق واهم الي اكلو الفضيحه قدام الناس وطلعو قدامهم بمظهر العائله المتعجرفه الوقحه ......... نادر ماهو قادر يتخيل حجم الأذى الي تسببو فيه لهالبنت واهلها ناس محترمين قابلوهم بكل حفاوه وكرم اخلاق بينما هم قابلو حفاوتهم بتعالي وعنجهيه على بالهم مسوين معروف وساترين بنتهم زفر بضيق وين المعروف الي سووه حتى لوفرضنا ان يوسف اعتدى عليها المفروض نخجل من انفسنا بدل مانفترض انهم هم الي لازم يخجلون من بنتهم مين الي المفروض يكون مخجل الي اعتدى بكامل ارادته والاالي تم الاعتدا عليه بالقوه ؟! ابونادر اوصله البنادول والماء اخذ حبة المسكن وشرب كاس الماء كله نزل الكوب من يده على الطاوله والتفت على بروق شافها جالسه في مكانها الاول نظرها يتنقل بينهم بنظره عجز يفهمها ماحاول يتعب نفسه بالتفكير فيها وفي افكارها كل الي يبيه الحين انها تختفي عن وجهه وانه يمسك الكلب يوسف ويعرف منه وش الي صار بالضبط التفت على ام نادر وكأنها افهمت وش يبي نادت بصوت عالي :امنه لحظه ووصلت رئيسة العاملات : نعم ام نادر اشرت على بروق : وصلي مدام بروق للجناح الي نضفتوه اليوم الصباح بروق وقفت واهي حدها مرهقه ونفسيتها عدم ...... |
غزل مسحت دموعها بسرعه وفزت واقفه واهي تسحب يد بروق : روحي ياامنه انا بوديها
امنه استدارت علشان ترجع ووقفها صوت بروق بأمر : امنه سويلي هوت شوكلت وجيبيه في كوب اسود مع تشوكلت داكنه
امنه استغربت تحديدها للون الكوب : انا بقول لطباخه عن طلبك وهي تحطه في اي كوب
بروق حدها مقهوره صرخت عليها : قلت ابيه في كوب اسود
الجالسين يتابعون المشهد باستغراب قطع سكونهم صرخت نادر : امنه نفذي كلامها من غير نقاش واذا مافيه كوب اسود ترسلين السواق يجيب من السوق
انتفضت امنه بخوف من نادر : حاضر
بروق بمجرد ماسمعت نادر يعقب على طلبها اعتبرته منتهي واصعدت مع غزل لجناحها
اول مادخلت الجناح بدت تنزل عباتها ونقابها واهي تنزل التفتت على غزل : القى عندك برمودا ابيض وبدي احمر
توسعت عيون غزل بتعجب واعجاب في نفس الوقت !!عجب من تحديدها للالوان واعجاب بالجمال الي كشفت عنه النقاب والطرحه
بروق استغربت تتنيحة غزل نطقت ببرود : ماعندك ؟
غزل انتبهت : هاه ايه عندي عندي واركضت لغرفتها تجيب الملابس ........
بروق دورت الحمام وادخلت غسلت وجههاواطلعت
شافت غزل داخله عليها تقدمت لها واخذت الملابس منها وارجعت للحمام تلبس بعد عشر دقايق اطلعت لابسه البدي والبرمودا وتشيل فستانها الي كانت لابسته في يدها
ادخلت امنه تشيل بين ايدينها صينية فيها كوب الهوت شوكلت وعلبة تشوكلت غامق قربت من الطاوله بتنزل الصينيه عليها لاكن بروق اشرت لها
على قطعة الزوليه الصغيره : حطيه هنا
امنه حطت الطوفريه وين ماقالت لها بروق و جابت
مخده من الي تستخدم للجلوس وحطتها مقابله لصينيه
بروق : سكري الباب وانتي طالعه
تقدمت للكنب نزلت فستانها عليه ثم راحت للجلسه الي ضبطتها امنه واجلست على المخده
افتحت جوالها الي كانت شايلته في يدها وشغلت
شيله حربيه !! ..... في الواقع هذي طقوس بروق
لمى تحس بنفسها تضيق وروحها تختنق بين اضلوعها ......قبل حربنا مع الحوثي كانت تشغل اغاني حرب الخليج اما الحين الشيلات الي تتغنى بالجيش مالها عدد عموما نادرا جدا ماتدخل في هالحاله الكئيبه ....وش معنا القصايد الي تتغنى بالجيش والحرب بالذات ؟! لان كلماتها فيها قوه وتحدي وحشد للهمم ومدح وتهديد للعدو وكلها
معاني تنتمي لها تحسها تنعش روحها وتنفض عنها
مشاعر الحزن والانكسار الي تحس انها معاني دخيله عليها يجب التخلص منها قبل ان تستوطن ذاتها وتهشم اعتزازها بنفسها
كانت جالسه متربعه على المخده تاكل من حبات التشوكلت بطريقه بدائيه ايدينها الثنتين ملطخه فمها خدودها وحتى كوبها الي ترشف منه رشفات
صغيره ثم تعود به لصينيه الموضوعه قدامها ماسلم من التلطيخ .......
غزل شافت امنه واهي تطلع من عند بروق نادتها
بحماس : امنه امنه
جتها امنه تتحرك بخطوات سريعه :نعم
غزل : اسمعي روحي جيبيلي هوت شوكلت في كوب اسود نفس الي جبتيه لبروق ابي تجيبيلي زيها بضبط
هزت امنه راسها : حاضر
وراحت تنفذ الامر
غزل حمدة ربها انه عندها نفس البدي الاحمر الي عطته بروق كانت شاريه منه قطعتين لها ولغرور
بس غرور عيت عن حقها ماعجبها اركضت لغرفتها البست البدي الاحمر على بنطلون ابيض كان ودها تلبس برمودا نفس بروق بس ماعندها ابيض الا الي عطته بروق انحنت تلف اطراف البنطلون على فوق
لحد ماوصل لنصف ساقها ووقفت واهي تبتسم لنفسها بانتصار تذكرة ان بروق مرجعه شعرها على ورى بطوق تحركت لتسريحه اخذة منها طوق والبسته ...........
بروق مازالت تمارس طقوس الألم الخاصه فيها تسحب حبة التشوكلت من العلبه تغفصها داخل كفها تفتح كفها وترفعه لفمها تاكل القطع المطعجه داخله وتلحس الباقي بلسانها وكأنها بزر توه ماتعلم الطريقه الصحيحه للاكل فجأه اسمعت صوت الباب ينفتح التفتت تشوف من ......شافت غزل تدخل واهي ترفع يدها بكوب اسود وبحركه كوميديه
تأشر على الكوب ثم على ملابسها وتنطق بمرح : مستوفيه كل الشروط ماظنتي بتكونين شريره وتطرديني
بروق ابتسمت لها وغزل ماكذبت خبر على طول لفت على الباب اقفلته بالمفتاح وراحت اخذت لها
مخده نزلتها قدام بروق وجلست عليها نزلت الكوب من يدها واهي تناظر بروق بتكشيره : وش ذا
بروق اسحبت حبتين شوكلت كل وحده بيد غفصتهم في ايدينها وبدت تاكلهم غزل سوت نفسها واهي تضحك على نفسها بجنون :هههههههههه هههههههه هههه هالحين حنا في اي مرحله عمريه بس علشان اتقن الدور
بروق روقت على ضحكتها خاصه ان التشوكلت من محفزات السعاده الطبيعيه ويبدو ان مفعولها بدا يظهر على بروق : في مرحلت البدائيه الحره
غزل بحماس : واو مره عجبتني
انتهت الشيله وبدت بروق تمسح ايدينها في ملابسها علشان تحط شيله ثانيه غزل تناظر ملابس
بروق الي تلطخت : اوه وناسه
وبدت تمسح في ملابسها بدون سبب تبي تشوفها ملطخه......اتسعت ابتسامتها بوانسه واهي تشوف ملابسها تلطخت تحس انها سوت شي غير مألوف
بالنسبه لها ارجعت تغفص الشوكلت في كفوفها وتاكل بحوسه وتلطيخ وبسعاده : ياسلام على المخ السعيد الي في راسك انا ودي اعرف كيف جافي بالك الفكره ذي احس اني مبسوطه من قلب وانا اكل وااحوس كذا متى اول مره سويتي الحركه ذي
بروق مازالت تحوس وتاكل بتلطيخ نفس غزل :
اول مره كانت اعتذار من شخص ماهو متعود يعتذر
جابلي علبة تشوكلت غامقه وعلشان انكد عليه فتحت العلبه وصرت اخذ حبات الشوكلت بيديني الثنتين واغفصهم في كفوفي ابي اقهره بس لاني وقتها كنت بزر ماكنت اقدر اقاوم وارجع اكلها واهي مغفصه ولاصقه في يديني وحده ورى الثانيه فجأه حسيت اني بديت اروق وانبسطت ومن يومها كل ماحسيت اني مخنوقه اسوي كذا وارجع اروق عاد مع الوقت اضفت عليها الطقوس الثانيه
غزل تحرك فضولها بقوه واهو اساسا في حركه مستمره عندها : والبدي الاحمر و والبرمودا البيضاء
بروق عقدت حواجبها وكأنها اكتشفت لاول مره ان طقوسها ذي طلعت من تحت يد نفس الشخص
غزل لاحظت سرحانها تكلمت تستحثها : لا دامك سرحتي لازم اعرف السبب باين انه اقوى من الأولاني
بروق اخذت الكوب وبدت ترشف منه ثم نزلته من يدها واخذت حبة شوكلت وقامت تغفصها بيدينها الثنتين من يد ليد وبعد صمت قصير : كنت لابسه بدي احمر و برمودا بيضاء وشافها علي وهاوشني
ولمى رفضت ابدلها ضرب الاشخاص الي كانو يلعبون معي وطردهم برا البيت طول اليوم انقهرت
منه حيل ورحت جبت الشوكلت وصرت اكله بنفس الطريقه ذي ومن يومها انضاف البدي الاحمر والبرمودا البيضاء لحفلة التمرد او جلسة استرجاع الذات
غزل صفقت بحماس :يس انتي ابداع باقي الكوب الاسود
هنا انفجرة بروق تضحك : هههههههههههههههههه
هذا جاني هديه كوب اسود ساده وكنت حدي فرحانه فيه وكالعاده جاء هادم الذات واخذه مني واكسره قدامي على اقرب اجدار وقبل لاشرب فيه حتى وبكذا انضم للمجموعه
غزل بخبث : اها والي ورى هذا كله نفس الشخص وبدت تهجي الكلمه م ن ه و
بروق اختفت ابتسامتها فجأه وبجمود : مالك دخل !!
هنا دق جوال غزل على اخر كلمه لبروق وكأنه بهالاتصال يحط نقطه اخر السطر بروق سكرت الشيلات وغزل فتحت جوالها ترد تبادلت مع المتصل كلمات قليله وسكرت واهي تلتفت على بروق : امي تقول انزلي انتي وبروق للعشاء
بروق : الشباب تحت
غزل : ايه ..خليني اروح اجيبلك لبس بختار ملابس
قريبه من بعض
بروق : دامني بنزل بالعبايه جيبيلي بجامه بالمره انام فيها
غزل : اوكي اجل حتى انا بلبس بجامه
نادت غزل امنه تنظف الحوسه واهي راحت تجيب لبروق بجامه
غيرو البنات ملابسهن وانزلن مع بعض
ادخلت بروق لجلسة العائله وسلمت ويال الغرابه
السلام انرد عليها بحفاوه وترحاب وابتسامات صادقه .....ياالله ياكبر الفرق بين استقبالهم لي وانا داخله مع يوسف قبل ساعتين بس من هالحظه واستقبالهم الحين كانو محتقريني لاعتقادهم ان ولدهم مغتصبني ياسبحان الله هو الي يجرم ويغتصب وانا الي اتلقى الاحتقار !!
انتبهت ان يوسف جالس معهم واول ماشافها صد عنها وقام واقف بيطلع بروق كلمته ببرود وقلبها يغلي منه : يوسف
وقف مكانه واهو يشتت انظره عنها : نعم
بروق : جب اغراضي
يوسف حب يستغل الموقف يمكن تضبط معه ويقدر يستفرد فيها : تبين اغراضك امشي معي اوديك تاخذينها
بروق قربت منه خطوه وبتحدي : قلت ماراح اروح معك لاي مكان
يوسف قرب منها خطوتين وصار شبه لاصق فيها وعينه في عينها وبتحدي اكبر : وانا ماني بجايب لك شي
بروق لفت عنه متجهه للكنب اجلست بظهر مستقيم وارفعت راسها ليوسف : معناته خلها مكانها حلال على الي ياخذها السوق قريب وانا مستعده ابعزق فلوس ابوك لاخر ريال اصلا مافيه
امتع من التسوق وبعزقة الفلوس
ابوجابر وابو نادر ابتسمو على كلامها وام نادر انقهرت منها ماهو عاجبها اسلوبها في التعامل مع يوسف ابد
يوسف تاكد انها ماراح تطلع معه شملها بنظرة كره
واستدار طالع من غير مايرد عليها
ام نادر التفتت على بروق بعصبيه : لاتنسين انه زوجك وانتي تتكلمين معاه ويكون في علمك اسلوب المعاند والتحدي ذا ماينفع مع يوسف
بروق فزت واقفه ماهي قادره تنسى كيف كانو يعاملونها باحتقار كعقاب على افعال ولدهم
: متى ماصار كفو انه يكون زوجي انا بروق ساعتها
تكلمي عن معاملت الازواج ثم انا اذكر زين انه قالي ان عمره سبعه وعشرين سنه وطول هالسنين كلها كان عايش معكم وقدامكم كل الفرص وكل الاساليب علشان تتعاملون ابها معه والنموذج الي انا شايفته الحين يثبت انه والاواحد منكم يعرف الاسلوب الي ينفع معه وبكذا ماهو من حق اي واحد فيكم ينقد اساليبي اويعدل عليها
ام نادر زادت عصبيه : الا بن...
قطع كلامها صرخة ابو نادر : خلاص يام نادر
والتفت على بروق : من عندي انا سوي فيه الي تبين جزاه واقل من جزاه بعد
ابو جابر : ابد حلالتس لوتذكينه مارديناك عنه
ام نادر مقهوره من اتفاقهم على ولدها : انتم كيف تحرضونها على زوجها
نادر : يمه يوسف تعدا كل حدود الدين والعرف والاخلاق وش منتظره منه اكثر من الي هو فيه
خليها تجرب يمكن تسوي الي ماقدرنا عليه
اسكتت بعدم اقتناع وكان سكوتها مجرد خضوع لكلام نادر الي كان ولدها المميز والأكثر تأثير عليها
جت امنه : العشا جاهز
قامو للعشا وابو جابر سحب بروق بيدها بمحبه وابتسامه عريضه ماينكر انه ارتاح لها من اول ماشافها وبعد ماقالهم يوسف قصتها معه وشاف بعينه كيف تصرفت في موضوع ترك يوسف لصلاه
حبها من قلب وتمنى لونها تزوجت نادر لانه الي يستحق وحده مثل ذي : تعالي اجلسي جنبي
غزل اشهقت بغيره : لااجرام جدي بعمرك ماناديتني اجلس جنبك
ابوجابر ضحك : ههههه هذي حفيدتي الجديده لازم
احتفل فيها
بروق تلتفت على غزل وبمزح : انتي لاتحطين نفسك في مقارنات معي لانك بتخسرين وبجداره
غزل تزم شفايفها بدلع : مغروره
تعشت معهم ومالقت اي صعوبه في انها تندمج في
جوهم وسوالفهم تعرف ان عندهم بنت ثانيه غير غزل ومستغربه انها ماشافتها والالقت في نفسها
الفضول علشان تسئل عنها ولدهم الثاني ماشافته من بعد الهوشه ويوسف توه طلع قدامها والاتدري متى بيرجع ....اليوم مر عليها ثقيل ومحمل باحداث قاتمه انهكت روحها ....انهت عشاها
وصعدت لجناحها وكأنها لتو شافته! جناح واسع حيل مكون من غرفة نوم وغرفة جلوس وصالة
جلوس ثانيه ومطبخ صغير مجهز بكل شي الغريب
ان الجناح مجهز بفخامه وكل شي فيه جديد
التفتت على غزل الي ادخلت معها : الي عرفته منكم ان يوسف امس قبل العرس مباشره قالكم عن زواجنا متى لحقتو تجهزون الجناح
غزل ارتبكت : هاه ... الجناح من زمان مأثثينه بس محد سكن فيه واليوم امي خلت الخدم ينضفونه
قالت لو حبيتو تجون فيه يكون جاهز
بروق انتبهت لارتباكها : لمن اثثتوه وليه محد سكن فيه
غزل تورطت وبانفعال : بروق انا مالي دخل في بلاوي يوسف انسي اني اخته والاتدخليني في مشاكله
بروق زاد استغرابها : وانا ماقلت اني راح اخلط بينك وبين يوسف ثم انا سئلتك عن الجناح وش دخل يوسف
غزل ايقنت انها لو انتظرت دقيقه ازياده بتهل الشريط كله : انا بروح انام مع السلامه
واركضت طالعه من عندها من غير ماتنتظر ردها
بروق تابعت هروب غزل وانا متأكده ان ورى هالهروب حقائق سودا ماتبي تكون من يوصلها لي
اغلقت الباب من خلفها وبديت اتجول في الجناح .......
هل يجوزلي اخليه محطة عبور اخترقها عابره لمستقبل حياتي..... ايه وليه مايجوز هو الي سلمنى كل دروعه وتركلي صدره مكشوف اغرس فيه رمحي وشلفاي..... هو الي خانني من اول ليله وفقد حقه في اني امنحه فرصة الحياة معي .... بس انا سهلته المهمه وتركتله الطريق مفتوح للخيانه علشان انا القى بابي لرحيل ! لا مالي دخل في خيانته انا بس اخذت وضع المتفرج واهو رسم خطته ونفذها
مالي ذنب في الي سواه ثم انا ليه اشيل همه يامى اخذ من بنات جنسي محطات عبور وكل محطه يعبرها يورثها الدمار ويرميها للهلاك .......بس الجميل !! وين اروح من الجميل ؟!
في الطابق السفلي مازال الحدث محتل كل اهتمام
العائله نادر : هالحين كيف بنرقع موقفنا قدام اهل بروق
ابو نادر : مالها ترقيعه الله يسترنا بستره
ابو جابر : ياليت منهو عرفهم في غير هالسالفه
ناسٍ وافين واهل كرم وجود
ابو نادر : المشكله صدق لو البنت علمت اهلها بالي قاله عنها يوسف
نادر : ماشفت السانها وش طوله الي من هالنوع
تسوي فيها هياط ويععنني انا الي اخذ حقي بيدي
ماضن تعلم اهلها
ابونادر ابتسم : انا بالقوه رديت نفسي عنها سليطه وعندها حجه وتعرف كيف تضرب في المكان الي يوجع
نادر : لونك ماحطيتها في وجهك والاكان فكيت يوسف عليها وخليته يبرد قلبه فيها انا انا كم مره بغيت المخها
ام نادر : هي سليطه وتقهر بس اشوف عقلها كبير
ابو نادر بانتقاد : هالحين تقولين عقلها كبير ومن اشوي قايمه عليها
ام نادر بتبرير : اقول الصدق بدليل انها مارضت تقعد الا بضمانك انت البنت عارفه وش لها ووش عليها لوني في مكانها وفي وسط ناسن اول مره اشوفهم ماقدرة اسوي الي سوته بس عاد مقدر اشوف يوسف يتبهذل كذا واسكت
ابوجابر : هو الي جاب البهاذيل لنفسه
نادر : هي عاقله مافيها كلام بس اسلوبها مع يوسف ينرفز
ام نادر : شفت وهذا الي خلاني انطلق عليها
ابوجابر : ماتدرون يمكن تقدر تغيره
نادر : لوتغير بيتغير بمزاجه واكيد انه ماسوا كل ذا علشان يتزوجها الاوهي عاجبته
ابوجابر : عساه بس يتمسك فيها ان ضيعها من يده
غبينه وبتسائل الا نويتو تسوون لهم حفله
ام نادر : ايه حفلتهم يوم الخميس لازم نجهز لها على اعلى مستوى ونعزم اقاربنا كلهم
ابو نادر يلتفت على نادر : شف لنا شركة تنظيم حفلات يكون شغلهم راقي ومميز
نادر : ابشر يبه
_______________
اتجهت لغرفة اختها بخطوات سريعه ماعاد فيها
صبر من الصبح لحد الحين واهم على مشارف صبح جديد واهي تجاهد نفسها وتحاول تمنعها
من السؤال عن يوسف وزوجته ! ايش زوجته انا بعد
لو اعرف اسمها الزفته ذي بدل لاانسبها له ...نامت البارح في حضنه؟! ....اكيد نامت في حضنه موب هو الي اختارها ويبيها ! حرقه شبت في روحها على هالطاري افتحت باب غرفة اختها بدفاشه وشافت الغرفه تسبح في الظلام دليل ان اختها قيدها نامت
....ياحظها ماعندها شي يشغل بالها ويحرمها النوم
مدة يدها لمفاتيح النور واضوت الإناره الخفيفه وتقدمت لسرير اختها اجلست عليه وبدت تهزها بكتفها : هموسه هموس سوسه قومي تكفين
همس انزعجت وبدت تقلب شدتها اكثر : هيه هموس قومي
فزة همس بخرعه : هاه وش فيه خير وش تبين انتي
وسن بقهر من اختها الي نايمه والاهامها احد : همس قومي صحصحي معي
اجلست همس باستغراب : صاير شي ؟
وسن بقهر : البارح راقده في حضنه الكلبه واكيد اليوم راحو شهر العسل
همس توسعت عيونها باستغراب وبفهاوه : منهي ؟ ومنهو ؟
وسن والدموع بدت تتجمع في عيونها : من غيره يوسف والحماره الي اخذها
همس تحس مخها وقف الي قاعده تسويه اختها لامعقول اخذت المخده الي جنبها واضربت فيها اختها بقهر واهي تنفخ في وجهها بانفعال: ماحمار غيرك مقومتني من عز نومي علشان الداشر يوسف صدق ماعندك كرامه وش الذل الي انتي فيه ياشيخه حسي على دمك وبصرخه اعلى حسسسسي
وسن انهارت تبكي : انتي الي حسي فيني انا من اليوم اتصبر لاطريه من اليوم اجاهد نفسي ابي اتجاهل اخباره وانساه
قاطعتها همس بغضب : ومن اليوم تاكلين بهوس لدرجة انك تستفرغين كل نص ساعه من كثر الاكل
حرام عليك اعدمتي صحتك لك شهرين ماتاكلين الابالقمه والقمتين لين صرتي جلد على عظم ومن عرفتي خبر التافه ذا وانتي حاطه كل حيلك وحرتك في الاكل ولا النكته انها من شهرين صادعه روسنا بانها اكرهته وتبي تنتقم منه
قاطعتها واهي تدفن وجهها في حضن همس بذل :غصب عني غصب وش اسوي
ارفعت نفسها تطالع همس ووجهها غرقان دموع بدت تظرب على قلبها بقهر : علميني انتي وش اسوي بذا وش اسويبه
همس انحرقت اعصابها من القهر على حال اختها
: اخرتي بشق صدرك واطلع الزفت ذا وارميه في اقرب زباله انا مدري كيف تحبين شخص مارس عليك كل انواع الاذلال
وسن بقهرواهي تشاهق وتبكي وادموعها مغرقه وجهها : اكرهه ياهمس اكرهه اكثر شي في حياتي وودي اشوفه ينحرق قلبه ويتعذب مثل ماحرق قلبي وعذبني وبعد احبه اكثر شي في حياتي واموت لو اشوفه مع وحده غيري اموت
همس بدت تهزها مع اعضودها : اصحي يمجنونه اصحي يوسف كل يوم مع عشر وعشرين افرقت ازيادة وحده متزوجها
وسن بقهر وغبنه : ايه تفرق اكيد تفرق ذوليك كلهم ارخاص ازباله ماتسوى واهو يعرف انهم رخيصات بس هذي زوجته يعني اكيد وحده محترمه وبنت ناس
همس غضبها تصاعد لذروه : هالرخاص الي تكلمين عنهن يوسف الوصخ ارخصك اكثر منهن
وسن بقهروانهيار : بس بببببس خلاص ذبحتيني اسكتي اسكتي ماعاد ابي منك شي بس اسكتي
همس اشفقت عليها وبحزن : بس انتي خلاص بكره ادق على غزل واجيبلك الاخبار
وسن انتعشت فجأه ومن بين ادموعها : هالحين دقي تكفين بس اسئليها وسكري على طول
همس انقهرت منها للمره المليون : صاحيه انتي ادق على الخلق الساعه ثنتين الفجر وانشد عن يوسف وحرمته وسن اصحي حرام عليك الي تسوينه في نفسك وفينا ترا جبتي كرامتنا كلنا في الارض بسبب هاليوسف الزفت يكفي اخوك فراس ماعاد يطل في وجهك بسبة هاليوسف لاتذبحينه زياده
___________________
جالس على سريره لابس ثوب كحلي وغتره بيضاء وواضح من مظهره انه متجهز لطلعه لاكن حالة الغوص في المشاعر الي يمر فيها في هالحظه تغريه براي ثاني واهو يجمع الجديله السودا في كفوفه ويستنشق عبيرها بسكر يعبث في برمجة قلبه ويخليه ينبض بتسارع يشبه قرع طبول الحرب يتخيل شكلها ويصورها في ذهنه يتمسك في تفاصيلها الي يجهلها ويحاول يسرقها من ملامح اهلها عيون مشاري ضحكة رعد
دفء وجه ابوها الي ماعرف اسمه شموخ صقر
عنجهية سياف انتفض من عمق احلامه بشر الاسياف يخسي يكون له في تفاصيلها بصمه وشلون تسلل لمساحه تخصها وشلون اقتحم تفاصيل مايحقله لمس الريشه الي تبدع في رسمها بدى عقله يجره لمساحه مظلمه يختلط فيها الوجع بالتوجس بحرقة الجهل وعدم المعرفه بمدى قرب سياف من بروق النضره الي شافها يعرفها زين نظرة
عشق وهيام ماتخطيها العين اه يالقهر عرفها قبله وعشقها قبله والخوف كل الخوف من انه يوصل لها قبله اعتصر جديلة الشعر بين كفوفه بقهر من هالهاجس صارله اسبوع يفر شوارع الرياض واسواقه ومحطاته يتصفح وجوه البشر يدور ملامح اهلها بينهم ولاتوصل لشي ........قطع حبل افكاره
رنة الجوال الي ارتفعت تدق مد يده لمخباه طلع جواله منه ورد من غير مايطالع في الرقم : هلا
: سم
: ابشر ربع ساعه واكون عندكم
سكر الخط ورجع جواله في مخباه
رجع يرفع الجديله لوجهه يستنشق منها نفس اخير قبل لايردها لكيسها الازرق المنقوش بتطريز هندي
من عدة الوان خامة الكيس وفخامتة اوحت له ان صاحبة الكيس ذويقه ربط الكيس محكم اغلاقه ثم
حطه برفق داخل الدرج المجاور لراس سريره سكر
الدرج وقام طالع من الغرفه مسكر بابها وقافلها بالمفتاح ثم استدار بيطلع واصتدم بالي مكتفه
ايدينها على صدرها تشمله بنظرة استنكار واضحه !!